Kroniiki takayaɣ kajalaɣ ñɩŋga 21:1-30
21 Nɛ Sataŋ* kʋyɩ nɛ ɛkaɖɩnɩ Izrayɛɛlɩ nɛ eseɣti Daviid se ɛkalɩ Izrayɛɛlɩ ɛyaa ñʋʋ.+
2 Peeɖe Daviid heyi Yowaabʋ+ nɛ samaɣ ñʋndɩnaa se: «Iwolo nɛ ɩkalɩ Izrayɛɛlɩ, kpaɣnɩ Beyɛɛrɩ-Seeba nɛ piwolo Daanɩ;+ pʋwayɩ lɛ ɩkɔɔ nɛ iheyi-m, se pɩsa nɛ mantɩlɩ pa-ñʋʋ.»
3 Ɛlɛ Yowaabʋ yɔɔdɩ se: «Yehowa eyele nɛ ɛ-samaɣ huu tam 100! Man-kɩbaɣlʋ wiyaʋ, pa-tɩŋa payɩ patɩtɛ kɛʋ man-kɩbaɣlʋ lɩmɖʋyaa yaa we? Ɛbɛ yɔɔ man-kɩbaɣlʋ ñɩnɩɣ se ɛla mbʋ? Ɛbɛ yɔɔ pɩwɛɛ se ɛpɩsɩ mbʋ piyeki se Izrayɛɛlɩ ɛɖɔɔ wɛɛ yɔ?»
4 Ɛlɛ wiyaʋ tɔm wa Yowaabʋ ñɩndʋ. Peeɖe Yowaabʋ lɩwa nɛ ɛcɔɔ Izrayɛɛlɩ kpeekpe taa, pʋwayɩ lɛ ɛpɩsɩ nɛ ɛkɔɔ Yeruzalɛm.+
5 Nɛ Yowaabʋ cɛlɩ Daviid ɛyaa mba pakalɩ-wɛ nɛ pama takayaɣ taa yɔ pa-ñʋʋ. Izrayɛɛlɩ taa abalaa mba pɔɖɔkʋʋ laɣla yɔ pa-tɩŋa pɛkpɛndɩ 1 100 000, nɛ Yuuda taa abalaa mba pɔɖɔkʋʋ laɣla yɔ pɛkpɛndɩ 470 000.+
6 Ɛlɛ patɩkalɩ Leevi nɛ Bɛnjamɛɛ ñɩma pa-taa,+ mbʋ pʋyɔɔ yɔ tɔm ndʋ wiyaʋ yɔɔdaa yɔ, tɩtaakɛdɩnɩ Yowaabʋ.+
7 Nɛ pɩtaakɛdɩnɩ Ɛsɔ toovenim tʋ paa ññɩɩ, pʋyɔɔ ɛhɔm Izrayɛɛlɩ nɩŋgbaŋʋʋ.
8 Nɛ Daviid heyi Ɛsɔ toovenim tʋ se: «Pɩkɛnɩ-m kɩwɛɛkɩm+ sɔsɔm se malabɩ lakasɩ nzɩ. Nɛ lɛɛlɛɛyɔ lɛ, mentendi-ŋ, kpaɣ ña-lɩmɖʋyʋ kɩwɛɛkɩm nɛ ŋkpeɣ-i,+ mbʋ pʋyɔɔ yɔ malabɩ kɩmɛlɛndʋ siŋŋ.»+
9 Nɛ Yehowa yɔɔdɩnɩ Gaadɩ,+ Daviid tɛ ɛyʋ weyi ɛnaɣ natʋ yɔ nɛ eheyi-i se:
10 «Wolo nɛ ŋheyi Daviid se: “Tɔm tʋnɛ Yehowa yɔɔdʋʋ: ‘Manɖʋʋ pʋnɛ pɩ-naadozo ñɛ-ɛsɩndaa. Lɩzɩ pɩ-taa kʋɖʋm nɛ mɔnkɔnɩ-pʋ ñɔ-yɔɔ.’”»
11 Nɛ Gaadɩ sʋʋ Daviid cɔlɔ nɛ eheyi-i se: «Tɔm tʋnɛ Yehowa yɔɔdʋʋ: “Lɩzɩ:
12 Ŋsɔɔlaa se ñɔɔsɩ ɛlɩɩ pɩnzɩ 3?+ Yaa ŋsɔɔlaa se mba pakaɖɩɣnɩ-ŋ yɔ pawabɩ-ŋ fenasɩ 3 nɛ alɩwaatʋ ndʋ tɩ-taa lɛ ño-koyindinaa laɣɖɛ hiɣ-ŋ?+ Yaa ŋsɔɔlaa se Yehowa tiyiyu ɛtɩŋnɩ Yehowa laɣɖɛ yɔɔ nɛ ɛkɔnɩ kɩzɩkʋ Izrayɛɛlɩ egeetiye kpeekpe taa kɩyakɩŋ 3 nɛ piyele nɛ ɛyaa sakɩyɛ sɩ+ ɛjaɖɛ taa?”+ Lɛɛlɛɛyɔ lɛ, maɣzɩ nɛ ŋheyi-m tɔm ndʋ pɩwɛɛ se mowolo nɛ meheyi Weyi etiyi-m yɔ.»
