Ejipiti Lɩʋ 28:1-43
28 «Pɩwɛɛ se ŋlɩzɩ Izrayɛɛlɩ mba taa ña-ɖalʋ Aarɔɔnɩ nɛ ɛ-pɩyalaa, nɛ palabɩ-m cɔjɔtʋ tʋmɩyɛ+—Aarɔɔnɩ+ nɛ ɛ-pɩyalaa+ Naadaabʋ nɛ Abihu,+ Eleyaazaarɩ nɛ Itamaarɩ.+
2 Pɩwɛɛ se ŋñɛyɩ ña-ɖalʋ Aarɔɔnɩ wondu kiɖeɖetu, nɛ pɩkɛnɩ samtʋ nɛ keɖeɣa.+
3 Pɩwɛɛ se ŋyɔɔdɩnɩ mba payɩ pɛwɛ niye yɔ,* mba manɖʋ pa-taa lɔŋsɩnɖɛ fezuu ɖo yɔ,+ nɛ pakaɣ ñɛyʋʋ Aarɔɔnɩ wondu se ɛpɩsɩ kiɖeɖeu, nɛ pɩsa nɛ ɛlabɩ-m cɔjɔtʋ tʋmɩyɛ.
4 «Wondu tʋnɛ pakaɣ ñɛyʋʋ: laŋɩyɛ taa kabʋa,+ efoodɩ,+ toko kɩtɩnʋʋ ŋgʋ kɩfɛyɩnɩ nɩŋgbɛɛnzɩ yɔ,+ toko kɩɖaɣlʋʋ ŋgʋ kɩ-yɔɔ wɛ tɔlɩm canzɩ tayɩ tayɩ yɔ, ŋgee ñʋʋ kitemuu,+ kɩtamʋʋ;+ pakaɣ ñɛyʋʋ wondu kiɖeɖetu ndʋ ña-ɖalʋ Aarɔɔnɩ nɛ ɛ-pɩyalaa, se pɩsa nɛ ɛlabɩ-m cɔjɔtʋ tʋmɩyɛ.
5 Tʋmlaɖaa mba pɛwɛ niye yɔ pakaɣ labɩnʋʋ tʋmɩyɛ sika, pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, pɩsatʋ kɩsɛɛmtʋ cɩɩɩ, nɛ pɩsatʋ* fɛlɛ fɛlɛ ñɩndʋ.
6 «Pɩwɛɛ se pakpaɣ sika, pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, pɩsatʋ kɩsɛɛmtʋ cɩɩɩ, nɛ pɩsatʋ* fɛlɛ fɛlɛ ñɩndʋ ndʋ pamɩlɩtɩ camɩyɛ yɔ, nɛ palabɩnɩ efoodɩ, nɛ pɩwɛɛ se pacanɩ kɩ-kpɛnzɩ yɔɔ.+
7 Pɩwɛɛ se kɩwɛɛnɩ haŋ 2, weyi patamnɩ hayo kiŋ nɔsɩ naalɛ yɔ.
8 Tambaɖɛ nɖɩ palʋ-ɖɩ kɩlʋʋ yɔ,*+ nɖɩ patam-ɖɩ efoodɩ yɔɔ se kɩcaɣ ki-lone taa camɩyɛ yɔ, pɩwɛɛ se palabɩ-ɖɩ nɛ wondu kʋɖʋmtʋ ndʋ: sika, pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, pɩsatʋ kɩsɛɛmtʋ cɩɩɩ, nɛ pɩsatʋ* fɛlɛ fɛlɛ ñɩndʋ ndʋ pamɩlɩtɩ camɩyɛ yɔ.
9 «Pɩwɛɛ se ŋkpaɣ onikisi pɛɛ+ 2 nɛ ŋma a-yɔɔ Izrayɛɛlɩ pɩyalaa hɩla,+
10 hɩla 6 ɩwɛɛ pɩyɛ kʋɖʋmɖɩyɛ yɔɔ, nɛ hɩla 6 lɛɛna ñɛwɛɛ pɩyɛ lɛɛɖɛ yɔɔ, ŋcɔlɩ-yɛ ɛzɩ palʋlʋʋ-wɛ yɔ.
