Mwambĩlĩĩlyo 28:1-22
28 Kwoou Isaka eeta Yakovo na amũathima na amwĩaĩa, aimwĩa: “Ndũkamanthe kĩveti katĩ wa eĩtu ma Kanaanĩ.
2 Enda Vatani-alamu, nyũmbanĩ ya Mbethueli, ĩthe wa inyia waku, na kuma vau ũimantha kĩveti katĩ wa eĩtu ma Lavani, ũla ũsyaanĩwʼe na inyia waku.
3 Ngai Mwene Vinya W’onthe akakũathima na akatuma wĩthĩwa na ũsyao na wongeleka, na vate ndĩi, ũkatwʼĩka nguthu ya ngo sya andũ.
4 Na akaũnenga ũathimo wa Avalaamu, we vamwe na ũsyao waku,* nĩ kana wĩyosee nthĩ ĩno wĩkalaa wĩ mũeni, ĩla Ngai ũnengete Avalaamu.”
5 Kwoou Isaka aeka Yakovo athi. Na Yakovo ambĩĩsya kyalo nĩ kana athi Vatani-alamu kwa Lavani mwana wa Mbethueli, ũla waĩ Mũalamu. Lavani aĩ mwana-a-inyia wa Leveka, na Leveka nĩwe waĩ inyia wa Yakovo na Esaũ.
6 Na Esaũ amanya kana Isaka nĩwamũathima Yakovo na amũeka athi Vatani-alamu akamanthe kĩveti kũu, na amanya kana aimũathima amwĩaĩe ũũ: “Ndũkamanthe kĩveti katĩ wa eĩtu ma Kanaanĩ.”
7 O na nĩwamanyie kana Yakovo nũmwĩwie ĩthe na inyia na akwata nzĩa athi Vatani-alamu.
8 Nĩvo ĩndĩ Esaũ woonie kana eĩtu ma Kanaanĩ mayamwendeeasya ĩthe wake Isaka.
9 Na kwoou o na kau Esaũ aĩ na iveti ingĩ, nĩwaendie Isimaeli kũmantha kĩveti, na atwaa Maalathi. Maalathi aĩ mwĩĩtu wa Isimaeli mwana wa Avalaamu, na asyaanĩwʼe na Nevaiothi.
10 Na Yakovo auma Mbeeli-sieva, na aendeea na kyalo kyake elekele Alani.
11 Ĩtina wa ĩvinda nĩwavikie vandũ, na eeyũmbanyʼa nĩ kana akomele vo nũndũ sua yaĩ yĩnathũa. Kwoou nĩwoosie ĩvia yĩmwe yaĩ vau na ayia nesa nĩ kana ailĩĩle mũtwe wake, na akoma vau.
12 Nĩvo ĩndĩ wambĩĩie kũota, na sisya! vaĩ na ngasi, na mũthya ũmwe wayo watinĩte nthĩ na ũla ũngĩ wambatĩte ũkavika matunĩ; na alaĩka ma Ngai nĩmambataa na kũtheea nayo.
13 Na sisya! Yeova aĩ ĩũlũ wa ngasi ĩsu. Nake nĩwaneenie na asya:
“Ninyie Yeova Ngai wa Avalaamu ĩthe waku na Ngai wa Isaka. Nthĩ ĩno ũkomete ũmũnthĩ, ngaũnenga we vamwe na ũsyao waku.*
14 Na vate nzika, ũsyao waku* ũkeethĩwa ta kĩtoo kya nthĩ. Naku ũkanyaĩĩka nthĩ yonthe, ngalĩko ya ũthũĩlonĩ wa sua na ya wumĩlonĩ wa sua, na ngalĩko ya ĩũlũ na ya ĩtheo; na vate ndĩi, kwĩsĩla kwaku na ũsyao waku* mĩsyĩ yonthe ĩũlũ wa nthĩ ĩkaathimwa.*
15 Nyie nĩ vamwe naku, na o na wathi va, ngaũsũvĩaa na ngaũtũnga nthĩ ĩno. Ndikaũtia nginya nĩanĩsye kĩla ngwathĩte.”
16 Na ĩndĩ Yakovo aamũka kuma toonĩ na asya: “Nĩ wʼo ki Yeova e vaa, na ndyĩĩsĩ ũu.”
17 Na alikwa nĩ wia, na aendeea kũneena, ayasya: “Vandũ vaa nĩ va kũsengyʼa! No nginya ĩno yĩthĩwe yĩ nyũmba ya Ngai, na ũũ nĩ mũvĩa wa matunĩ.”
18 Na kwoou Yakovo ookĩla kwakya tene na oosa yĩla ĩvia wathũmũĩtye mũtwe wake na ayĩũngamya ta kĩtuĩ na ayĩtĩkĩsya mauta.
19 Nĩvo ĩndĩ weetie vandũ vau Mbetheli,* ĩndĩ mbeenĩ ndũa ĩsu yeetawa Lusi.
20 Na ĩndĩ Yakovo eevĩta ayasya: “Ethĩwa Ngai nũkũendeea kwĩthĩwa nakwa na ainzũvĩa kyalonĩ kyakwa na ainenga mũkate nĩye na ngũa nĩkĩe
21 na ndyĩsa kũsyoka na mũuo nyũmbanĩ ya ĩthe-akwa, nĩvo ĩndĩ Yeova ũkethĩwa aĩkĩĩthya kana we nĩ Ngai wakwa.
22 Na ĩvia yĩĩ naũngamya vaa ta kĩtuĩ yĩkeethĩawa nyũmba ya Ngai, na ndikaalea kũũnenga kĩlungu kya ĩkũmi kya kyonthe kĩla wĩnenga.”
Maelesyo ma Kwongeleela
^ Ndeto kwa ndeto, “mbeũ yaku.”
^ Ndeto kwa ndeto, “mbeũ yaku.”
^ Ndeto kwa ndeto, “mbeũ yaku.”
^ Ndeto kwa ndeto, “mbeũ yaku.”
^ Kana “ĩkeeyosea ũathimo.”
^ Ũalyũlo wayo nĩ “Nyũmba ya Ngai.”
