Samɩyɛɛlɩ takayaɣ naalɛ ñɩŋga 20:1-26
20 Ɛyʋ ñaɖʋʋ tʋ nɔɔyʋ kaawɛɛ nɛ payaɣ-ɩ se Seeba,+ Bikirii pɩyalʋ, Bɛnjamɛɛ tʋ. Ɛhʋlɩ nɔndɔʋ+ nɛ ɛyɔɔdɩ se: «Ða nɛ Daviid ɖɩtɩkaa nabʋyʋ, nɛ ɖɩfɛyɩnɩ ñɩm nabʋyʋ Yesee pɩyalʋ cɔlɔ.+ Paa weyi ɛpɩsɩ ɛ-ɛsɔnaa* cɔlɔ, Oo Izrayɛɛlɩ!»+
2 Peeɖe Izrayɛɛlɩ ɛyaa kpeekpe yebi Daviid wayɩ tɩŋʋʋ nɛ patɩŋ Bikirii pɩyalʋ Seeba wayɩ;+ ɛlɛ Yuuda ñɩma ñɔñɔɔnɩ pe-wiyaʋ kpam, kpaɣnɩ Yɔɔrdaŋ nɛ piwolo Yeruzalɛm.+
3 Wiyaʋ Daviid talɩ ɛ-ɖɩɣa taa Yeruzalɛm lɛ,+ ɛkpaɣ ɖaŋnaa 10 mba eeyebini wayɩ se pɔcɔnɩ ɖɩɣa yɔɔ yɔ+ nɛ ɛsɩɩ-wɛ ɖɩɣa nakɛyɛ taa nɛ paɖaŋ pɔ-yɔɔ. Ɛhaɣaɣ-wɛ tɔɔnaɣ, ɛlɛ ɛtɩsʋʋnɩ-wɛ.+ Pacaɣ ɖɩɣa ŋga ka-taa nɛ paaɖaŋ pɔ-yɔɔ se pataalɩɩ nɛ pɩkɔɔ nɛ pɩsɩɩnɩ pa-sɩm wiye; paawɛ ɛzɩ lelaa yɔ, ŋgʋ pa-walʋ kaawɛnɩ ɛ-ɛsa.
4 Nɛ wiyaʋ heyi Amazaa se:+ «Yaa Yuuda ɛyaa kpeekpe nɛ pɔkɔɔ mɔn-cɔlɔ kɩyakɩŋ 3 taa, nɛ pɩwɛɛ se ña ɖɔɖɔ ŋwɛɛ.»
5 Peeɖe Amazaa woba se ɛyaa Yuuda kpeekpe, ɛlɛ ɛtɩpɩsɩ nɛ ɛkɔɔ alɩwaatʋ ndʋ tɩ-yɔɔ paaɖʋ-ɩ yɔ.
6 Nɛ Daviid heyi Abisayii+ se: «Bikirii pɩyalʋ Seeba+ pɩzɩɣ nɛ ɛlabɩ-ɖʋ kɩdɛkɛdɩm nɛ pɩkpaɖɩ ɛzɩ Absalɔm kaalabʋ-ɖʋ yɔ.+ Kpaɣ ña-kɩbaɣlʋ lɩmɖʋyaa nɛ ŋɖʋ ɛ-wayɩ, pɩsa nɛ ɛtaasʋʋ tɛtʋ ɖoŋ ñɩndʋ taa nɛ ɛlɩɩ ɖe-nesi tɛɛ.»
7 Nɛ Yowaabʋ+ ɛyaa, Kereti mba, Peleti mba,+ nɛ ɛyaa ɖoŋ tɩnaa tɩŋa lɩɩ nɛ paɖʋ ɛ-wayɩ; pakʋyɩ Yeruzalɛm nɛ paɖʋ Bikirii pɩyalʋ Seeba wayɩ.
8 Pɔñɔtɩnɩ kaaʋ sɔsɔʋ ŋgʋ kɩwɛ Gabawɔɔ+ yɔ lɛ, Amazaa+ kɔɔ se ɛkatɩ-wɛ. Yowaabʋ kaasu e-you wondu, nɛ ɛta laɣɖɛ nɖɩ ɖɩwɛ ɖi-huyuu taa yɔ ɛ-tɩnaɣ taa. Ɛɖɔm nɛ ɛñɔtɩnɩ-ɩ lɛ, laɣɖɛ tɔlɩ.