11 Weyi ɛmaɣ tɔm pɛɛ yɔɔ yɔ, ɛkaɣ maʋ Izrayɛɛlɩ pɩyalaa hɩla pɛɛ ana a-naalɛ a-yɔɔ ɛzɩ pamaɣʋ tɔm tambɔŋ yɔɔ yɔ.+ Pʋwayɩ lɛ, pɩwɛɛ se ŋyele nɛ pasʋzɩ pɛɛ ana sika pɔŋ taa.
12 Pɩwɛɛ se ŋɖʋ pɛɛ ana a-naalɛ efoodɩ haŋ yɔɔ nɛ pɩkɛ Izrayɛɛlɩ pɩyalaa kɩtɔzɩm pɛɛ,+ nɛ pɩwɛɛ se Aarɔɔnɩ ɛwɛɛnɩ hɩla ana haŋ 2 ɛnɩ ɩ-yɔɔ Yehowa ɛsɩndaa nɛ pɩkɛ kɩtɔzɩm pʋyʋ.
13 Pɩwɛɛ se ŋla sika pɔŋ
14 nɛ sika kele kele ñɩŋga kpasɩ 2 nzɩ pamɩlɩtɩ-sɩ ɛzɩ nimaɣ yɔ,+ nɛ pɩwɛɛ se ŋhɔkɩ kpasɩ nzɩ nɛ sika pɔŋ.+
15 «Pɩwɛɛ se ŋyele nɛ wondu kususutu canɩyʋ la tɔm hʋʋ tɛ laŋɩyɛ taa kabʋa.+ Pɩwɛɛ se ɛkpaɣ sika, pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, pɩsatʋ kɩsɛɛmtʋ cɩɩɩ, nɛ pɩsatʋ* fɛlɛ fɛlɛ ñɩndʋ ndʋ pamɩlɩtɩ camɩyɛ yɔ+ nɛ ɛlabɩnɩ-kɛ nɛ kɛwɛɛ ɛzɩ efoodɩ yɔ.
16 Pɩwɛɛ se kɔ-hɔɔlɩŋ 4 tɩŋa ɩwɛɛ kɩmaŋ alɩwaatʋ ndʋ pekpiyiɣ-kɛ nabʋlɛ yɔ, ka-ɖaɣlɩkɩŋ ɛkɛ nandaka kʋɖʋmaɣ,* nɛ ka-walanzɩ kɛ nandaka kʋɖʋmaɣ.
17 Pɩwɛɛ se ŋɖʋ kɔ-yɔɔ pɛɛ, nɛ pɩkɛ pɛɛ canzɩ 4. Kajalaɣ caŋa yɔ: rubii, toopaazɩ, nɛ emeroodi.
18 Caŋa 2 ñɩŋga yɔ: turikuwaazɩ, saafiirɩ, nɛ yaasɩpɩ.
19 Caŋa 3 ñɩŋga yɔ: lesɛm pɩyɛ,* agaatɩ, nɛ ameetiistɩ.
20 Caŋa 4 ñɩŋga yɔ: krizooliitɩ, onikisi, nɛ yaadɩ. Pɩwɛɛ se paɖʋ-yɛ sika pɔŋ taa.
21 Pɛɛ ana akaɣ sɩŋnʋʋ Izrayɛɛlɩ pɩyalaa 12 hɩla. Paa hɩɖɛ nɖɩ lɛ, pɩwɛɛ se pama-ɖɩ ɛzɩ pamaɣʋ tɔm tambɔŋ yɔɔ yɔ, paa hɩɖɛ nɖɩ lɛ ɖɩsɩŋnɩ Izrayɛɛlɩ cejewe 12 taa naɖɩyɛ.
