Kwa Alomi 9:1-33
9 Nĩneena w’o nthĩnĩ wa Klĩsto; ndiũneena ũvũngũ, o tondũ wasya wakwa wa ngoo ũũkũsĩĩa vamwe nakwa nthĩnĩ wa veva mũtheu,
2 kana nĩ na kyeva kingĩ na woo ũteũthela ngoonĩ yakwa.
3 O na nenda nyie mwene nĩthĩwe nĩvathanĩtw’e na Klĩsto ta mũndũ mũumanĩe kwondũ wa ana-a-asa makwa, ala nĩ andũ ma mbaĩ yakwa kwa nzĩa ya mwĩĩ,
4 namo nĩ Aisilaeli. Asu nĩmo Ngai wamatw’ĩte ana na akamanenevya, na akatianĩa motianĩo namo, na akamanenga Mĩao, na ũthũkũmi mũtheu, na mawatho.
5 Namo nĩ nzyawa ya aa-ũmae maitũ ala Klĩsto waumie ũsyaonĩ woo kwa nzĩa ya mwĩĩ. Ngai ũla wĩ ĩũlũ wa onthe nataĩwe tene na tene. Ameni.
6 Ĩndĩ ũu ti kwasya kana ndeto ya Ngai ndyaaĩanĩa. Nũndũ ti onthe ala maumanĩte na Isilaeli ne “Isilaeli.”
7 O na kau mo nĩ ũsyao wa Avalaamu, ti onthe matalawa kwĩthĩwa syana syake; ĩndĩ nĩkũandĩkĩtwe, “Ũla ũketwa ũsyao waku ũkeethĩwa kwĩsĩla Isaka.”
8 Ũu nĩ kwasya kana syana ila syumanĩte na Avalaamu ti syo syana sya Ngai, ĩndĩ syana sya watho nĩsyo italawa kwĩthĩwa ũla ũsyao.
9 Nũndũ ndeto ya watho yaĩtye ũũ: “Ĩvindanĩ ta yĩĩ ngooka, na Sala akeethĩwa na mwana.”
10 Na ti ũu wĩ w’oka, ĩndĩ o na ĩvinda yĩla Leveka waitavie mavatha ma mũndũũme ũmwe, nake nĩ Isaka ũmae waitũ;
11 nũndũ matanamba kũsyawa na matanamba kwĩka ũndũ o na ũmwe mũseo kana mũthũku, nĩ kana kĩeleelo kya Ngai ĩũlũ wa kũnyuva andũ kĩthĩwe ti kwondũ wa meko ĩndĩ kwondũ wake Ũla ũmetaa,
12 Leveka eeiwe atĩĩ: “Ũla mũkũũ akeethĩwa ngombo ya ũla mũnini.”
13 O tondũ kũandĩkĩtwe: “Nĩnamwendie Yakovo, ĩndĩ Esau nĩnamũmenie.”
14 Twĩasya ata ĩndĩ? We Ngai nĩwĩkaa meko mate ma ũlũngalu? Aiee!
15 Nũndũ amwĩie Mose atĩĩ: “Ngamwĩw’ĩa tei o ũla ngamwĩw’ĩa tei, na ngamwĩw’ĩa ĩnee o ũla ngamwĩw’ĩa ĩnee.”
16 Kwoou ĩndĩ, ũnyuvi wa Ngai ti kwondũ wa wendi wa mũndũ kana kĩthito kyake, ĩndĩ nĩ kwondũ wa Ngai ũla wĩ tei.
17 Nũndũ ĩandĩko yĩmwĩĩte Valao atĩĩ: “Kwondũ wa kĩtumi kĩĩ nĩnakũekie ũendeee kwĩthĩwa vo: nĩ kana kwĩsĩla kwaku nonany’e vinya wakwa, na nĩ kana ĩsyĩtwa yakwa yĩtavanw’e nthĩ yonthe.”
