Yohanɛɛsɩ takayaɣ kajalaɣ ñɩŋga 3:1-24
3 Ɩna sɔɔlɩm mbʋ Caa wɩlɩ-ɖʋ+ se pɩsa nɛ payaa-ɖʋ se Ɛsɔ piya yɔ!+ Nɛ ɖɩkɛ e-piya ɖɔɖɔ. Pʋyɔɔ ɛjaɖɛ ɛɛsɩŋ-ɖʋ,+ mbʋ pʋyɔɔ yɔ ɛjaɖɛ tɩkpɛlɩkɩ nɛ ɖɩtɩlɩ-ɩ.+
2 Man-kʋsɔɔlaa, lɛɛlɛɛyɔ ɖɩkɛ Ɛsɔ piya,+ ɛlɛ patɩtɩɩlɩzɩtɩ mbʋ ɖɩkaɣ kɛʋ yɔ nɛ pawɩlɩ-ɖʋ.+ Ðɩnawa se alɩwaatʋ ndʋ palɩzɩɣ-ɩ nɛ pawɩlɩ yɔ, ɖɩkaɣ wɛʋ ɛzɩ ɛnʋ yɔ, mbʋ pʋyɔɔ yɔ ɖɩkaɣ-ɩ naʋ ɛzɩ ɛwɛʋ yɔ.
3 Nɛ weyi ɛwɛnɩ lidaʋ ŋgʋ ɛ-yɔɔ yɔ, ɛpɩsɩɣ ɛ-tɩ kele kele,+ ɛzɩ ɛlɛ ɖɔɖɔ ɛwɛʋ kele kele yɔ.
4 Weyi ɛsɔɔlɩ kɩwɛɛkɩm labʋ yɔ, ɛsɔɔlɩ ɖɔɖɔ paɣtʋ yɔɔ maʋ, nɛ kɩwɛɛkɩm kɛnɩ paɣtʋ yɔɔ maʋ.
5 Ɩsɩm mbʋ ɖɔɖɔ se palɩzɩ-ɩ nɛ pawɩlɩ se ɛhɩzɩ ɖa-kɩwɛɛkɩm,+ nɛ kɩwɛɛkɩm nabʋyʋ fɛyɩ ɛ-taa.
6 Weyi ɛ nɛ ɩ pɛwɛ nɔɔ kʋɖʋmaɣ tam yɔ eeyeki nɛ kɩwɛɛkɩm labʋ malɩnɩ-ɩ;*+ weyi ɛsɔɔlɩ kɩwɛɛkɩm labʋ yɔ ɛtɩna-ɩ nɛ ɛtɩkpɛlɩkɩ nɛ ɛtɩlɩ-ɩ ɖɔɖɔ.
7 Piya cikpesi, itaayele nɛ nɔɔyʋ peɣzi-mɩ; weyi ɛsɔɔlɩ labʋ lakasɩ nzɩ sɩwɛ siɣsiɣ yɔ, ɛwɛ siɣsiɣ, ɛzɩ ɛlɛ ɖɔɖɔ wɛʋ siɣsiɣ yɔ.
8 Weyi ɛsɔɔlɩ kɩwɛɛkɩm labʋ yɔ, ɛlɩnɩ Eleeu cɔlɔ, mbʋ pʋyɔɔ yɔ Eleeu wɛ kɩwɛɛkɩm labʋ yɔɔ kpaɣnɩ ɖooo kiɖe tɛɛ.*+ Pʋyɔɔ palɩzɩ Ɛsɔ Pɩyalʋ nɛ pawɩlɩ, se ɛɖɩzɩ Eleeu tʋma.+
9 Weyi Ɛsɔ lʋlɩ-ɩ yɔ eeyeki nɛ kɩwɛɛkɩm labʋ malɩnɩ-ɩ,*+ mbʋ pʋyɔɔ yɔ Ɛsɔ ɖomaɣ* wɛ ɛyʋ ɛnʋ ɛ-taa tam, nɛ ɛɛpɩzɩɣ nɛ ɛsɔɔlɩ kɩwɛɛkɩm labʋ, mbʋ pʋyɔɔ yɔ Ɛsɔ lʋlɩnɩ-ɩ.+
10 Pʋnɛ patɩlɩɣnɩ Ɛsɔ piya nɛ Eleeu piya: Weyi ɛtɩsɔɔlɩ labʋ lakasɩ nzɩ sɩwɛ siɣsiɣ yɔ, ɛtɩlɩɩnɩ Ɛsɔ cɔlɔ, nɛ weyi ɛtɩsɔɔlɩ e-koobu yɔ ɛtɩlɩɩnɩ Ɛsɔ cɔlɔ ɖɔɖɔ.+
11 Mbʋ pʋyɔɔ yɔ, tɔm tʋnɛ ɩnɩ kpaɣnɩ ɖooo kiɖe tɛɛ, se pɩwɛɛ se ɖɩsɔɔlɩ ɖama;+
12 ɖɩtaawɛɛ ɛzɩ Kayɩnɩ yɔ, weyi ɛɛlɩnɩ kañatʋ tʋ cɔlɔ nɛ ɛkʋ e-neu yɔ.+ Nɛ ɛbɛ yɔɔ ɛkʋ-ɩ? Mbʋ pʋyɔɔ yɔ ɛ-maɣmaɣ ɛ-lakasɩ kaakɛ kɩdɛkɛdɩsɩ,+ ɛlɛ e-neu ñɩnzɩ kaawɛ siɣsiɣ.+