13 Peeɖe Daviid cosi Gaadɩ se: «Mɛwɛ laŋwɛɛkɩyɛ taa siŋŋ. Mentendi-ŋ, yele nɛ mɔntɔlɩ Yehowa nesi tɛɛ, mbʋ pʋyɔɔ yɔ ɛ-pʋtɔdɩyɛ naʋ paɣlɩ siŋŋ;+ ɛlɛ taayele nɛ mɔntɔlɩ ɛyʋ nesi tɛɛ.»+
14 Nɛ Yehowa tiyini ɛyaa kɩzɩkʋ+ Izrayɛɛlɩ yɔɔ, nɛ ɛyaa 70 000 sɩ Izrayɛɛlɩ taa.+
15 Pɩtasɩ lɛ, Ɛsɔ toovenim tʋ tiyi tiyiyu nɔɔyʋ Yeruzalɛm se ɛɖɩzɩ-kʋ; ɛlɛ ɛcaɣaɣ labʋ mbʋ lɛ, Yehowa na nɛ ekpiɖi* asɛyʋʋ ŋgʋ kɩ-yɔɔ,+ nɛ eheyi tiyiyu weyi ɛwɛɛ nɛ ɛkɔŋnɩ ɖɩzʋʋ yɔ se: «Pɩmaɣ mbʋ!+ Lɛɛlɛɛyɔ lɛ, tisi ñe-nesi.» Yehowa tiyiyu kaasɩŋaa nɛ ɛñɔtɩnɩ Yebuusi tʋ+ Orɩnaanɩ tɔɔnaɣ ɖɩmaɖɛ kadaɣ.+
16 Daviid kpazɩ ɛ-ɛsa lɛ, ɛna Yehowa tiyiyu sɩŋ tɛtʋ nɛ ɛsɔdaa pɛ-hɛkʋ taa, ɛkpɛ laɣɖɛ+ nɛ ɛɖɔkɩ e-nesi taa nɛ eposi-sɩ nɛ Yeruzalɛm yɔɔ kiŋ. Daviid nɛ ɛzʋtʋyaa pacaŋ poluŋ nɛ papa pɛ-ɛsa nɛ tɛtʋ,+ paahuuzi pɔ-yɔɔ fɔlɔtɔnaa.+
17 Daviid heyi Ɛsɔ toovenim tʋ se: «Pɩtɩkɛ mɔyɔɔdɩna se pakalɩ samaɣ na? Malabɩnɩ kɩwɛɛkɩm, nɛ malabɩnɩ mbʋ pɩfɛyɩ ɖeu yɔ;+ ɛlɛ heŋ ɛnɛ yɔ, ɛbɛ ɩlaba? Hayɩ mɛ-Ɛsɔ Yehowa, mentendi-ŋ, yele nɛ ñe-nesi kɔɔ mɔ-yɔɔ nɛ man-caa ɖɩɣa yɔɔ; ɛlɛ taakɔnɩ asɛyʋʋ kʋnɛ ña-samaɣ yɔɔ.»+
18 Nɛ Yehowa tiyiyu heyi Gaadɩ+ se eheyi Daviid se ɛkpa nɛ ɛma Yehowa altaaru Yebuusi tʋ Orɩnaanɩ tɔɔnaɣ ɖɩmaɖɛ kadaɣ taa.+
19 Nɛ Daviid kʋyɩ nɛ ɛkpa ɛzɩ Gaadɩ yɔɔdʋʋ yɔ, tɔm ndʋ ɛyɔɔdɩ Yehowa hɩɖɛ taa yɔ.
20 Alɩwaatʋ ndʋ lɛ, Orɩnaanɩ kisi nɛ ɛna tiyiyu, nɛ ɛ-pɩyalaa 4 mba paawɛ ɛ-cɔlɔ yɔ pɛmɛlɩ. Orɩnaanɩ kaawɛɛ nɛ ɛmakɩ blee.
21 Daviid kpa Orɩnaanɩ cɔlɔ lɛ, ɛlɛ cɔna nɛ ɛna Daviid, nɛ ɛcaŋ ɛlɩɩnɩ tɔɔnaɣ ɖɩmaɖɛ kadaɣ taa nɛ eluŋ Daviid tɛɛ nɛ ɛpa ɛ-ɛsa nɛ tɛtʋ.
