Kroniiki takayaɣ kajalaɣ ñɩŋga 12:1-40
-
Mba paɖʋ nesi Daviid kewiyitu yɔ (1-40)
12 Abalaa panɛ pɔkɔmnɩ Daviid cɔlɔ Zikɩlaagɩ+ alɩwaatʋ ndʋ ɛtaapɩzɩɣ se ɛlɩɩ yem kaalɛyɩtʋ, Kiisi pɩyalʋ Sɔɔlɩ+ yɔɔ yɔ; nɛ paawɛ sɔdɩŋ ɖoŋ tɩnaa mba paɖʋ-ɩ nesi you taa yɔ pa-taa.+
2 Pɔɖɔkaɣ tɔŋ, nɛ papɩzaɣ se pɔtɔ pɛɛ nɛ pʋtɔɖɛ+ yaa paɖʋ ñɩma tɔʋ taa nɛ pɔtɔnɩ nesi kɩbanzɩ yaa nɩmɩyɛ.+ Paakɛ Sɔɔlɩ koobiya, palɩnɩ Bɛnjamɛɛ cejewiye taa.+
3 Ahiyezɛɛrɩ kaakɛnɩ ñʋʋdʋ, ɛ-wayɩ lɛ Yowaasɩ, pa-naalɛ paakɛ Gibeyaa tʋ+ Semaa pɩyalaa; Azɩmavɛɛtɩ+ pɩyalaa Yeziyɛɛlɩ nɛ Pelɛɛtɩ, Beraka, Anatɔɔtɩ tʋ Yehu,
4 Gabawɔɔ tʋ+ Isimaya, ɛɛkɛ sɔdʋʋ ɖoŋ tʋ ɛyaa 30 waa taa+ nɛ ɛɛwɛ ɛyaa 30 waa mba pa-ñʋʋ yɔɔ; pɩtasɩnɩ Yereemii, Yahaziyɛɛlɩ, Yohanaanɩ, Gedera tʋ Yozabaadɩ,
5 Eluuzayɩ, Yerimɔɔtɩ, Beyaliya, Semariya, Harifu tʋ Sefatiya,
6 Ɛlɩkaana, Isihiya, Azarɛɛlɩ, Yowezɛɛrɩ, nɛ Yasobeyam, paakɛ Kora mba;+
7 nɛ Gedɔɔrɩ tʋ Yeroham pɩyalaa Yowela nɛ Zebaadiya.
8 Gaadɩ mba nabɛyɛ woba nɛ pɛwɛɛ Daviid hɔɔlʋʋ yɔɔ ɖɩjɔzɩyɛ taa kañɩmbusuu taa;+ paakɛ sɔdɩŋ ɖoŋ tɩnaa, sɔɔjanaa mba pafalɩsɩ-wɛ se pala you yɔ, pɔɖɔkaɣ kpayʋʋ sɔsɔʋ nɛ kɩgbɛzɛŋ nɛ paɖaŋɩɣ kpam, pɛ-ɛsɩndaa kaawɛ ɛzɩ mʋʋzɩŋ ɛsɩndaa yɔ nɛ peseɣ lɛɛ lɛɛ ɛzɩ nɛnzɛŋ pʋŋ yɔɔ yɔ.
9 Ezɛɛrɩ kaakɛnɩ ñʋʋdʋ, Abɩdɩyasɩ lɛ 2 ñɩnʋ, Eliyaabɩ lɛ 3 ñɩnʋ,
10 Misimanaa lɛ 4 ñɩnʋ, Yereemii lɛ 5 ñɩnʋ,
11 Ataayi lɛ 6 ñɩnʋ, Eliyɛɛlɩ lɛ 7 ñɩnʋ,
12 Yohanaanɩ lɛ 8 ñɩnʋ, Ɛlɩzabaadɩ lɛ 9 ñɩnʋ,
13 Yereemii lɛ 10 ñɩnʋ, Makɩbanaayɩ lɛ 11 ñɩnʋ.
14 Gaadɩ ñɩma lɛ,+ nɛ paakɛ sɔɔjanaa ñʋndɩnaa. Pa-taa cikpelu wɛ ɛzɩ ɛyaa 100 yɔ, nɛ weyi ɛkpaɖaa yɔ ɛzɩ ɛyaa 1 000 yɔ.+
15 Mba tɛzɩnɩ Yɔɔrdaŋ pɔɔ fenaɣ kajalaɣ ñɩŋga taa, alɩwaatʋ ndʋ kosuwa nɛ kawadɩ kidiiliŋ yɔɔ yɔ, nɛ pɔɖɔɔnɩ mba payɩ paawɛ kɛdɛɛnzɩ taa yɔ, nɛ pɛɖɛɛnɩ wɩsɩ ɖɩlɩyɛ nɛ wɩsɩ ɖɩɖʋyɛ taa kiŋ.
