Awiya takayaɣ kajalaɣ ñɩŋga 19:1-21
19 Pʋwayɩ lɛ, Ahaabɩ+ heyi Yezaabɛɛlɩ+ mbʋ payɩ Eliya laba nɛ ɛzɩma ɛkʋ nayaa tɩŋa nɛ laɣɖɛ yɔ.+
2 Peeɖe Yezaabɛɛlɩ tiyi nɔɔyʋ Eliya cɔlɔ se eheyi-i se: «Ɛsɔnaa ɩhɔ ma-nɩŋgbaŋʋʋ siŋŋ* ye cee alɩwaatʋ tʋnɛ tɩ-yɔɔ mantɩlabɩ-ŋ ɛzɩ mbʋ pɩtalɩ pa-taa paa weyi yɔ!»*
3 Ðɩnɛ ɛlɛ sɔɔndʋ kpa Eliya, nɛ ɛkʋyɩ nɛ ese se ɛya e-wezuu* ñʋʋ.+ Ɛkɔɔ ɛtalɩ Beyɛɛrɩ-Seeba,+ ŋgʋ kɩwɛ Yuuda taa yɔ,+ nɛ eyele ɛ-lɩmɖʋyʋ peeɖe.
4 Ɛɖɔ kɩyakʋ kʋɖʋmʋʋ nʋmɔʋ kañɩmbusuu taa nɛ ewolo ɛcaɣ hɔɖʋʋ nakʋyʋ tɛɛ, nɛ ɛpɔzɩ se sɩm ɛkpaɣ-ɩ.* Ɛyɔɔdaa se: «Pɩmaɣ mbʋ! Lɛɛlɛɛyɔ, hayɩ Yehowa, lɩzɩ me-wezuu,*+ mbʋ pʋyɔɔ yɔ mantɩkɩlɩ mɔn-cɔzɔnaa weewee.»
5 Nɛ ɛhɩnɩ hɔɖʋʋ ŋgʋ kɩ-tɛɛ nɛ ɛkpaɣ ɖom. Ɛlɛ tuda lɛ, Ɛsɔ tiyiyu nɔɔyʋ kɔɔ nɛ etukuni-i+ nɛ eheyi-i se: «Kʋyɩ nɛ ŋtɔɔ.»+
6 Ɛcɔnaa lɛ, ɛna ɛ-ñʋʋ cɔlɔ kpɔnɔ kulukulu ñɩŋgʋ nakʋyʋ pɛɛ miŋ ñɩna naayɛ yɔɔ nɛ lɩm kokoɖe naɖɩyɛ. Ɛtɔɔ nɛ ɛñɔɔ nɛ ɛɖaɣnɩ hɩnʋʋ.
7 Pʋwayɩ lɛ, Yehowa tiyiyu pɩsɩ ɛkɔɔ nabʋlɛ ɖeɖe nɛ etukuni-i nɛ eheyi-i se: «Kʋyɩ nɛ ŋtɔɔ, mbʋ pʋyɔɔ yɔ nʋmɔʋ ŋgʋ ŋkaɣ ɖɔm yɔ kɩcɛzɩ ño-ɖoŋ yɔɔ.»
8 Nɛ Eliya kʋyɩ nɛ ɛtɔɔ nɛ ɛñɔɔ, nɛ ɛɖɔmnɩ tɔɔnaɣ ŋga ko-ɖoŋ kɩyakɩŋ 40 nɛ ɖoo 40 nɛ ɛkɔɔ ɛtalɩ Ɛsɔ toovenim tʋ pʋʋ Orɛɛbʋ cɔlɔ.+
9 Ɛsʋʋ peeɖe ɛwaɣ pɔʋ nakʋyʋ taa+ nɛ ɛcaɣ peeɖe ɖoo ana; nɛ Yehowa tɔm talɩ Eliya nɛ ɛpɔzɩ-ɩ se: «Eliya, ɛbɛ ŋwɛɛ nɛ ŋlakɩ cɩnɛ?»
10 Peeɖe ecosaa se: «Mɛnsɛ yoyaa tɛ Ɛsɔ Yehowa nɛ kpekpeka siŋŋ;+ ɛlɛ Izrayɛɛlɩ samaɣ yebi ñɛ-ɛgbɛyɛ,+ kɔyɔkɩ ña-altaarunaa, nɛ kakʋ ña-nayaa nɛ laɣɖɛ,+ nɛ men-ɖeke koŋ pɩkazaa. Nɛ lɛɛlɛɛyɔ kɛwɛɛ nɛ kañɩnɩɣ se kalɩzɩ me-wezuu.»*+
11 Ɛlɛ Ɛsɔ heyi-i se: «Lɩɩ nɛ ŋsɩŋ pʋʋ yɔɔ Yehowa ɛsɩndaa.» Nɛ Yehowa kɔɔ nɛ ɛɖɛɣ,+ nɛ helim sɔsɔm ɖoŋ ñɩmbʋ nabʋyʋ kaawɛɛ nɛ pɩfakɩ pʋŋ nɛ pɩyɔkʋʋ kaaŋ sɔsɔŋ Yehowa ɛsɩndaa,+ ɛlɛ Yehowa taawɛɛ helim mbʋ pɩ-taa. Helim wayɩ lɛ, tɛtʋ ñamsɩ,+ ɛlɛ Yehowa taawɛɛ tɛtʋ ñamsʋʋ mbʋ pɩ-taa.