22 «Pɩwɛɛ se ŋkpaɣ sika kele kele ñɩŋga nɛ ŋlabɩnɩ kpasɩ laŋɩyɛ taa kabʋa yɔɔ, palʋʋ-sɩ ɛzɩ nimee yɔ.+
23 Pɩwɛɛ se ŋla laŋɩyɛ taa kabʋa ŋga sika kokoo 2, nɛ ŋta kokoo ana a-naalɛ laŋɩyɛ taa kabʋa kpɛnzɩ 2 yɔɔ.
24 Pɩwɛɛ se ŋtʋʋ sika nimee ana a-naalɛ kokoo 2 wena awɛ laŋɩyɛ taa kabʋa kpɛnzɩ yɔɔ yɔ a-taa.
25 Ŋkaɣ tʋʋ nimee ana a-naalɛ a-nɔsɩ pɔŋ 2 ɛnɩ ɩ-taa, nɛ ŋhɔkɩ-yɛ nɛ efoodɩ haŋ nɛ ɛsɩndaa kiŋ.
26 Pɩwɛɛ se ŋla sika kokoo 2 nɛ ŋɖʋ-yɛ laŋɩyɛ taa kabʋa kpɛnzɩ 2 nzɩ sɩwɛnɩ pɩ-taa kiŋ yɔ sɩ-yɔɔ, efoodɩ yɔɔ kiŋ.+
27 Pɩwɛɛ se ŋtasɩ labʋ sika kokoo 2 efoodɩ ɛsɩndaa, kɩ-haŋ ɛnɩ ɩ-naalɛ ɩ-tɛɛ, nɛ pɩñɔtɩnɩ ɖenɖe patam-kʋ yɔ, efoodɩ tambaɖɛ nɖɩ palʋ-ɖɩ kʋlʋʋ yɔ* ɖɩ-ñʋʋ yɔɔ.+
28 Pɩwɛɛ se nimiye nɖɩ ɖɩwɛ pʋlɔɔ yɔ ɖɩtɩŋ laŋɩyɛ taa kabʋa yɔɔ kokoo taa nɛ ɖiwolo ɖɩtamnɩ efoodɩ yɔɔ kokoo, se pɩsa nɛ laŋɩyɛ taa kabʋa wɛɛ ke-ɖeɖe camɩyɛ. Pɩkaɣ yebu nɛ laŋɩyɛ taa kabʋa wɛɛ ke-ɖeɖe camɩyɛ efoodɩ yɔɔ, tambaɖɛ nɖɩ palʋ-ɖɩ kʋlʋʋ yɔ* ɖɩ-ñʋʋ yɔɔ.
29 «Pɩwɛɛ se Aarɔɔnɩ ɛwɛɛnɩ Izrayɛɛlɩ pɩyalaa hɩla tɔm hʋʋ tɛ laŋɩyɛ taa kabʋa ŋga epuzi ɛ-laŋɩyɛ taa yɔ kɔ-yɔɔ, alɩwaatʋ ndʋ ɛsʋʋ Lone Kiɖeɖeye taa yɔ nɛ pɩkɛ kɩtɔzɩm pʋyʋ tam Yehowa ɛsɩndaa.
30 Ŋkaɣ ɖʋʋ Uriim nɛ Tuumiim*+ tɔm hʋʋ tɛ laŋɩyɛ taa kabʋa taa, nɛ pakaɣ wɛʋ Aarɔɔnɩ laŋɩyɛ taa alɩwaatʋ ndʋ ɛkɔŋ Yehowa ɛsɩndaa yɔ, nɛ pɩwɛɛ se Aarɔɔnɩ ɛwɛɛnɩ Izrayɛɛlɩ mba tɔm hʋʋ wondu ndʋ ɛ-laŋɩyɛ taa Yehowa ɛsɩndaa paa ɛzɩmtaa.
31 «Pɩwɛɛ se ŋkpaɣ pɩsatʋ ndʋ tɩwɛ pʋlɔɔ yɔ ti-ɖeke nɛ ŋlabɩnɩ efoodɩ tɛ toko kɩtɩnʋʋ ŋgʋ kɩfɛyɩnɩ nɩŋgbɛɛnzɩ yɔ.+
32 Pɩwɛɛ se pɔʋ ɛwɛɛ kɩ-hayo kiŋ* hɛkʋ taa. Pɩwɛɛ se pɩsaŋ lʋyʋ ɛñɛyɩ pɔʋ ŋgʋ kɩ-nɔsɩ nɛ pɩcɔɔ pɩta. Pɩwɛɛ se kɩwɛɛ ɛzɩ ñɩɣyʋʋ toko pɔʋ yɔ, se pɩsa nɛ kɩtaacɩyɩ.