22 Daviid heyi Orɩnaanɩ se: «Pɛdɩnɩ-m* tɔɔnaɣ ɖɩmaɖɛ kadaɣ, nɛ mama Yehowa altaaru ka-taa. Pɛdɩnɩ-m kɛ liidiye nɖɩ pɩpɔzʋʋ yɔ, nɛ pɩsa nɛ asɛyʋʋ ŋgʋ kɩkɔm samaɣ yɔɔ yɔ kɩsɩŋ.»+
23 Ɛlɛ Orɩnaanɩ kitini Daviid se: «Kpaɣ-kɛ nɛ kapɩsɩ ña-ñɩŋga, nɛ man-kɩbaɣlʋ wiyaʋ ɛla mbʋ ɛsɔɔlaa yɔ.* Na, mɛncɛlɩɣ-ŋ naŋ nɛ ŋlaanɩ kɩlaŋ kɩñaɣzɩŋ, nɛ kɛɛkɛɛ ŋgʋ pamakɩnɩ tɔɔnaɣ yɔ kɩ-ɖaŋ+ nɛ pɩkɛ ɖasɩ, nɛ blee nɛ pɩkɛ tɔɔnaɣ pee kɩlaʋ. Mahaɣ pɩtɩŋa payɩ mbʋ yɔ.»
24 Ɛlɛ Wiyaʋ Daviid heyi Orɩnaanɩ se: «Aayɩ, pɩwɛɛ se mayabɩ-kɛ nɛ liidiye nɖɩ pɩpɔzʋʋ yɔ, mbʋ pʋyɔɔ yɔ maakaɣ kpaɣʋ mbʋ pɩkɛ ña-pʋyʋ yɔ nɛ maha-pʋ Yehowa, yaa malaa kɩlaŋ kɩñaɣzɩŋ weyi mantɩhɛyɩ nabʋyʋ ɩ-yɔɔ yɔ.»+
25 Nɛ Daviid maɣzɩ sika siklinaa* 600 nɛ ɛcɛlɩ Orɩnaanɩ tɔɔnaɣ ɖɩmaɖɛ kadaɣ ŋga kɔ-yɔɔ.
26 Nɛ Daviid ma Yehowa altaaru nakʋyʋ+ peeɖe nɛ ɛlaa kɩlaŋ kɩñaɣzɩŋ nɛ laŋhɛzɩyɛ kɩlaŋ; nɛ ɛyaa Yehowa, nɛ ɛlɛ cosi-i nɛ eyele nɛ miŋ+ lɩɩnɩ ɛsɔdaa nɛ itii kɩlaʋ kɩñaɣzʋʋ altaaru yɔɔ.
27 Nɛ Yehowa heyi tiyiyu+ se ɛpɩsɩnɩ ɛ-laɣɖɛ ɖi-huyuu taa.
28 Alɩwaatʋ ndʋ tɩ-taa, Daviid nawa se Yehowa cosi-i Yebuusi tʋ Orɩnaanɩ tɔɔnaɣ ɖɩmaɖɛ kadaɣ taa lɛ, ewolo pɩ-yɔɔ nɛ ɛlaɣ kɩlaŋ peeɖe.
29 Paa mbʋ yɔ, Yehowa Ɛsɔ sɛtʋ kɩɖanɖʋʋ ŋgʋ Moyizi kaalabɩ kañɩmbusuu taa yɔ nɛ kɩlaʋ kɩñaɣzʋʋ altaaru, paawɛ lone kʋkʋyɩyɛ taa Gabawɔɔ alɩwaatʋ ndʋ tɩ-taa.+
30 Ɛlɛ Daviid taapɩzɩɣ se ewolo kɩ-ɛsɩndaa nɛ ɛpɔzɩ nɛ ɛtɩlɩ Ɛsɔ lɩmaɣza, mbʋ pʋyɔɔ yɔ sɔɔndʋ kaakpa-ɩ siŋŋ nɛ Yehowa tiyiyu laɣɖɛ.
Pɩ-tɛɛ tɔm
^ Pɩpɩzɩɣ pɩkɛ, «koyindu.»
^ Yaa «ɛcaɣ kʋñɔwiye.»
^ Piye piye, «Ha-m.»
^ Piye piye, «mbʋ pɩwɛ ɖeu ɛ-ɛsɩndaa yɔ.»
^ Sikli kʋɖʋmʋʋ maɣnɩ ɛzɩ kɩɖamnaa 11 nɛ hɔɔlʋʋ mbʋ yɔ (kɩɖamnaa 11,4). Cɔnɩ Tɔm kɩsɔzɩtʋ B14.