18 Kwondũ wa ũu, nũmwĩw’ĩaa tei o ũla ũkwenda kũmwĩw’ĩa tei, ĩndĩ mũndũ o na wĩva ũla Ngai ũkwenda kũmũeka omye ngoo nũmũekaa omye ngoo.
19 Kwoou mũkangũlya atĩĩ: “Nĩkĩ o na yu Ngai wonaa mavĩtyo? We nũũ ũtonya kũleana na kwenda kwake?”
20 Ĩndĩ we nue ũũ, we mũndũ, wĩthĩwe ũimũsũngĩa Ngai? Kyo kĩndũ kĩla kyũmbĩtwe nĩkĩtonya kũmwĩa ũla ũkyũmbĩte: “Wambũmbie nĩilye ũũ nĩkĩ?”
21 Aĩ kyaũ? We mũmbi wa syĩndũ sya yũmba nde na ũkũmũ ĩũlũ wa yũmba wa kũseũvya mũio wa kũtũmĩwa maũndũnĩ ma ndaĩa na ũngĩ ũte wa kũtũmĩwa maũndũnĩ ma ndaĩa, aitũmĩa yũmba o yĩu?
22 Nata ĩndĩ ethĩwa Ngai aĩ na wendi wa kwonany’a ũthilĩku wake na kũtuma vinya wake ũmanyĩka, na nĩwoomĩĩisye ĩvinda yĩasa mĩio ya ũthilĩku ĩla yaaĩle kwanangwa?
23 Nao nata ethĩwa ũu weekĩkie nĩ kana ũthwii wa ũnene wake ĩũlũ wa mĩio ya tei ũmanyĩke, ĩla waseũvisye kuma tene kwondũ wa ũtheu mũtisu,
24 nayo nĩ ithyĩ ala weetie kuma katĩ wa Ayuti na katĩ wa andũ ma mbaĩ ingĩ?
25 Na no tondũ waĩtye ĩvukunĩ ya Osea: “Ala mate andũ makwa ngameta ‘andũ makwa,’ na mũndũ mũka ũla ũtaaendwa ngamwĩta ‘mwendwa’;
26 na kũla meeiwe, ‘Inyw’ĩ mũi andũ makwa,’ kũu makeetwa ‘ana ma Ngai ũla wĩ thayũ.’”
27 O na ĩngĩ, Isaia aneenete na wasya mũnene ĩũlũ wa Isilaeli, akyasya: “O na kau ũtalo wa ana ma Isilaeli nũtonya kwĩthĩwa ta kĩthangathĩ kya ũkanga, no ala metiala makatangĩĩwa.
28 Nũndũ Yeova akatw’a sila ĩũlũ wa nthĩ, na akaũmina na akeeka ũu na mĩtũkĩ.”
29 O na ĩngĩ, o tondũ Isaia wathanie: “Ta kethĩwa Yeova wa nguthu ndaatialya ũsyao kwondũ witũ, twĩthĩwa twatw’ĩkie ta Sotomo, na twĩthĩwa twavw’ananie na Ngomola.”
30 Kwoou twĩasya ata ĩndĩ? O na kau andũ ma mbaĩ ingĩ mayaatĩĩaa ũlũngalu, nĩmakwatie ũlũngalu, ũlũngalu ũla wumanaa na mũĩkĩĩo;
31 ĩndĩ o na kau Aisilaeli nĩmatataa kũatĩĩa mĩao ya ũlũngalu, mayaamĩkwata vyũ.
32 Nũndũ wa kĩtumi kĩva? Nĩkwĩthĩwa mamĩatĩĩaa kwa nzĩa ya meko, ĩndĩ ti kwa nzĩa ya mũĩkĩĩo. Nĩmalulutĩkilw’e nĩ “ĩvia ya kũlulutĩkya”;
33 o tondũ kũandĩkĩtwe: “Sisya! Nĩngwia Saioni ĩvia ya kũlulutĩkya, na ĩvia ĩnene ya kũtulya, ĩndĩ ũla ũkayĩĩkĩĩa ndakasonoka.”