33 Pɩwɛɛ se ŋkpaɣ pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, nɛ pɩsatʋ kɩsɛɛmtʋ cɩɩɩ nɛ ŋlabɩnɩ ajana pee nɛ awɛɛ ɛzɩ girenaadɩ pee yɔ nɛ pɩcɔɔ kɩ-nɔɔ hadɛ ñɩŋga nɛ pɩta, nɛ sika agaŋgala wɛɛ a-hɛkɩŋ taa.
34 Pɩwɛɛ se sika ɛgaŋgaɖɛ nɛ girenaadɩ piye pɛlɛdɩ ɖama, sika ɛgaŋgaɖɛ nɛ girenaadɩ piye pɛlɛdɩ ɖama, nɛ pɩcɔɔ toko kɩtɩnʋʋ ŋgʋ kɩfɛyɩnɩ nɩŋgbɛɛnzɩ yɔ kɩ-nɔɔ hadɛ ñɩŋga nɛ pɩta.
35 Pɩwɛɛ se Aarɔɔnɩ esuu-kʋ nɛ pɩsa nɛ ɛpɩzɩ ɛla ɛ-tʋmɩyɛ, nɛ pɩwɛɛ se panɩɩ kɩ-cɩŋgbɩlʋʋ taŋ alɩwaatʋ ndʋ ɛsʋʋ kooka kiɖeɖeɣa taa Yehowa ɛsɩndaa nɛ alɩwaatʋ ndʋ ɛlɩɣ yɔ, nɛ pɩsa nɛ ɛtaasɩ.+
36 «Pɩwɛɛ se ŋkpaɣ sika kele kele ñɩŋga nɛ ŋla wonuu ŋgʋ kɩwɛ tayɩ nɛ kɩñɩlɩsɩɣ yɔ, nɛ ŋma kɩ-yɔɔ tɔm tʋnɛ, ɛzɩ pamaɣʋ tɔm tambɔŋ yɔɔ yɔ: “Yehowa tɩnɩ kele kele wɛtʋ.”+
37 Pɩwɛɛ se ŋkpaɣ nimiye nɖɩ ɖɩwɛ pʋlɔɔ yɔ nɛ ŋhɔkɩ wonuu ŋgʋ ŋgee ñʋʋ kitemuu yɔɔ;+ pɩwɛɛ se kɩwɛɛ ŋgee ñʋʋ kitemuu ɛsɩndaa.
38 Pɩwɛɛ se kɩwɛɛ Aarɔɔnɩ kiɖe taa, nɛ pɩkaɣ kɛnʋʋ Aarɔɔnɩ sʋʋtʋ alɩwaatʋ ndʋ nɔɔyʋ lakɩ kɩwɛɛkɩm wondu kiɖeɖetu yɔɔ yɔ;+ wondu ndʋ Izrayɛɛlɩ mba lɩzɩ-tʋ nɛ hɔɔlʋʋ alɩwaatʋ ndʋ paha-tʋ nɛ tɩkɛ haɖɛ kiɖeɖeye yɔ. Pɩwɛɛ se kɩwɛɛ e-kiɖe taa paa ɛzɩmtaa, se pɩsa nɛ pɔ-tɔm kɛdɩnɩ Yehowa.
39 «Pɩwɛɛ se ŋkpaɣ pɩsatʋ* fɛlɛ fɛlɛ ñɩndʋ nɛ ŋlabɩnɩ toko kɩɖaɣlʋʋ ŋgʋ kɩ-yɔɔ wɛ tɔlɩm canzɩ tayɩ tayɩ yɔ, ŋkpaɣ pɩsatʋ fɛlɛ fɛlɛ ñɩndʋ nɛ ŋlabɩnɩ ŋgee ñʋʋ kitemuu, nɛ kɩtamʋʋ ŋgʋ palʋ-kʋ kɩlʋʋ yɔ.+
40 «Ŋkaɣ labʋ ɖɔɖɔ tokonaa kɩɖaɣlaa, kɩtamɩŋ, nɛ ñʋʋ kitemiŋ Aarɔɔnɩ pɩyalaa,+ nɛ pɩkɛnɩ samtʋ nɛ keɖeɣa.+
41 Ŋkaɣ-tʋ kpaɣʋ nɛ ŋsuu ña-ɖalʋ Aarɔɔnɩ nɛ ɛ-pɩyalaa, nɛ pɩwɛɛ se ŋtaa-wɛ num+ nɛ ŋsɩɩ-wɛ cɔjɔtʋ tʋmɩyɛ taa*+ nɛ ŋpɩsɩ-wɛ kiɖeɖema, nɛ pakaɣ-m cɔjɔtʋ tʋmɩyɛ labʋ.