16 Bɛnjamɛɛ nɛ Yuuda mba nabɛyɛ kɔm ɖɔɖɔ Daviid cɔlɔ ɛ-ɖɩjɔzɩyɛ taa.+
17 Nɛ Daviid lɩɩ pɛ-ɛsɩndaa nɛ eheyi-wɛ se: «Ye ɩkɔm mɔn-cɔlɔ nɛ laŋhɛzɩyɛ se ɩsɩnɩ-m yɔ, ma-laŋɩyɛ kaɣ-mɩ ñɔnʋʋ. Ɛlɛ ye ɩkɔm se ɩlɩɩ ma-wayɩ nɛ ɩɖʋzɩ-m mon-koyindinaa nesi tɛɛ, ŋgʋ me-nesi tɩla kɩdɛkɛdɩm nabʋyʋ yɔ, ɖɔ-cɔzɔnaa tɛ Ɛsɔ ɛcɔna nɛ ɛhʋʋ tɔm.»+
18 Peeɖe fezuu tibi ɛyaa 30 waa ñʋʋdʋ Amasayi yɔɔ+ nɛ ɛyɔɔdɩ se:
«Ðɩkɛ ñɛ-ɛyaa, hayɩ Daviid, nɛ ɖɩwɛ ñɔ-cɔlɔ, hayɩ Yesee pɩyalʋ.+
Laŋhɛzɩyɛ, laŋhɛzɩyɛ ɛwɛɛ ñɔ-cɔlɔ, nɛ laŋhɛzɩyɛ ɛwɛɛ weyi ɛsɩɣnɩ-ŋ yɔ ɛ-cɔlɔ,Mbʋ pʋyɔɔ yɔ ñɛ-Ɛsɔ wɛɛ nɛ ɛsɩɣnɩ-ŋ.»+
Nɛ Daviid mʋ-wɛ nɛ ɛlɩzɩ-wɛ nɛ pɛwɛɛ sɔɔjanaa ñʋndɩnaa taa.
19 Manaasee mba taa nabɛyɛ ɖɔɖɔ se nɛ powolo Daviid cɔlɔ alɩwaatʋ ndʋ ɛ nɛ Filistii mba powoba se poyooni Sɔɔlɩ yɔ; ɛlɛ ɛtɩsɩnɩ Filistii mba, mbʋ pʋyɔɔ yɔ Filistii mba kɩbaɣlaa+ caɣaa nɛ pala lɩmaɣza nɛ pɩtɛ lɛ, pɔɖɔɔnɩ-ɩ nɛ pɔtɔ se: «Ɛkaɣ seu nɛ ewolo ɛ-kɩbaɣlʋ Sɔɔlɩ cɔlɔ, nɛ pɩkaɣ yebu nɛ ɖilesi ɖe-weziŋ.»*+
20 Ewobi Zikɩlaagɩ+ lɛ, ɛyaa panɛ palɩɩnɩ Manaasee cejewiye taa nɛ pese powolo ɛ-cɔlɔ: Adɩnaa, Yozabaadɩ, Yediyayɛɛlɩ, Mikayɛɛlɩ, Yozabaadɩ, Eliihu nɛ Zilitaayɩ; paakɛ Manaasee kudokiŋ ñʋndɩnaa.+
21 Pasɩnɩ Daviid nɛ ɛkaɖɩnɩ ɛtɛlɛmwaa, mbʋ pʋyɔɔ yɔ pa-tɩŋa paakɛ abalaa ɖoŋ tɩnaa mba pɛwɛ abalɩtʋ yɔ,+ nɛ papɩsɩ ñʋndɩnaa sɔɔjanaa taa.
22 Paa kɩyakʋ ŋgʋ lɛ, ɛyaa kaawɛɛ nɛ pɔkɔŋ Daviid cɔlɔ+ se pasɩnɩ-ɩ, nɛ pɔkɔɔ papɩsɩ yoyaa samaɣ sɔsɔɔ ŋga kɛwɛ ɛzɩ Ɛsɔ yoyaa samaɣ yɔ.+
23 Mba papa you wondu nɛ pɔkɔɔ Daviid cɔlɔ Ebrɔŋ+ se pɛcɛlɩ-ɩ Sɔɔlɩ kewiyitu ɛzɩ Yehowa kaaɖʋʋ paɣtʋ yɔ,+ pa-ñʋndɩnaa ñʋʋ kɔyɔ.
24 Yuuda ɛyaa mba pɔɖɔkʋʋ kpayʋʋ sɔsɔʋ nɛ kɩgbɛzɛŋ yɔ pɛkpɛndɩ 6 800, paañɔɔzɩ pa-tɩ se pala you.
25 Siimeyɔɔ mba taa lɛ, sɔɔjanaa taa abalaa ɖoŋ tɩnaa mba pɛwɛ abalɩtʋ yɔ pɛkpɛndɩ 7 100.
26 Leevi mba taa lɛ, pɛkpɛndɩ 4 600.
27 Yehoyiyada+ kaakɛ Aarɔɔnɩ pɩyalaa ñʋʋdʋ,+ nɛ ɛyaa 3 700 kaawɛ ɛ-cɔlɔ,
28 pɩkpɛndɩnɩ Sadɔɔkɩ,+ evebu weyi ɛwɛ ɖoŋ nɛ ɛwɛɛ abalɩtʋ yɔ, ɛ nɛ ɛ-caanaa ɖɩɣa ñʋndɩnaa 22.