9 Yowaabʋ pɔzɩ Amazaa se: «Pɩtɩŋa pɩɖɔŋ camɩyɛ na, mon-koobu?» Nɛ Yowaabʋ sezi e-nesi kɩbanzɩ nɛ ɛɖɔkɩ Amazaa tandaʋ nɛ pɩwɛɛ ɛzɩ ɛcaɣ mʋzʋʋ ɛ-lɩkpaɣzaɣ yɔɔ yɔ.
10 Amazaa tɩkpa ɛ-tɩ nɛ laɣɖɛ nɖɩ ɖɩɩwɛ Yowaabʋ nesi taa yɔ, nɛ Yowaabʋ sɔ laɣɖɛ nɖɩ e-lotu taa,+ nɛ ɛ-taa lotu lɩɩ nɛ tɩkaa tataa. Yowaabʋ tɩtasɩ-ɩ sɔbʋ; ɛsɔbɩ-ɩ tam kʋɖʋm nɛ ɛkʋ-ɩ kpaagbaa. Nɛ Yowaabʋ nɛ ɛ-ɖalʋ Abisayii paɖʋ Bikirii pɩyalʋ Seeba wayɩ.
11 Yowaabʋ evebiya taa nɔɔyʋ sɩŋ ɛ-cɔlɔ nɛ ɛyɔɔdɩ se: «Weyi ɛwɛ Yowaabʋ hɔɔlʋʋ yɔɔ, nɛ weyi ɛkɛ Daviid ɛyʋ yɔ, ɛtɩŋ Yowaabʋ!»
12 Alɩwaatʋ ndʋ lɛ, Amazaa kaawɛɛ nɛ epilimiɣ ɛ-calɩm taa habɩyɛ hɛkʋ taa. Evebu ɛnʋ ɛnawa se ɛyaa tɩŋa sɩŋaɣ lɛ, ɛkʋsɩ Amazaa habɩyɛ yɔɔ nɛ ɛkɛzɩ-ɩ ñɩtʋ taa. Nɛ ehuuzi ɛ-yɔɔ pɩsaʋ nakʋyʋ, mbʋ pʋyɔɔ yɔ ɛnawa se paa weyi ɛtalɩɣ ɛ-cɔlɔ lɛ ɛsɩŋɩɣ.
13 Ɛtɛm Amazaa kʋsʋʋ habɩyɛ yɔɔ lɛ, ɛyaa tɩŋa tɩŋ Yowaabʋ wayɩ se paɖʋ Bikirii pɩyalʋ Seeba+ wayɩ.
14 Seeba tɩŋ Izrayɛɛlɩ cejewe kpeekpe taa nɛ ɛtalɩ Aabɛɛlɩ ŋgʋ kɩwɛ Bɛtɩ-Maaka+ yɔ kɩ-taa. Bikirii mba kpeɣli ɖama nɛ patɩŋ ɛ-wayɩ ɖɔɖɔ.
15 Yowaabʋ nɛ ɛ-ɛyaa pɔkɔɔ nɛ pɛñɛyɩ Seeba Aabɛɛlɩ ŋgʋ kɩwɛ Bɛtɩ-Maaka yɔ kɩ-taa nɛ pesiɣ you wondu nɛ pɩcɔɔ tɛtʋ nɛ pɩta, mbʋ pʋyɔɔ yɔ paacɔzɩ tɛtʋ ndʋ koloŋa. Nɛ ɛyaa mba payɩ paawɛ Yowaabʋ cɔlɔ yɔ pɛwɛɛ nɛ pohuyuu koloŋa tɛɛ se kɔtɔlɩ.
16 Nɛ halʋ lɔŋsɩnɖʋ nɔɔyʋ ma kubuka nɛ tɛtʋ taa se: «Iwelisi, ɛyaa mɩ, iwelisi! Mentendi-mɩ, iheyi Yowaabʋ se: “Kɔɔ cɩnɛ nɛ mɔyɔɔdɩnɩ-ŋ.”»
