Motalo 8:1-26
8 Na Yeova aneena na Mose, ayasya:
2 “Neena na Alũni na ũimwĩa atĩĩ: ‘Yĩla wakwatya ila taa mũonza syĩ kĩndũnĩ kya kwilĩĩla taa, syaĩlĩte kũmulĩka mbee wa kĩndũ kĩu kya kwilĩĩla taa.’”
3 Kwoou Alũni nĩweekie ũũ: Nĩwakwatisye taa isu nĩ kana imulĩke mbee wa kĩla kĩndũ kya kwilĩĩla taa, o tondũ Yeova wamwĩaĩe Mose.
4 Ũũ nĩw’o kĩla kĩndũ kya kwilĩĩla taa kyaseũvĩtw’e: Kyaseũvĩtwʼe na thaavu mũtue; kuma mũthambanĩ wakyo nginya malaanĩ makyo, kyaseũvĩtw’e na nyũndo. Kĩndũ kĩu kya kwilĩĩla taa kyaseũvĩtw’e o ũndũ Yeova woonetye Mose woninĩ.
5 Na Yeova aneena ĩngĩ na Mose, ayasya:
6 “Osa Alivai kuma katĩ wa Aisilaeli, na ũimathesya.
7 Ũũ nĩw’o ũũmathesya: Maminzangĩsye kĩw’ũ kya kũthesya naĩ, na no nginya menze nzw’ĩĩ sya mwĩĩ woo w’onthe na wenzi, na maivũa ngũa syoo, na mayĩthesya.
8 Ĩtina wa ũu, maĩle kwosa kasalũ vamwe na nthembo yako ya lĩu ya mũtu mũvinyu ũvulanĩtwʼe na mauta, na ũyosa kasalũ kangĩ kwondũ wa nthembo ya naĩ.
9 Na no nginya ũete Alivai mbee wa ĩeema ya kũmbanĩa na ũyũmbanyʼa ũmbano w’onthe wa Aisilaeli.
10 Yĩla ũkũete Alivai mbee wa Yeova, Aisilaeli maĩlĩte kwilĩĩla moko moo ĩũlũ wa Alivai.
11 Na no nginya Alũni anengane* Alivai mbee wa Yeova ta nthembo ya kũvyulwʼa kuma kwa Aisilaeli, namo makamũthũkũmaa Yeova.
12 “Ĩtina wa ũu, no nginya Alivai mailĩĩle moko moo ĩũlũ wa mĩtwe ya tũsalũ tũu, na ĩndĩ kasalũ kamwe kayumĩwʼa Yeova ta nthembo ya naĩ na kasalũ kala kangĩ ta nthembo ya kũvĩvw’a nĩ kana Alivai mewʼanĩthwʼe na Ngai.
13 Wamina kwĩka ũu, ũngamya Alivai mbee wa Alũni na ana make na ũimanengane* ta nthembo ya kũvyulwʼa kwa Yeova.
14 No nginya ũvathe Alivai kuma kwa Aisilaeli, na Alivai makeethĩawa makwa.
15 Ĩtina wa maũndũ asu, Alivai nĩmekwambĩĩa ũthũkũmi woo ũla ũkonanĩtye na ĩeema ya kũmbanĩa. Ũu nĩwʼo ũũmathesya na ũimanengane* ta nthembo ya kũvyulwʼa.
16 Nũndũ nĩmo ala manenganĩtwe, na nĩnengetwe mo kuma kwa Aisilaeli. Nĩngũmosa methĩwe makwa vandũ va kĩla mwana mũkũũ wa* Aisilaeli.
17 Nĩkwĩthĩwa makithathi onthe* ma Aisilaeli nĩ makwa, methĩwe nĩ andũ kana nĩ nyamũ. Nĩnamatheisye kwondũ wakwa mũthenya ũla nooaie makithathi onthe* nthĩ ya Misili.
18 Nĩngwosa Alivai vandũ va kĩla mwana mũkũũ wa Aisilaeli.
19 Nĩngũnengane Alivai kwa Alũni na ana make ta ala manenganĩtwe kuma kwa Aisilaeli, meanĩasye ũthũkũmi woo ĩeemanĩ ya kũmbanĩa kwondũ wa Aisilaeli na mayĩwʼanĩthya Aisilaeli na Ngai, nĩ kana vaikethĩwe na ũkũno katĩ wa Aisilaeli nũndũ wa andũ ma Isilaeli kũthengeea vala vandũ vatheu.”
20 Na ĩndĩ Mose na Alũni na ũmbano wʼonthe wa Aisilaeli meeka Alivai maũndũ asu. Aisilaeli nĩmamekie kwosana na kyonthe kĩla Yeova wamwĩaĩe Mose ĩũlũ wa Alivai.
21 Kwoou Alivai nĩmeetheisye na mavũa ngũa syoo, na ĩtina wa kwĩka ũu, Alũni amanengane* ta nthembo ya kũvyulwʼa mbee wa Yeova. Na ĩndĩ Alũni amewʼanĩthya na Ngai nĩ kana amathesye.
22 Ĩtina wa ũu, Alivai nĩmaendie ĩeemanĩ ya kũmbanĩa nĩ kana meanĩsye ũthũkũmi woo me mbee wa Alũni na ana make. O ũndũ Yeova weeaĩe Mose ĩũlũ wa Alivai, nowʼo meekanie namo.
23 Nĩvo ĩndĩ Yeova waneenie na Mose, ayasya:
24 “Ũndũ ũũ ũkonetye Alivai: Mũndũũme ũla wĩ na myaka 25 kwambata, akalikaa nguthunĩ ya ala mathũkũmaa ĩeemanĩ ya kũmbanĩa.
25 Ĩndĩ avĩtũkya myaka 50, akathũmũĩaa wĩa ũsu na ndakaendeeaa kũthũkũma vau.
26 Akeethĩawa atonya kũthũkũma ana-a-asa make ala maendeee kwĩanĩsya ianda syoo ĩeemanĩ ya kũmbanĩa, ĩndĩ ndaĩlĩte o na vanini kũaĩwa wĩa vau. Ũu nĩwʼo waĩlĩte kwĩkana na Alivai na ianda syoo.
Maelesyo ma Kwongeleela
^ Ndeto kwa ndeto, “avyũlye.” Ũu nĩ kwasya, atume mathi mbee na ĩtina.
^ Ndeto kwa ndeto, “ũimavyũlya.” Ũu nĩ kwasya, atume mathi mbee na ĩtina.
^ Ndeto kwa ndeto, “ũimavyũlya.” Ũu nĩ kwasya, atume mathi mbee na ĩtina.
^ Kana “kĩla ĩkithathi yĩvingũĩte mavu ma.”
^ Kana “kyonthe kĩla kĩsyaĩtwe mbee.”
^ Kana “kyonthe kĩla kĩsyaĩtwe mbee.”
^ Ndeto kwa ndeto, “amavyũlya.” Ũu nĩ kwasya, atuma mathi mbee na ĩtina.