29 Bɛnjamɛɛ ñɩma, Sɔɔlɩ koobiya,+ kaakpɛndɩ 3 000, nɛ ɖooo lɛ pa-taa hɔɔlʋʋ sɔsɔʋ kandɩyaɣ Sɔɔlɩ ɖɩɣa yɔɔ.
30 Efrayim mba taa lɛ, abalaa ɖoŋ tɩnaa mba pɛwɛ abalɩtʋ nɛ pa-hɩla sɛɛ pa-caanaa ɖɩsɩ taa yɔ, paakpɛndɩ 20 800.
31 Manaasee cejewiye hɔɔlʋʋ taa lɛ, paakpɛndɩ 18 000, mba paaya-wɛ nɛ pa-hɩla nɛ palɩzɩ-wɛ se pɔkɔɔ nɛ pasɩɩ Daviid wiyaʋ yɔ.
32 Isakaarɩ cejewiye taa lɛ, mba pasɩm mbʋ pɩwɛɛ se Izrayɛɛlɩ ɛla nɛ alɩwaatʋ ndʋ pɩwɛɛ se pala mbʋ yɔ, paakpɛndɩ ñʋndɩnaa 200, nɛ paawɛnɩ ɖoŋ po-koobiya kpeekpe yɔɔ.
33 Zebulɔɔnɩ taa lɛ, paakpɛndɩ 50 000, mba papɩzaɣ se pala sɔɔjatʋ tʋmɩyɛ yɔ, mba pakpaɣ you wondu kpeekpe nɛ pɔñɔɔzɩ pa-tɩ se palɩɩ nɛ pala you yɔ, pa-tɩŋa pɛkpɛndɩ Daviid yɔɔ nɛ pa-laŋɩyɛ pilim.*
34 Naftalii taa lɛ, paakpɛndɩ ñʋndɩnaa 1 000, nɛ ɛyaa 37 000 mba paawɛnɩ kpayɩŋ sɔsɔŋ nɛ kɩgbɛzɛmɩŋ yɔ paawɛ pɔ-cɔlɔ.
35 Daanɩ mba taa lɛ, mba pɔñɔɔzɩ pa-tɩ se palɩɩ nɛ pala you yɔ, paakpɛndɩ 28 600.
36 Nɛ Asɛɛrɩ taa lɛ, mba papɩzaɣ se pala sɔɔjatʋ tʋmɩyɛ nɛ pɔñɔɔzɩ pa-tɩ se palɩɩ nɛ pala you yɔ, paakpɛndɩ 40 000.
37 Yɔɔrdaŋ pɔɔ wayɩ lɛ,+ Rubɛɛnɩ mba, Gaadɩ mba, nɛ Manaasee cejewiye hɔɔlʋʋ sɔɔjanaa kaakpɛndɩ 120 000 nɛ paawɛnɩ you wondu tɩŋa ndɩ ndɩ.
38 Pa-tɩŋa payɩ paakɛ you laɖaa, pekpeɣliɣ nɛ papɩlɩɣ se pala you; powobini pa-laŋɩyɛ pilim Daviid cɔlɔ Ebrɔŋ se papɩsɩ-ɩ wiyaʋ Izrayɛɛlɩ kpeekpe yɔɔ, nɛ Izrayɛɛlɩ ñɩma mba payɩ pɩkazaa yɔ mba ɖɔɖɔ paalabɩ nɔɔ nɛ pañɩnɩɣ* se papɩsɩ Daviid wiyaʋ.+
39 Nɛ pɛwɛɛ Daviid cɔlɔ peeɖe kɩyakɩŋ 3, pɔtɔkɩ nɛ pɔñɔʋ, mbʋ pʋyɔɔ yɔ po-koobiya kaañɔɔzɩ pɩtɩŋa payɩ nɛ pasɩɩ-wɛ.
40 Mba pɔñɔtɩnɩ-wɛ yɔ ɖɔɖɔ, nɛ halɩ pɩkpɛndɩnɩ mba pɛwɛ ɖooo poliŋ ɛzɩ Isakaarɩ, Zebulɔɔnɩ, nɛ Naftalii taa yɔ, pɛwɛɛ nɛ pɔkɔŋnɩ tɔɔnasɩ kpaŋasɩ yɔɔ, aɖaaɖaanaa yɔɔ, nɛ naŋ yɔɔ—mʋlʋm, fiigi pee kakayɩsɩ nɛ viiñi pee, vɛɛ, num, nɛ naŋ nɛ heŋ sakɩyɛ, mbʋ pʋyɔɔ yɔ amɛya kaawɛ Izrayɛɛlɩ taa.
Pɩ-tɛɛ tɔm
^ Yaa «ɖa-ñʋŋ.»
^ Yaa «mba payɩ pɛkpɛndɩ Daviid yɔɔ yɔ pa-laŋɩyɛ taatayɩ nabʋlɛ.»
^ Piye piye, «paawɛnɩ laŋɩyɛ kʋɖʋmɖɩyɛ.»
