Mwambĩlĩĩlyo 45:1-28
45 Ĩtina wa ũu, Yosevu nĩwaemiwe nĩ kwĩsiĩĩa e mbee wa athũkũmi make onthe. Na kwoou asya ũũ na wasya mũnene: “Umaalyai kĩla mũndũ!” Na vai mũndũ waatiwa na Yosevu yĩla weemanyĩthanasya kwa ana-a-ĩthe.
2 Na Yosevu ambĩĩa kũĩa na wasya mũnene mũno nginya Amisili mamwĩwʼa na nyũmba ya Valao yeewʼa.
3 Mũthya, Yosevu eeie ana-a-ĩthe atĩĩ: “Ninyie Yosevu. Ĩthe wakwa e o thayũ?” Ĩndĩ ana-a-ĩthe mayaĩ matonya kũmũtavya ndeto o na ĩmwe, nĩkwĩthĩwa nĩmatelemete nũndũ wake.
4 Kwoou Yosevu eea ana-a-ĩthe atĩĩ: “Nthengeeai, nĩngũmwĩsũva.” Namo mamũthengeea.
Na ĩndĩ asya: “Ninyie Yosevu mwana-a-ĩthe wenyu, ũla mwathooisye Misili.
5 Ĩndĩ yu mũikathĩnĩke na mũikatetanyʼe nũndũ wa kwĩthĩwa mwanthooisye kũũ; nũndũ Ngai nũndũmĩte mbee wenyu kwondũ wa kũtangĩĩa mathayũ.
6 Ũũ nĩ mwaka wa kelĩ kuma yĩla yũa yakwatie nthĩ, na ve myaka ĩngĩ itano yũkĩte kũteĩthĩwa na nĩma kana ngetha.
7 Ĩndĩ Ngai nĩwandũmie mbee wenyu nĩ kana nĩmũsũvĩĩe nzyawa* ĩũlũ wa nthĩ na nĩ kana mwone ũtangĩĩo mũnene na mũiendeea kwĩkala thayũ.
8 Kwoou, ti inywʼĩ mwandũmie kũũ, ĩndĩ nĩ Ngai ũla wa w’o wandũmie, nĩ kana anyuve nĩthĩwe mũtai mũnene* wa Valao na mwĩai wa nyũmba yake yonthe na mũtongoi ĩũlũ wa nthĩ yonthe ya Misili.
9 “Syokai na mĩtũkĩ kũla kwĩ ĩthe wakwa, nenyu no nginya mũmwĩe, ‘Ũũ nĩwʼo mwanau Yosevu waisye: “Ngai nũnyuvĩte nĩthĩwe mwĩai ĩũlũ wa Misili yonthe. Theea kũũ nĩĩ. Na ndũkekale.
10 Naku ũkatũa nthĩ ya Ngoseni, nũndũ wĩ vau ũkeethĩwa vakuvĩ nakwa; ũkatũa vo wĩ na ana maku, esũkũũu, ndĩthya syaku, na kyonthe kĩla wĩ nakyo.
11 Ngakũeteae lĩu vau nũndũ ve myaka ĩtano ĩtialĩte ya yũa. Walea kwĩka ũu, ũkakwatwa nĩ ũkya, we na nyũmba yaku na kyonthe kĩla wĩ nakyo.”’
12 Inywʼĩ vamwe na mwana-a-mwaitũ Mbenyamini nĩmwene na metho menyu kana kwa wʼo ki ninyie ngũneena nenyu.
13 Na kwoou no nginya mũtavye nau ĩũlũ wa ndaĩa yonthe ĩla nĩ nayo kũũ Misili na maũndũ onthe ala mwonete. Yu endai mwĩkalaatĩte na mũitheesya ĩthe wakwa vaa.”
14 Nĩvo ĩndĩ Yosevu wakumbatĩie* mwana-a-inyia Mbenyamini na aĩa mũno, na Mbenyamini aĩĩa ngingonĩ yake amũkumbatĩe na moko make.
