Motalo 22:1-41
22 Na ĩndĩ Aisilaeli mombũũka na mamba kambi yalatanĩ ĩtindimalu ya Moavi mũingo wa Yolotani masianĩtye na Yeliko.
2 Na Mbalaki mwana wa Nzivoli nĩwoonie maũndũ onthe ala Aisilaeli meekĩte Aamoli,
3 na Moavi atwʼĩka nda nũndũ wa andũ asu, nĩkwĩthĩwa maĩ aingĩ mũno; ĩĩ, Moavi nĩwakwatiwe nĩ wia nũndũ wa Aisilaeli na amamena mũno.
4 Na kwoou Moavi aneena na atumĩa ma Mitiani, aimea: “Yu ũmbano ũũ wĩnyenya vyũ kĩsio kitũ kyonthe, o tondũ nzaũ ĩnyenyaa vyũ nyeki ĩla yĩ kĩsesinĩ.”
Ĩvindanĩ yĩu Mbalaki mwana wa Nzivoli nĩwe waĩ mũsumbĩ wa Moavi.
5 Nĩwatũmie andũ vala ve Mbalaamu mwana wa Mbeoli kũu Vetholi, na vo nĩ vakuvĩ na ũla Ũsĩ* nthĩ ĩla ũsyaĩtwe. Amũtũmanie oke, ayasya: “Sisya! Vaa ve andũ maumĩte Misili. Na sisya! Nĩmausũĩte nthĩ, na matwĩe vaa vakuvĩ nakwa.
6 Yu ĩndĩ, nĩngũkwĩsũva ũke na ũiumanĩa andũ aa kwondũ wakwa, nũndũ me vinya kwĩ inyie. No kwĩthĩwa nĩvota kũmakĩlya vinya na ndimalũngya nthĩ ĩno, nũndũ nĩnĩsĩ nesa ki kana ũla waathima nũathimĩkaa na ũla waumanĩa nũkwatawa nĩ kĩumo.”
7 Na kwoou atumĩa ma Moavi na atumĩa ma Mitiani makwata nzĩa makuĩte ndĩvi ya kwaũsya mokonĩ moo na mathi vala ve Mbalaamu na mamũtavya ndeto sya Mbalaki.
8 Nĩvo ĩndĩ Mbalaamu wameie atĩĩ: “Komelai vaa ũtukũ wa ũmũnthĩ, na nĩngũka kũmũtavya ndeto o na yĩva ĩla Yeova ũkũndavya.” Na kwoou anene asu me mbee ũsumbĩnĩ wa Moavi mekala na Mbalaamu.
9 Na ĩndĩ Ngai amumĩlĩĩla Mbalaamu na asya: “Aũme aa me naku naaũ?”
10 Nake Mbalaamu asũngĩa Ngai ũla wa w’o amwĩa: “Mbalaki mwana wa Nzivoli, mũsumbĩ wa Moavi, nĩwatũmana kũla nĩĩ, ayasya,
11 ‘Sisya! Andũ aa maumĩte Misili nĩmausũĩte nthĩ. Yu ũka na ũimaumanĩa kwondũ wakwa. No kwĩthĩwa ndonya kũmokita na kũmalũngya kũũ.’”
12 Ĩndĩ Ngai eea Mbalaamu atĩĩ: “Ndũkatate kũendanyʼa namo. Na ndũkatate kũumanĩa andũ asu, nũndũ mo nĩ aathime.”
13 Ũnĩ ũsu kwakya yĩla Mbalaamu wookĩlile nĩwaneenie na anene asu me mbee ũsumbĩnĩ wa Mbalaki amea: “Syokai nthĩ yenyu, nũndũ Yeova ndanambĩtĩkĩlya kũendanyʼa nenyu.”
14 Na kwoou anene asu me mbee ũsumbĩnĩ wa Moavi makũsya na masyoka vala ve Mbalaki na mamwĩa: “Mbalaamu nĩwalea kũkanyʼa naitũ.”