12 Tɛtʋ ñamsʋʋ wayɩ lɛ, miŋ lɩɩ,+ ɛlɛ Yehowa taawɛɛ miŋ ɛnɩ ɩ-taa. Miŋ wayɩ lɛ, ɛnɩɩ nɔɔ hɛɛɛ ñɩŋga nakɛyɛ taŋ.+
13 Eliya tɩɩnɩ nɔɔ ŋga ka-taŋ lɛ, ɛkpaɣ e-toko* nɛ ehuuzi ɛ-ɛsɩndaa+ nɛ ɛlɩɩ nɛ ɛsɩŋ ɛwaɣ pɔʋ nɔɔ yɔɔ. Nɛ nɔɔ ŋga kɔpɔzɩ-ɩ se: «Eliya, Ɛbɛ ŋwɛɛ nɛ ŋlakɩ cɩnɛ?»
14 Peeɖe ecosaa se: «Mɛnsɛ yoyaa tɛ Ɛsɔ Yehowa nɛ kpekpeka siŋŋ; ɛlɛ Izrayɛɛlɩ samaɣ yebi ñɛ-ɛgbɛyɛ,+ kɔyɔkɩ ña-altaarunaa, nɛ kakʋ ña-nayaa nɛ laɣɖɛ, nɛ men-ɖeke koŋ pɩkazaa. Nɛ lɛɛlɛɛyɔ kɛwɛɛ nɛ kañɩnɩɣ se kalɩzɩ me-wezuu.»*+
15 Yehowa heyi-i se: «Pɩsɩ nɛ ŋwolo Damaasɩ kañɩmbusuu taa. Ŋtalɩɣ lɛ, ŋtaa num Azayɛɛlɩ+ nɛ ɛpɩsɩ Siirii wiyaʋ.
16 Nɛ pɩwɛɛ se ŋtaa num Nimisii sayɩ Yehu+ nɛ ɛpɩsɩ Izrayɛɛlɩ wiyaʋ, nɛ pɩwɛɛ se ŋtaa num Safaatɩ pɩyalʋ Eliizee* weyi ɛlɩnɩ Abɛl-Mehola yɔ nɛ ɛkɛ nayʋ ño-lone taa.+
17 Weyi eseɣ nɛ Azayɛɛlɩ laɣɖɛ tihiɣ-i yɔ,+ Yehu kaɣ-ɩ kʋʋ;+ nɛ weyi eseɣ nɛ Yehu laɣɖɛ tihiɣ-i yɔ, Eliizee kaɣ-ɩ kʋʋ.+
18 Nɛ pɩkazɩ-m ɛyaa 7 000 Izrayɛɛlɩ taa,+ pa-tɩŋa payɩ pa-nʋmbɔla tiluŋ Baalɩ tɛɛ+ nɛ pɔ-nɔsɩ tɩmʋzɩ Baalɩ yɔɔ.»+
19 Nɛ Eliya kʋyɩ peeɖe nɛ ɛɖɛɛ nɛ ɛna Safaatɩ pɩyalʋ Eliizee, alɩwaatʋ ndʋ ɛlɛ kaawɛɛ nɛ ɛhayɩɣnɩ naŋ abalɩñɩŋ agbaka naalɛ naalɛ tindima 12 yɔ, naŋ ɛnɩ ɩɩwɛ ɛ-ɛsɩndaa, nɛ ɛ-maɣmaɣ ɛɛwɛ tindimiye 12 ñɩnɖɛ cɔlɔ. Nɛ Eliya ñɔtɩnɩ-ɩ nɛ ɛpɛɖɩ e-toko*+ ɛ-yɔɔ.
20 Peeɖe Eliizee yebi naŋ abalɩñɩŋ ɛnɩ nɛ ese Eliya wayɩ nɛ eheyi-i se: «Mentendi-ŋ, yele nɛ mowolo menkpiikini man-caa nɛ mon-ɖoo. Pʋwayɩ lɛ mankaɣ-ŋ tɩŋʋʋ.» Eliya cosi-i se: «Wolo, pɩsɩ, mbʋ pʋyɔɔ yɔ maaɖɩkɩ-ŋ nʋmɔʋ.»
21 Nɛ Eliizee pɩsɩ nɛ ɛkpaɣ naŋ abalɩñɩŋ 2 nɛ ɛlaa kɩlaʋ, nɛ ɛkpaɣ ɖaŋ weyi naŋ hayɩɣna yɔ nɛ ɛtɩzɩnɩ naŋ ɛnɩ ɩ-nandʋ nɛ ɛcɛlɩ-tʋ ɛyaa nɛ pɔtɔɔ. Pʋwayɩ lɛ, ɛkʋyɩ nɛ ɛtɩŋ Eliya nɛ ɛpaɣzɩ-ɩ lɩm ɖʋʋ.+
Pɩ-tɛɛ tɔm
^ Piye piye, «Ɛsɔnaa ɩlabɩ-m mbʋ nɛ pɔsɔzɩ pɩ-yɔɔ.»
^ Yaa «mantɩla ña-kalɩzaɣ ɛzɩ pa-taa paa weyi ɛ-kalɩzaɣ yɔ.»
^ Yaa «ɛ-kalɩzaɣ.»
^ Yaa «man-kalɩzaɣ.»
^ Yaa «se sɩm ɛkpaɣ ɛ-kalɩzaɣ.»
^ Yaa «man-kalɩzaɣ.»
^ Yaa «ɛ-nayʋ toko.»
^ Yaa «man-kalɩzaɣ.»
^ Pʋ-tɔbʋʋ se «Ɛsɔ kɛ ñʋʋ yabʋ.»
^ Yaa «ɛ-nayʋ toko.»
