Ejipiti Lɩʋ 23:1-33
23 «Pɩtɩpɔzɩ se ŋyɛlɩnɩ* tɔm ndʋ tɩtɩkɛ toovenim yɔ.+ Taapɩsɩ aseɣɖe tʋ weyi ɛyɔɔdʋʋ lalaa yɔɔ tɔm kɩdɛkɛdɩtʋ yɔ nɛ ŋɖʋ nesi ɛyʋ kɩdɛkɛdʋ.+
2 Pɩtɩpɔzɩ se ŋtɩŋ samaɣ wayɩ nɛ ŋla kɩdɛkɛdɩm, nɛ pɩtɩpɔzɩ se ŋyiɣdi siɣsiɣ wɛtʋ pɩtɩŋnɩ ɛzɩma ŋlɩzɩɣ aseɣɖe se ñɔ-tɔm ɛkɛdɩnɩ samaɣ yɔ pɩ-yɔɔ.
3 Ye tɔm ɛkɔm kʋñɔndʋ nɛ nɔɔyʋ pɛ-hɛkʋ taa yɔ pɩtɩpɔzɩ se ŋhʋʋ tɔm ɛsɩmɩyɛ yɔɔ.+
4 «Ye ŋlɩ ño-koyindu nɔ abalɩñɩnʋ yaa ɛ-kpaŋaɣ yɔɔ keɖiɣni lebu yɔ, pɩwɛɛ se ŋwoni-i kɛ.+
5 Ye ŋna weyi ɛpaɖɩɣ-ŋ yɔ ɛ-kpaŋaɣ tɔlaa nɛ ka-sʋʋtʋ wɛɛ kɔ-yɔɔ yɔ, pɩtɩpɔzɩ se ŋla ɛzɩ ŋtɩna-kɛ yɔ nɛ ŋɖɛɛ. Pɩwɛɛ se ŋsɩnɩ-ɩ nɛ ɩhɛɖɩ kɔ-yɔɔ sʋʋtʋ.+
6 «Pɩtɩpɔzɩ se ŋmuli kʋñɔndʋ weyi ɛwɛ mɩ-hɛkʋ taa yɔ alɩwaatʋ ndʋ ŋhʋʋ ɛ-tɔm yɔ.+
7 «Taaɖʋ ñɔ-nɔɔ cɛtɩm tɔm natʋyʋ taa, nɛ taakʋ weyi ɛtɩla nabʋyʋ yɔ nɛ ɛyʋ siɣsiɣ tʋ, mbʋ pʋyɔɔ yɔ maakaɣ yaʋ ɛyʋ kɩdɛkɛdʋ se ɛyʋ siɣsiɣ tʋ.*+
8 «Taamʋ mulum kʋjɔʋ, mbʋ pʋyɔɔ yɔ, mulum kʋjɔʋ yʋlʋsʋʋ ɛyaa mba panaɣ camɩyɛ yɔ pɛ-ɛsa nɛ kɩpɩzɩɣ nɛ kiyiɣdi ɛyaa siɣsiɣ tɩnaa tɔm.+
9 «Pɩtɩpɔzɩ se ŋla kañatʋ ɛgɔm nɔɔyʋ. Ɩsɩm mbʋ ɛgɔm kɛʋ kɛnaa yɔ,* mbʋ pʋyɔɔ yɔ ɩɩkɛ agɔma Ejipiti ɛjaɖɛ taa.+
10 «Pɩwɛɛ se ŋɖuu ɖomaɣ ñɛ-tɛtʋ yɔɔ nɛ ŋkʋ tɔɔnaɣ pɩnzɩ 6.+
11 Ɛlɛ pɩnaɣ 7 ñɩŋga taa lɛ, pɩtɩpɔzɩ se ŋhayɩ-tʋ, pɩwɛɛ se ŋyele-tʋ nɛ tɩhɛzɩ, nɛ kʋñɔndɩnaa mba pɛwɛ ña-samaɣ taa yɔ pakaɣ tɔɔʋ tɩ-yɔɔ tɔɔnaɣ, nɛ mbʋ pakazɩɣ yɔ, tɛtɛgbɩna wena awɛ ñɩtʋ taa yɔ akaɣ-pʋ tɔɔʋ. Mbʋ pɩwɛɛ se ŋla ñe-viiñi hayɩm nɛ ño-oliivi hayɩm.