15 Ĩndĩ Mbalaki atũma ĩngĩ anene me mbee ũsumbĩnĩ, aingangĩ na ma ndaĩa mũnango kwĩ ala ma mbee.
16 Na yĩla mavikie vala ve Mbalaamu mamwĩa: “Ũũ nĩwʼo Mbalaki mwana wa Nzivoli ũkwasya, ‘Nĩngũkwĩsũva, ndũkaeke ũndũ o na ũmwe ũũsiĩĩe kũka vala nĩĩ,
17 nũndũ nĩngũũtaĩa mũno na nĩngwĩka ũndũ o na wĩva ũla ũũmbĩa nĩke. Kwoou nĩngũkwĩsũva, ũka ũumanĩe andũ aa kwondũ wakwa.’”
18 Ĩndĩ Mbalaamu asũngĩa athũkũmi ma Mbalaki amea: “O na Mbalaki akanenga nyũmba yake mwene yusĩe vetha na thaavu, ndyĩsa kwĩka ũndũ o na ũmwe ũũvĩtũũkana na mwĩao wa Yeova Ngai wakwa, wĩthĩwe nĩ mũnini kana nĩ mũnene.
19 Ĩndĩ nĩngũmwĩsũva, o nenyu ĩkalai vaa ũtukũ wa ũmũnthĩ, nĩ kana nĩmanye ethĩwa ve ũndũ ũngĩ Yeova ũkũndavya.”
20 Nĩvo ĩndĩ Ngai wamumĩlĩĩile Mbalaamu ũtukũ na amwĩa: “Ethĩwa aũme aa meeka ũkwĩsĩa, endanyʼa namo. Ĩndĩ ũkaneena o ndeto ila ngakwĩa ũneene.”
21 Na kwoou Mbalaamu ookĩla ũnĩ wake kwakya na ailĩĩla matandĩko ĩng’oinĩ* yake na aendanyʼa na anene asu me mbee ũsumbĩnĩ wa Moavi.
22 Ĩndĩ ũthatu wa Ngai wakana nũndũ nĩwaendete, na mũlaĩka wa Yeova aũngama lelũnĩ nĩ kana amũsiĩĩe. Ĩvindanĩ yĩu Mbalaamu atwaĩte ĩng’oi yake, na athũkũmi make elĩ maĩ vamwe nake.
23 Na ĩng’oi yoona mũlaĩka wa Yeova aũngeme lelũnĩ akũĩte ũvyũ na akaũkwata na kwʼoko kwake, yatata kwathũka ũtee wa lelũ na yalika kĩthekanĩ. Ĩndĩ Mbalaamu ambĩĩa kũyĩvũa nĩ kana yĩsyoke lelũnĩ.
24 Nĩvo ĩndĩ mũlaĩka wa Yeova waũngamie kasĩlanĩ katheke kaĩ na ngũta sya mavia ngalĩko syelĩ na kaĩ katĩkatĩ wa mĩũnda ĩlĩ ya mĩsavivũ.
25 Na yĩla ĩng’oi yĩu yoonie mũlaĩka wa Yeova, yambĩĩa kwĩngʼengʼeesya ũkũtanĩ na yavinyĩanĩsya kũũ kwa Mbalaamu ũkũtanĩ, na Mbalaamu ambĩĩa kũyĩvũa ĩngĩ.
26 Na ĩndĩ mũlaĩka wa Yeova ayĩkelana ĩngĩ na aũngama vandũ vatheke yĩtaĩ yĩmwathũkĩa ngalĩko ya kwʼoko kwa aũme kana ya kwʼoko kwa aka.
27 Na yĩla ĩng’oi yĩu yoonie mũlaĩka wa Yeova, yatindia Mbalaamu ayĩkalĩle, na kwoou Mbalaamu athilĩka na aendeea kũyĩvũa na ndata yake.