17 Nɛ Yowaabʋ wolo nɛ ɛñɔtɩnɩ halʋ ɛnʋ, nɛ halʋ pɔzɩ-ɩ se: «Ña payaɣ se Yowaabʋ?» Ecosi se: «Ɛɛɛ ma.» Peeɖe halʋ heyi-i se: «Welisi ña-lɩmɖʋyʋ tɔm.» Yowaabʋ yɔɔdɩ se: «Menɖiɣni welisuu.»
18 Halʋ wolo pɩ-yɔɔ se: «Pɔyɔɔdaɣ caanaʋ taa se: “Powolo Aabɛɛlɩ taa nɛ pɔpɔzɩ, nɛ tɔm ñɔɔzɩ.”
19 Mansɩŋnɩ Izrayɛɛlɩ taa laŋhɛzɩyɛ tɩnaa nɛ siɣsiɣ tɩnaa. Ŋwɛɛ nɛ ŋñɩnɩɣ se ŋyɔkɩ tɛtʋ ndʋ tɩwɛ ɛzɩ ɖoyo nɔɔyʋ yɔ Izrayɛɛlɩ taa. Ɛbɛ yɔɔ pɩpɔzʋʋ se ŋɖɩzɩ* Yehowa ñɩm?»+
20 Yowaabʋ cosi se: «Maapɩzɩɣ nɛ mɔyɔkɩ-pʋ nɛ manɖɩzɩ-pʋ kpa.
21 Aayɩ, pɩtɩkɛ mbʋ. Ɛlɛ Bikirii weyi ɛ-tɛ wɛ Efrayim pʋŋ egeetiye taa+ yɔ, ɛ-pɩyalʋ weyi payaɣ se Seeba+ yɔ, ɛkaɖɩnɩ Wiyaʋ Daviid.* Ye ɩɖʋzɩ e-ɖeke me-nesi tɛɛ yɔ mankaɣ ɖɛʋ.» Nɛ halʋ heyi Yowaabʋ se: «Na! Pakaɣ-ŋ lɔʋ ɛ-ñʋʋ nɛ koloŋa wayɩ!»
22 Kpaagbaa mbʋ lɛ, halʋ lɔŋsɩnɖʋ ɛnʋ ɛsʋʋ tɛtʋ taa samaɣ kpeekpe cɔlɔ, nɛ pɛsɛtɩ Bikirii pɩyalʋ Seeba ñʋʋ nɛ pɔlɔ-kʋ Yowaabʋ. Peeɖe ɛlɛ hʋlɩ nɔndɔʋ, nɛ peyele tɛtʋ nɛ pamɩzɩ ɖama, nɛ paa weyi lɛ ɛpɩsɩ ɛ-ɖɩɣa taa;+ nɛ Yowaabʋ ñapɩsɩ Yeruzalɛm, wiyaʋ cɔlɔ.
23 Yowaabʋ kaakɛnɩ Izrayɛɛlɩ sɔɔjanaa kpeekpe ñʋʋdʋ;+ Yehoyiyada+ pɩyalʋ Benayaa+ kaakɛ Kereti mba nɛ Peleti mba+ pa-ñʋʋdʋ.
24 Adoram+ kaakɛ mba paɖʋwaɣ-wɛ kɩjɛyʋʋ tʋma yɔ pa-ñʋʋdʋ; Ahiluudɩ pɩyalʋ Yozafaatɩ+ ñaakɛ tɔm ndʋ tɩlakɩ yɔ tɩ-mayʋ.
25 Seva kaakɛ takayaɣ taa mayʋ; Sadɔɔkɩ+ nɛ Abiyaataarɩ+ paakɛ cɔjɔnaa.
26 Nɛ Yayiirɩ tʋ Ira ɖɔɖɔ pɩsɩ Daviid tʋmlaɖaa ñʋʋdʋ sɔsɔ.*
Pɩ-tɛɛ tɔm
^ Pɩpɩzɩɣ pɩkɛ, «e-kizinzikiŋ.»
^ Piye piye, «ŋli.»
^ Piye piye, «ɛkpazɩ nesi Wiyaʋ Daviid yɔɔ.»
^ Piye piye, «pɩsɩ Daviid cɔjɔ.»