12 «Kɩyakɩŋ 6 pɩwɛɛ se ŋla tʋmɩyɛ; ɛlɛ kɩyakʋ 7 ñɩŋgʋ wiye lɛ, pɩwɛɛ se ŋyele tʋmɩyɛ labʋ, nɛ pɩsa nɛ ñɔ-nɔ abalɩñɩnʋ nɛ ña-kpaŋaɣ papɩzɩ nɛ pɛhɛzɩ, nɛ ño-yom halɩñɩnʋ pɩyalʋ nɛ ɛgɔm papɩzɩ nɛ paɖaɣnɩ hiɣu ɖoŋ.+
13 «Pɩwɛɛ se ɩɖɔ tɔm ndʋ payɩ meheyi-mɩ yɔ tɩ-yɔɔ ɖeyi ɖeyi,+ nɛ pɩtɩpɔzɩ se ɩyaa ɛsɔnaa lalaa hɩla; pataanɩɩ hɩla ana ñɔ-nɔɔ taa.+
14 «Pɩwɛɛ se ŋtɔɔ-m kazandʋ tam nabudozo pɩnaɣ taa.+
15 Ŋkaɣ tɔɔʋ Kpɔnɔ ŋgʋ kɩ-taa patɩɖʋ lɔlɔm yɔ kɩ-kazandʋ.+ Ŋkaɣ tɔɔʋ kpɔnɔ ŋgʋ kɩ-taa patɩɖʋ lɔlɔm yɔ kɩyakɩŋ 7, ɛzɩ manɖʋʋ-ŋ paɣtʋ yɔ, alɩwaatʋ ndʋ paɖʋwa yɔ tɩ-yɔɔ Abiib* fenaɣ taa,+ mbʋ pʋyɔɔ yɔ alɩwaatʋ ndʋ ŋlɩ Ejipiti. Nɔɔyʋ ɛtaakɔɔ mɛ-ɛsɩndaa nesi kpɛɖɛ.+
16 Pɩtasɩ lɛ, pɩwɛɛ se ŋtɔɔ ña-hayɩm taa kajalaɣ pee wena apɩwa yɔ a-Kʋmtʋ Kazandʋ;*+ nɛ Tɔɔnaɣ Kpeɣluu Kazandʋ* pɩnaɣ ɖɩdɛnɖɛ, alɩwaatʋ ndʋ ŋkpeɣliɣ mbʋ ŋhiɣ hayɩm taa ña-tʋma taa yɔ.+
17 Tam nabudozo pɩnaɣ taa lɛ, pɩwɛɛ se ña-abalaa kpeekpe iwolo Kɩbaɣlʋ toovenim tʋ Yehowa ɛsɩndaa.+
18 «Pɩtɩpɔzɩ se ŋkpaɣ man-kɩlaʋ calɩm nɛ ŋkpɛndɩnɩ mbʋ pɩ-taa paɖʋ lɔlɔm yɔ nɛ ŋlaa. Nɛ kɩlaʋ kpɩnɛ num mbʋ palaɣ man-kazandʋ kɩyakɩŋ yɔɔ yɔ, pɩtɩpɔzɩ se pasɩɩ-pʋ ɖoo tɩŋa nɛ pɩkɔɔ nɛ pɩñandɩ.
19 «Kajalaɣ pee wena ñɛ-tɛtʋ lʋlʋʋ yɔ, pɩwɛɛ se ŋkɔnɩ a-taa wena akpaɖɩ ɖeu yɔ ñɛ-Ɛsɔ Yehowa ɖɩɣa taa.+
«Pɩfɛyɩ se ŋtɩzɩ mbeɣa ko-ɖoo hɩlɩm taa.+
20 «Mentiyiɣ tiyiyu nɔɔyʋ nɛ ɛɖɛɛ ñɔ-nɔɔ+ nɛ ɛkandɩyɩ ñɔ-yɔɔ nʋmɔʋ taa nɛ ewoni-ŋ lone nɖɩ mɔñɔɔzaa yɔ ɖɩ-taa.+
21 Welisini-i camɩyɛ, nɛ ŋña ɛ-nɔɔ taa tɔm. Taakaɖɩnɩ-ɩ mbʋ pʋyɔɔ yɔ ɛɛkaɣ kpeɣu mɩ-kɩwɛɛkɩm,+ mbʋ pʋyɔɔ yɔ ma-hɩɖɛ wɛ ɛ-yɔɔ.
22 Ɛlɛ ye ŋñaŋ ɛ-nɔɔ taa tɔm ɖeyi ɖeyi nɛ ŋlakɩ mbʋ payɩ meheyiɣ-ŋ yɔ, mankaɣ paɖʋʋ ño-koyindinaa nɛ mankaɖɩnɩ mba pakaɖɩɣnɩ-ŋ yɔ.