28 Mũthya, Yeova nĩwatumie ĩng’oi yĩu yĩneena,* na yamwĩa Mbalaamu: “Nakwĩka ata nĩ kana ũmbũe mavinda aa atatũ?”
29 Na Mbalaamu asũngĩa ĩng’oi ayĩa: “Nĩũvũa nũndũ wĩngua ta ndia. Keka nĩ na ũvyũ kw’okonĩ kwakwa, nĩka ũkũaa!”
30 Nĩvo ĩndĩ ĩng’oi yĩu yamũkũlilye Mbalaamu atĩĩ: “Nyie ndi ĩng’oi yaku na ndyĩthĩĩtwe ndiũkua thayũnĩ waku wʼonthe nginya ũmũnthĩ? Ve ĩvinda yĩngĩ naakwĩka ũu?” Nake ayĩsũngĩa: “Aiee!”
31 Na ĩndĩ Yeova asalukya metho ma Mbalaamu, na oona mũlaĩka wa Yeova aũngeme lelũ, akũĩte ũvyũ na akaũkwata na kwʼoko kwake. Na vau kwa vau Mbalaamu akumana nginya nthĩ na avalũka nthĩ na ũthyũ wake.
32 Nĩvo ĩndĩ mũlaĩka wa Yeova wamwĩie: “Nĩkĩ wavũa ĩng’oi yaku mavinda aa atatũ? Sisya! Nyie mwene nĩnũkie ngũsiĩĩe, nũndũ kyalo kyaku nĩkĩũleana na kwenda kwakwa.
33 Ĩng’oi yĩĩ nĩyĩmbonie na yatata kũmbathũkĩa mavinda aa atatũ. Kwasũanĩa ta kethĩwa yĩinambathũkĩa! Kũvika yu nĩthĩwa ngũwaĩte na ngaekana na ĩngʼoi yĩkale thayũ.”
34 Na Mbalaamu eea mũlaĩka wa Yeova atĩĩ: “Nĩneeka naĩ, nũndũ ndyĩĩsĩ kana nue ũũngeme lelũ ũkomane nakwa. Na yu ethĩwa ũndũ ũũ nĩ mũthũku methonĩ maku, nĩngũsyoka.”
35 Ĩndĩ mũlaĩka wa Yeova amwĩa Mbalaamu atĩĩ: “Endanyʼa na aũme aa, ĩndĩ wĩneena ndeto o ila ngũũtavya.” Na kwoou Mbalaamu aendeea na kyalo kyake e na anene asu maĩ mbee ũsumbĩnĩ wa Mbalaki.
36 Yĩla Mbalaki weewie kana Mbalaamu nĩwooka, nĩwaumaalile na mĩtũkĩ na athi makomanĩe ndũanĩ ya Moavi, ĩla yĩ ũtumonĩ wa Alinoni mũvakanĩ wa kĩsio kĩu.
37 Na Mbalaki aneena na Mbalaamu amwĩa: “Nyie ndineeũtũmana? Nĩkĩ ũtaneeũka? Ko ũnoonaa ta ndatonya kũtuma ũtaĩwa mũno?”
38 Nake Mbalaamu amũsũngĩa Mbalaki amwĩa: “Yu ninyioo. Ĩndĩ nyie nĩngwĩtĩkĩlwʼa nĩwete kĩndũ? Ndeto ila Ngai ũkwĩkĩa kanywʼanĩ wakwa nosyo ngwĩthĩwa ndonya kũneena.”
39 Na ĩndĩ Mbalaamu aendanyʼa na Mbalaki, na mathi nginya Kiliathi-usothi.
40 Na Mbalaki athemba ngʼombe na malondu na anengane imwe itwaĩwe Mbalaamu na anene me mbee ũsumbĩnĩ ala maĩ vamwe nake.
41 Ũnĩ ũsu kwakya Mbalaki nĩwamwosie Mbalaamu na amwambatya nginya Mbamothi-mbaali; me vau aĩ atonya kwona andũ onthe.
Maelesyo ma Kwongeleela
^ Veonekana ũũ nĩ ũsĩ wa Euvalati.
^ Ndeto kwa ndeto, “ĩngʼoinĩ ĩka.”
^ Ndeto kwa ndeto, “nĩwaathamisye kanywʼa wa ĩngʼoi yĩu ĩka.”
