Maatiyee 17:1-27
17 Kɩyakɩŋ loɖo wayɩ lɛ, Yesu kpaɣ Pɩyɛɛrɩ nɛ Yakubu nɛ e-neu* Yohanɛɛsɩ nɛ pakpa pʋʋ kʋkʋyʋʋ nakʋyʋ yɔɔ pe-ɖeke.
2 Nɛ ɛ-wɛtʋ lɛɣzɩ pɛ-ɛsɩndaa; ɛ-ɛsɩndaa ñɩlɩsɩɣ ɛzɩ wɩsɩ yɔ, nɛ e-tokonaa kɩtɩnaa ñɩlɩsɩɣ* ɛzɩ ñalɩmɩyɛ yɔ.
3 Nɛ na, Moyizi nɛ Eliya palɩɩ pɔ-yɔɔ, nɛ pa nɛ Yesu pɛwɛɛ nɛ pɛkɛdɩɣ.
4 Ðɩnɛ ɛlɛ Pɩyɛɛrɩ heyi Yesu se: “Kɩbaɣlʋ, pɩwɛ ɖeu se ɖɩwɛɛ cɩnɛ. Ye ŋsɔɔlaa yɔ, mensiki kizinzikiŋ naadozo cɩnɛ, ña kʋɖʋmʋʋ, Moyizi kʋɖʋmʋʋ, nɛ Eliya kʋɖʋmʋʋ.”
5 Eɖiɣni yɔɔdʋʋ mbʋ lɛ, na, ɛsɔmɩnʋʋ kɩñɩlɩsʋʋ nakʋyʋ huuzi pɔ-yɔɔ, nɛ nɔɔ nakɛyɛ lɩɩnɩ ɛsɔmɩnʋʋ taa nɛ kɔtɔ se: “Ɛnɛ yɔ ɛkɛnɩ man-Pɩyalʋ kʋsɔɔlʋ, weyi ɛ-tɔm kɛdɩnɩ-m yɔ. Iwelisini-i.”
6 Tɔmkpɛlɩkɩyaa nɩ mbʋ lɛ, pɔtɔlɩ nɛ papa pɛ-ɛsa nɛ tɛtʋ nɛ sɔɔndʋ kpa-wɛ pɩŋŋ.
7 Nɛ Yesu ñɔtɩnɩ-wɛ, nɛ etukuni-wɛ nɛ eheyi-wɛ se: “Ɩkʋyɩ. Sɔɔndʋ ɛtaakpa-mɩ.”
8 Pakʋsɩ pɛ-ɛsa lɛ, patɩna nɔɔyʋ nɛ pɩtasɩnɩ Yesu.
9 Palɩnɩ pʋʋ yɔɔ nɛ petiki lɛ, Yesu ɖʋ-wɛ paɣtʋ se: “Itaaheyi nɔɔyʋ natʋ ndʋ tɩ-tɔm nɛ pɩkɔɔ pɩtalɩ alɩwaatʋ ndʋ pefezi ɛyʋ Pɩyalʋ nɛ sɩɖaa taa yɔ.”
10 Ɛlɛ tɔmkpɛlɩkɩyaa pɔzɩ-ɩ se: “Ye mbʋ, ɛbɛ yɔɔ paɣtʋ wɩlɩyaa yɔɔdʋʋ se pɩwɛɛ se Eliya ɛkɔɔ nɛ pʋcɔ?”
11 Ecosi-wɛ nɛ ɛtɔ se: “Toovenim taa lɛ, Eliya kɔŋ nɛ ɛkaɣ pɩtɩŋa payɩ ñɔɔzʋʋ.
12 Ɛlɛ, meheyiɣ-mɩ se Eliya tɛm kɔm, nɛ patɩtɩlɩ-ɩ, ɛlɛ palabɩ-ɩ mbʋ payɩ pɔsɔɔlaa yɔ. Mbʋ ɖɔɖɔ, ɛyʋ Pɩyalʋ kaɣ tɔɔʋ kʋñɔŋ pe-nesi tɛɛ.”
13 Ðɩnɛ ɛlɛ, tɔmkpɛlɩkɩyaa nɩɩ pɩ-taa se Yohanɛɛsɩ Lɩm Mɩyɩsɩyʋ tɔm eheyaɣ-wɛ.
14 Pɔkɔm ɛyaa samaɣ cɔlɔ lɛ, abalʋ nɔɔyʋ ñɔtɩnɩ-ɩ, eluŋ ɛ-tɛɛ nɛ ɛtɔ se:
15 “Kɩbaɣlʋ, na man-pɩyalʋ pʋtɔdɩyɛ, mbʋ pʋyɔɔ yɔ ɛwɛnɩ kʋdɔŋ kɩtɔlʋʋ nɛ pɩwɩɣ-ɩ. Ɛtɔlʋʋ miŋ taa ɖoŋ ɖoŋ, nɛ ɛtɔlʋʋ ɖɔɖɔ lɩm taa ɖoŋ ɖoŋ.
16 Mɔnkɔnɩ-ɩ ñɔ-tɔmkpɛlɩkɩyaa cɔlɔ, ɛlɛ patɩpɩzɩ nɛ pawaa-ɩ.”
17 Yesu kitina se: “Hayɩ, kpaɖʋʋ ŋgʋ kɩfɛyɩnɩ tisuu nɛ kɩlakɩ mbʋ pɩtɩtʋʋzɩ yɔ, alɩwaatʋ ɛzɩma pɩwɛɛ se mantasɩ wɛʋ mɩ-cɔlɔ? Alɩwaatʋ ɛzɩma pɩwɛɛ se mɔnɖɔkɩ man-tɩ mɩ-lakasɩ yɔɔ? Ɩkɔnɩ-m ɩ cɩnɛ.”