13 Koobiya, pɩtaalabɩ-mɩ piti se ɛjaɖɛ paɖɩɣ-mɩ.+
14 Ðɩsɩm mbʋ se ɖɩlɩnɩ sɩm taa nɛ ɖiwolo wezuu taa,+ mbʋ pʋyɔɔ yɔ ɖɩsɔɔlɩ koobiya.+ Weyi ɛtɩsɔɔlɩ e-koobu yɔ, ɛwɛɣ sɩm taa tam.+
15 Weyi ɛpaɖɩɣ e-koobu yɔ ɛkɛ ɛyaa kʋyʋ,+ nɛ ɩsɩm mbʋ se ɛyaa kʋyʋ nɔɔyʋ ɛɛkaɣ wɛnʋʋ wezuu maatɛŋ.+
16 Pʋnɛ ɖɩsɩmnɩ sɔɔlɩm, mbʋ pʋyɔɔ yɔ Yesu Krɩstʋ cɛlɩ e-wezuu* ɖɔ-yɔɔ,+ nɛ pɩkɛnɩ-ɖʋ kɩjɛyʋʋ se ɖɩcɛlɩ ɖe-weziŋ* ɖo-koobiya yɔɔ.+
17 Ɛlɛ weyi ɛwɛnɩ ɛjaɖɛ ɖɩnɛ ɖɩ-yɔɔ ñɩm nɛ ɛna e-koobu kɩcɛyɩm taa ɛlɛ ekizi se ɛɛnaɣ ɛ-pʋtɔdɩyɛ yɔ, ɛzɩma tɩyɛ Ɛsɔ sɔɔlɩm pɩzɩɣ nɛ pɩwɛɛ ɛ-taa?+
18 Piya cikpesi, pɩtɩmʋna se ɖɩsɔɔlɩnɩ yɔɔdaɣ yaa nzʋlʋmɩyɛ,+ ɛlɛ ɖɩsɔɔlɩnɩ lakasɩ+ nɛ toovenim.+
19 Mbʋ yekina nɛ ɖɩtɩlɩ se ɖɩlɩnɩ toovenim taa, nɛ ɖɩkaɣ hɛzʋʋ ɖa-laŋa Ɛsɔ ɛsɩndaa
20 mbʋ payɩ pɩ-taa ɖa-laŋa kʋʋ ɖɔ-tɔm yɔ, mbʋ pʋyɔɔ yɔ Ɛsɔ kɩlɩ ɖa-laŋa nɛ ɛsɩm pɩtɩŋa.+
21 Man-kʋsɔɔlaa, ye ɖa-laŋa ɩɩkʋʋ ɖɔ-tɔm yɔ, ɖɩyɔɔdʋʋ tɔm kaalɛyɩtʋ Ɛsɔ ɛsɩndaa;+
22 nɛ mbʋ payɩ ɖɩpɔzʋʋ yɔ, ɖɩmʋʋ-pʋ ɛ-cɔlɔ,+ mbʋ pʋyɔɔ yɔ ɖiɖiɣni ɖɔm ɛ-paɣtʋ yɔɔ nɛ ɖɩlakɩ mbʋ pɩwɛ ɖeu ɛ-ɛsɩndaa yɔ.
23 Toovenim taa lɛ, ɛ-paɣtʋ yɔ se ɖɩwɛɛnɩ tisuu ɛ-Pɩyalʋ Yesu Krɩstʋ hɩɖɛ yɔɔ+ nɛ ɖɩsɔɔlɩ ɖama+ ɛzɩ ɛɖʋʋ-ɖʋ paɣtʋ yɔ.
24 Pɩtasɩ lɛ, weyi ɛɖɔŋ ɛ-paɣtʋ yɔɔ yɔ, eyeki nɛ ɛ nɛ ɩ pɛwɛɣ nɔɔ kʋɖʋmaɣ tam, nɛ ɛlɛ ɖɔɖɔ yeki nɛ ɛ nɛ ɛyʋ ɛnʋ pɛwɛɣ nɔɔ kʋɖʋmaɣ tam.+ Nɛ pɩtɩŋnɩ fezuu ŋgʋ ɛha-ɖʋ yɔ kɩ-yɔɔ lɛ, ɖɩsɩm mbʋ se eyeba nɛ ɖa nɛ ɩ ɖɩwɛɛ nɔɔ kʋɖʋmaɣ tam.+
Pɩ-tɛɛ tɔm
^ Yaa «ɛɛsɔɔlʋʋ kɩwɛɛkɩm labʋ.»
^ Yaa «kpaɣnɩ alɩwaatʋ ndʋ ɛpaɣzaa yɔ.»
^ Yaa «ɛɛsɔɔlʋʋ kɩwɛɛkɩm labʋ.»
^ Pʋ-tɔbʋʋ se ɖomaɣ ŋga kapɩzɩɣ lʋlʋʋ yɔ, yaa ŋga kalʋlʋʋ pee yɔ.
^ Yaa «ɖa-kalɩzasɩ.»
^ Yaa «ɛ-kalɩzaɣ.»