15 Na amumunya ana-a-ĩthe onthe na amaĩĩa, na ĩtina wa ũu, ana-a-ĩthe maneena nake.
16 Nĩvo ĩndĩ nyũmba ya Valao yavikĩiwʼe ũvoo ũũ: “Ana-a-ĩthe ma Yosevu nĩmooka!” Na ũndũ ũsu waĩ mũseo methonĩ ma Valao na athũkũmi make.
17 Kwoou Valao eea Yosevu: “Neena na ana-a-ĩthe maku na ũimea, ‘Ĩkai ũũ: Tũlyai syĩndũ syenyu nyamũnĩ syenyu na mũithi nthĩ ya Kanaanĩ,
18 na mũyosa ĩthe wenyu na mĩsyĩ yenyu na mũyũka kũũ nĩĩ. Nakwa ngamũnenga syĩndũ nzeo sya nthĩ ya Misili, na mũkaĩsaa ũsyao wa kĩsio kĩla kĩnou kya* ĩ nthĩ.’
19 Na nĩkwĩaĩa ũmee atĩĩ: ‘Ĩkai ũũ: Osai makasya kuma nthĩ ya Misili kwondũ wa syana syenyu na iveti syenyu, na no nginya mũlikye ĩthe wenyu ĩkasyanĩ yĩmwe katĩ wa asu na mũimũete vaa.
20 Mũikathĩnĩke nĩ malĩ ĩla mwĩ nayo, nũndũ kĩsio kĩla kĩseo vyũ kya nthĩ yonthe ya Misili nĩ kyenyu.’”
21 Na ũu nĩwʼo ana ma Isilaeli meekie, na Yosevu amanenga makasya kwosana na ũndũ Valao wamwĩaĩe, na amanenga syĩndũ sya kũtũmĩa me kyalonĩ.
22 Kĩla ũmwe woo nĩwamũnengie ngũa ya kũsenzya, ĩndĩ Mbenyamini amũnengie ilungu 300 sya vetha na ngũa itano sya kũsenzya.
23 Na anenganĩa ĩthe syĩndũ ii: mangʼoi ĩkũmi makuĩte syĩndũ nzeo sya Misili na mangʼoi maka ĩkũmi makuĩte lĩu wa mbaa ngetha na mũkate na malĩu angĩ ala ĩthe ũtonya kũtũmĩa e kyalonĩ.
24 Kwoou aeka ana-a-ĩthe mathi, ĩndĩ matanakũsya amea: “Mũikatetanĩsye nzĩanĩ.”
25 Na ĩndĩ mambata kuma nthĩ ya Misili na mavika nthĩ ya Kanaanĩ kũla kwĩ ĩthe woo Yakovo.
26 Nĩvo ĩndĩ mamwĩie: “Yosevu e o thayũ, na nĩwe mũtongoi ĩũlũ wa nthĩ yonthe ya Misili!” Ĩndĩ ngoo ya Yakovo yathitha* nũndũ ndamaĩkĩĩaa.
27 Yĩla maendeeie kũtavya ĩthe woo Yakovo ndeto syonthe ila Yosevu wamatavĩtye na yĩla woonie makasya ala Yosevu wanenganĩte mamũkue, veva wake wambĩĩa kũvuũka.
28 Nĩvo ĩndĩ Isilaeli waisye ũũ aseng’ete: “Nũu! Mwanawa Yosevu e o thayũ! Na yu no nginya nĩthi ngamwone ndanakwʼa!”
Maelesyo ma Kwongeleela
^ Ndeto kwa ndeto, “ũtialo.”
^ Ndeto kwa ndeto, “ta ĩthe.”
^ Ndeto kwa ndeto, “wavalũkile ngingonĩ ya.”
^ Kana “mũkaĩsaa ũnou wa.”
^ Kana “Ĩndĩ Yakovo atelema mũno.”