18 Nɛ Yesu kalɩ eleeu ɛnʋ, nɛ ɛlɩɩ abalɩbɩɣa ŋga ka-taa, nɛ kpaɣnɩ ñɩɣyʋʋ ŋgʋ lɛ, kɔ-yɔɔ cɛ.
19 Pʋwayɩ lɛ, Yesu tɔmkpɛlɩkɩyaa kɔɔ ɛ-cɔlɔ, nɛ pɛwɛ pe-ɖeke lɛ, pɔpɔzɩ-ɩ se: “Ɛbɛ yɔɔ ɖɩtɩpɩzɩ nɛ ɖɩɖɔɔnɩ-ɩ?”
20 Ecosi-wɛ se: “Mbʋ pʋyɔɔ yɔ mi-tisuu tɩpaɣlɩ. Toovenim taa lɛ, meheyiɣ-mɩ se ye mi-tisuu ɛpaɣlaa nɛ pɩtalɩ piye cikpeɖe* yɔ, ɩkaɣ heyuu pʋʋ kʋnɛ se: ‘Kpɛzɩ cɩnɛ nɛ ŋkɛɛ peeɖe yɔ,’ nɛ kɩkaɣ kpɛzʋʋ, nɛ nabʋyʋ fɛyɩ se ɩɩkaɣ pɩzʋʋ nɛ ɩlabɩ-pʋ.”
21 *——
22 Alɩwaatʋ ndʋ Yesu nɛ ɛ-tɔmkpɛlɩkɩyaa paakpeɣli Galilee yɔ eheyi-wɛ se: “Pakaɣ ɛyʋ Pɩyalʋ wayɩ lɩʋ nɛ paɖʋzɩ-ɩ ɛyaa nesi tɛɛ,
23 nɛ pakaɣ-ɩ kʋʋ, nɛ kɩyakʋ tozo ŋgʋ wiye lɛ pakaɣ-ɩ fezuu.” Piyeba nɛ pɛwɛɛ laŋwɛɛkɩyɛ taa siŋŋ.
24 Patalɩ Kapɛrɩnawum lɛ, mba pamʋʋ dɩrakɩmwaa* naalɛ lambuu yɔ, pɔñɔtɩnɩ Pɩyɛɛrɩ nɛ pɔpɔzɩ-ɩ se: “Mɩ-wɩlɩyʋ ɛɛhɛyɩɣ dɩrakɩmwaa naalɛ lambuu yaa we?”
25 Ecosi-wɛ se: “Ɛhɛyɩɣ.” Ɛlɛ, Pɩyɛɛrɩ sʋ ɖɩɣa taa lɛ, Yesu calɩnɩ-ɩ yɔɔdɩnʋʋ nɛ ɛpɔzɩ-ɩ se: “Siimɔɔ, ŋmaɣzɩɣ suwe? Mba cɔlɔ tɛtʋ yɔɔ awiya mʋʋ liidiye yaa lambuu*? Pe-piya cɔlɔ yaa agbaaɣdaa mba cɔlɔ?”
26 Ecosaa se: “Agbaaɣdaa mba cɔlɔ” lɛ, Yesu heyi-i se: “Ye mbʋ, toovenim taa lɛ, piya ɩɩhɛyɩɣ lambuu.
27 Ɛlɛ, pɩsa nɛ ɖitaayele nɛ pituuli-wɛ lɛ, wolo teŋgu taa, lɔ kolaɣ, nɛ kpakpayaɣ ŋga ŋcalɩɣ kpaʋ yɔ, ŋkuluu kɔ-nɔɔ lɛ, ŋkaɣ naʋ liidiye pɔɔyaɣ nakɛyɛ.* Kpaɣ-kɛ nɛ ŋcɛlɩ-wɛ ma nɛ ŋ ɖɔ-yɔɔ.”
Pɩ-tɛɛ tɔm
^ Grɛɛkɩ taa lɛ, patɩyɔɔdɩ weyi ɛkɛ sɔsɔ Yakubu nɛ Yohanɛɛsɩ pɛ-hɛkʋ taa yɔ.
^ Yaa “hʋlʋmɩ.”
^ Grɛɛkɩ taa, “sinaapi piye.” Sinaapi piye kɛ ɖomaɣ piye cikpeɖe nɖɩ ɖɩwɛ Izrayɛɛlɩ yɔ. Sinaapi tɩʋ pɩzɩɣ nɛ kɩpaɣlɩ nɛ kɩtalɩ mɛtanaa 4 mbʋ yɔ.
^ Mayaɣ kanɛ, kɛwɛ Biblwaa nabɛyɛ taa, ɛlɛ kɛfɛyɩ Grɛɛkɩ takayɩsɩ kɩbɩnzɩ sakɩyɛ nzɩ papɩzɩɣ nɛ pataa-sɩ liu yɔ sɩ-taa.
^ Cɔnɩ Tɔm pee sɔsɔna tɔbʋʋ lɩzʋʋ.
^ Yaa “lambuu ŋgʋ pɩwɛɛ se paa weyi ɛhɛyɩ yɔ.”
^ Pɩkɛ dɩrakɩmwaa naanza. Cɔnɩ Tɔm pee sɔsɔna tɔbʋʋ lɩzʋʋ.