42 Pɩtasɩ lɛ, ñɛyɩ-wɛ pɩsatʋ* cokodonaa* nɛ pohuuzi pa-ndaakpeɖe yɔɔ.+ Pɩwɛɛ se pa-ɖaɣlɩkɩŋ ɩkpaɣnɩ tɩnaɣ taa nɛ pitii tala yɔɔ.
43 Pɩwɛɛ se Aarɔɔnɩ nɛ ɛ-pɩyalaa pɔtɔɔlɩ-wɛ alɩwaatʋ ndʋ pɔkɔŋ kediɣzaɣ kizinziku tɛɛ, yaa alɩwaatʋ ndʋ pɔñɔtʋʋnɩ altaaru se pala pa-tʋmɩyɛ lone kiɖeɖeye taa yɔ, se pɩsa nɛ pɩtaakɛnɩ-wɛ kɩwɛɛkɩm nɛ pasɩ. Pɩkɛ ɛ nɛ ɛ-lʋlʋʋ taa mba* tamtam paɣtʋ.
Pɩ-tɛɛ tɔm
^ Piye piye, «mba pɛwɛnɩ laŋɩyɛ nɖɩ ɖɩwɛ lɔŋ yɔ.»
^ Yaa «pɩsatʋ ndʋ payaɣ se lɛɛ yɔ.» Lɛɛ kɛ ñɩtʋ ndʋ pahayaɣ-tʋ ɖooo caanaʋ taa nɛ palakɩnɩ-tʋ tʋmɩyɛ nɛ palʋʋnɩ wondu kususutu yɔ.
^ Cɔnɩ kalɩtʋ 5 tɛ pɩ-tɛɛ tɔm.
^ Yaa «Tɩnaɣ taa kɩtamʋʋ.»
^ Cɔnɩ kalɩtʋ 5 tɛ pɩ-tɛɛ tɔm.
^ Cɔnɩ kalɩtʋ 5 tɛ pɩ-tɛɛ tɔm.
^ Yaa «ɛkɛ ampaŋ kʋɖʋmʋʋ.» Ampaŋ kʋɖʋmʋʋ maɣnɩ ɛzɩ santimɛtawaa 22 mbʋ yɔ (santimɛtawaa 22,2). Cɔnɩ Tɔm kɩsɔzɩtʋ B14.
^ Pɩkɛ pɩyɛ kɩbanɖɛ naɖɩyɛ nɖɩ paasɩŋ-ɖɩ ɖeyi ɖeyi yɔ, pɩkɛɣnɩ ambɩrɩ, yaasɛntɩ, opaalɩ, yaa turimaaliini.
^ Yaa «tɩnaɣ taa kɩtamʋʋ.»
^ Yaa «tɩnaɣ taa kɩtamʋʋ.»
^ Cɔnɩ Tɔm pee sɔsɔna tɔbʋʋ lɩzʋʋ.
^ Yaa «ɛwɛɛ ñʋʋ ɖeɖe.»
^ Cɔnɩ kalɩtʋ 5 tɛ pɩ-tɛɛ tɔm.
^ Yaa «nɛ ŋɖʋ pe-nesi tɛɛ ɖoŋ nɛ pisu.»
^ Cɔnɩ kalɩtʋ 5 tɛ pɩ-tɛɛ tɔm.
^ Yaa «pɩ-tɛɛ wondu.»
^ Piye piye, «e-ɖomaɣ.»