23 Mbʋ pʋyɔɔ yɔ men-tiyiyu kaɣ ɖɛʋ ñɔ-nɔɔ, nɛ ɛkaɣ-ŋ wonuu Amoori mba, Hɛɛtɩ mba, Perizi mba, Kanaŋ mba, Hivi mba, nɛ Yebuusi mba tɛ, nɛ mankaɣ-wɛ ɖɩzʋʋ.+
24 Pɩtɩpɔzɩ se ŋluŋ pɛ-ɛsɔnaa tɛɛ yaa pepeɣzi-ŋ nɛ ŋsɛɛ-wɛ, nɛ pɩtɩpɔzɩ se ŋmaɣzɩnɩ pa-lakasɩ.+ Ɛlɛ pɩwɛɛ se ŋɖɩzɩ-wɛ nɛ ŋyɔkɩ pe-tilima kiɖeɖena.+
25 Pɩwɛɛ se ɩsɛɛ Yehowa mɩ-Ɛsɔ,+ nɛ ɛkaɣ wazʋʋ ñɔ-tɔɔnaɣ nɛ ña-lɩm yɔɔ.+ Mankaɣ ɖɔɔnʋʋ kʋdɔŋ ñɛ-tɛ.+
26 Ñɛ-ɛjaɖɛ taa halaa hosi ɩɩkaɣ wɛɛkʋʋ yaa paakaɣ kɛʋ kaalʋlɩsɩ,+ nɛ mankaɣ-ŋ haʋ wezuu ɖaɣlɩkɩŋ kpeekpe.*
27 «Nɛ mankaɣ ɖɛzʋʋ sɔɔndʋ ndʋ peseɣ-m yɔ ñɔ-nɔɔ,+ nɛ mankaɣ yebu nɛ pisidi samasɩ nzɩ payɩ ŋkatɩɣ yɔ sɩ-taa, nɛ mankaɣ yebu nɛ ño-koyindinaa tɩŋa se ñɛ-ɛsɩndaa.*+
28 Mankaɣ ɖɛzʋʋ laŋwɛɛkɩyɛ* ñɔ-nɔɔ,+ nɛ ɖɩkaɣ ɖɔɔnʋʋ Hivi mba, Kanaŋ mba, nɛ Hɛɛtɩ mba ñɛ-ɛsɩndaa.+
29 Maakaɣ-wɛ ɖɔɔnʋʋ ñɛ-ɛsɩndaa pɩnaɣ kʋɖʋmaɣ taa, se pɩtaala nɛ ɛjaɖɛ nɖɩ ɖɩpɩsɩ njɛyɛ nɛ ñɩtʋ taa kpɩna ɖɔɔ nɛ alabɩ-ŋ kɩdɛkɛdɩm.+
30 Mankaɣ-wɛ ɖɔɔnʋʋ ñɛ-ɛsɩndaa pazɩ pazɩ, pɩkɔɔ pɩsɩɩnɩ alɩwaatʋ ndʋ ŋhuwaa nɛ ŋmʋ ɛjaɖɛ nɖɩ yɔ.+
31 «Mankaɣ ɖʋʋ ña-kamaɣ kpaɣnɩ Teŋgu Kɩsɛɛmʋʋ nɛ piwolo Filistii mba teŋgu, nɛ kpaɣnɩ kañɩmbusuu nɛ piwolo Pɔɔ;*+ mbʋ pʋyɔɔ yɔ mankaɣ ɛjaɖɛ nɖɩ ɖɩ-taa mba ɖʋzʋʋ ñe-nesi taa, nɛ ŋkaɣ-wɛ ɖɔɔnʋʋ ñɛ-ɛsɩndaa.+
32 Pɩtɩpɔzɩ se ña nɛ wɛ yaa ña nɛ pɛ-ɛsɔnaa ɩɖʋ ɛgbɛyɛ.+
33 Pɩtɩpɔzɩ se pɛwɛɛ ñɛ-ɛjaɖɛ taa, se pɩtaala nɛ potuyi-ŋ nɛ ŋyʋsɩnɩ-m. Ye ŋsɛɣ pɛ-ɛsɔnaa kɔyɔ, pɩtʋʋ fɛyɩ se pɩkaɣ-ŋ pɩsʋʋ kpaca.»+
Pɩ-tɛɛ tɔm
^ Piye piye, «ŋyɔɔdɩ.»
^ Yaa «maakaɣ ɛyʋ kɩdɛkɛdʋ haʋ toovenim.»
^ Yaa «Ɩsɩm ɛgɔm wezuu caɣʋ (kalɩzaɣ).»
^ Cɔnɩ Tɔm kɩsɔzɩtʋ B15.
^ Payaɣ-tʋ ɖɔɖɔ se Kpɩtaŋ Kazandʋ, yaa Pantekooti.
^ Payaɣ-tʋ ɖɔɖɔ se Coka (Kizinzikiŋ) Kazandʋ.
^ Yaa «mankaɣ yebu nɛ ña-kɩyakɩŋ yozi.»
^ Yaa «ño-koyindinaa tɩŋa ha-ŋ siɣye nɛ pakpaɣ seya.»
^ Pɩpɩzɩɣ pɩkɛ, «sɔɔndʋ; sɔɔndʋ sɔsɔtʋ.»
^ Pʋ-tɔbʋʋ se Efraatɩ.
