Kũtũngĩlĩĩlwa kwa Mĩao 12:1-32
12 “Ĩĩ nĩyo myolooto na sila ũla mwaĩlĩte kwĩthĩwa mwĩ metho mũatĩĩae mĩthenya yonthe ĩla mũkethĩwa thayũ mwĩ nthĩ ĩla Yeova Ngai wa aa-ĩthe menyu ũkũmũnenga mũmesye.
2 Mwaĩlĩte kwananga vyũ kũndũ kwʼonthe kũla mbaĩ ila mũkakĩlya vinya syĩthĩĩtwe iithaithĩa ngai syoo, kwĩthĩwe nĩ iĩmanĩ ndũlu kana nĩ tũlĩmanĩ kana ungu wa mũtĩ o na wĩva wĩ matũ maingĩ.
3 Mwaĩlĩte kũvalũkya ithembeo syoo, mwananganyʼe ituĩ syoo sya ũthaithi, mũvĩvye mĩtĩ yoo ya ũthaithi* na mwaki, na mũitemanga mĩvwʼanano myasũvye ya ngai syoo, nĩ kana mũvetange masyĩtwa masyo vandũnĩ vau.
4 “Muikathaithe Yeova Ngai wenyu na nzĩa ĩsu.
5 Vandũ va ũu, mũmanthei Yeova Ngai wenyu vandũ o na va vala ũkanyuva kwia ĩsyĩtwa yake na vandũ vala ũkekalaa katĩ wa mbaĩ syenyu syonthe, na endaai vo.
6 Vau nĩvo mwaĩlĩte kũetae nthembo syenyu sya kũvĩvw’a, nthembo ingĩ syenyu, ilungu syenyu sya ĩkũmi, mũvothi kuma mokonĩ menyu, nthembo syenyu sya wĩvĩto, nthembo syenyu sya ngenda, na makithathi ma* ngʼombe syenyu na ma malondu na mbũi syenyu.
7 No nginya inywʼĩ na mĩsyĩ yenyu mũĩĩe vau mbee wa Yeova Ngai wenyu na mũitanĩa wĩa wenyu wʼonthe, nũndũ Yeova Ngai wenyu nũmũathimĩte.
8 “Mũikeke ũndũ tũkwĩka vaa ũmũnthĩ, kĩla mũndũ ayĩka kĩla ũkwona kyaĩlĩte methonĩ make mwene,*
9 nũndũ mũinamba kũlika vandũ va kũthũmũa na ũtiĩwanĩ ũla Yeova Ngai wenyu ũkũmũnenga.
10 Yĩla mũkainga Yolotani na mũitũa nthĩ ĩla Yeova Ngai wenyu ũkũmũnenga mũmesye, vate ndĩi akamũnenga ũthũmũo kuma amaithanĩ menyu onthe ala mamũthyũlũlũkĩte, na mũkekalaa mwĩ asũvĩĩku.
11 Mũkaete syĩndũ syonthe ila ngũmwĩaĩa vala Yeova Ngai wenyu ũkanyuva ĩsyĩtwa yake yĩkalae; mũkaete nthembo syenyu sya kũvĩvw’a, nthembo ingĩ syenyu, ilungu syenyu sya ĩkũmi, mũvothi kuma mokonĩ menyu, na kĩla nthembo ya wĩvĩto ĩla mũkevĩtĩa Yeova.
12 Mũkatana mbee wa Yeova Ngai wenyu, inywʼĩ na ana menyu, eĩtu menyu, aũme menyu ngombo na aka menyu ngombo, na Mũlivai ũla wĩ ndũanĩ syenyu,* nũndũ we ndanengetwe kĩanda kana ũtiĩwa vamwe nenyu.
13 Ĩsũvĩei mũikathembee nthembo syenyu sya kũvĩvw’a vandũ vangĩ o na va vala mũkwona.
14 Mwaĩlĩte kũthembea nthembo sya kũvĩvw’a o vandũ vala Yeova wĩnyuva kĩsionĩ kĩmwe katĩ wa isio sya mbaĩ syenyu, na vau nĩvo mwaĩle kwĩkĩa maũndũ onthe ala ngũmwĩaĩa.
15 “Ĩndĩ ĩvinda o na yĩva yĩla mwenda kũya nyama,* no mũthĩnze nyamũ na mũiya nyama kwosana na ũathimo ũla Yeova Ngai wenyu ũmũnengete ndũanĩ syenyu syonthe.* Mũndũ mũvuku na mũndũ ũte mũvuku no aye, o ũndũ mũtonya kũya kĩlongʼa kana nthia.
16 Ĩndĩ mũikaye nthakame; mwaĩlĩte kũmĩta nthĩ ta kĩw’ũ.
17 Mũiketĩkĩlwʼa kũĩĩa ndũanĩ syenyu* kĩlungu kya ĩkũmi kya lĩu wenyu wa mbaa ngetha, mbinyu yenyu nzaũ, mauta menyu, makithathi ma* ngʼombe syenyu na ma mbũi na malondu menyu, nthembo o na yĩva ya nthembo syenyu sya wĩvĩto ila mweevĩta, nthembo syenyu sya ngenda, kana mũvothi kuma mokonĩ menyu.
18 Mwaĩlĩte kũĩĩa syĩndũ isu mbee wa Yeova Ngai wenyu vala Yeova Ngai wenyu wĩnyuva; mũkeeka ũu inywʼĩ na ana menyu, eĩtu menyu, athũkũmi menyu aũme na athũkũmi menyu aka, na Mũlivai ũla wĩ ndũanĩ syenyu;* na mũkatanĩa mbee wa Yeova Ngai wenyu wĩanĩ wenyu wʼonthe.
19 Ĩsũvĩei mũikalekeleelye Mũlivai ĩvinda yonthe yĩla mũkekala nthĩ yenyu.
20 “Yĩla Yeova Ngai wenyu ũkanenevangya kĩsio kyenyu, o tondũ ũmwathĩte, na mũyasya, ‘Nĩngwenda kũya nyama,’ nũndũ mwĩ na wendi* wa kũya nyama, no mũye nyama ĩvinda o na yĩva mwamyenda.*
21 Ethĩwa vala Yeova Ngai wenyu wanyuva kwia ĩsyĩtwa yake nĩ vaasa mũno nenyu, nĩvo ĩndĩ mwaĩlĩte kũthĩnza ngʼombe imwe syenyu kana mbũi na malondu amwe menyu ala Yeova ũmũnengete, o tondũ namwĩaĩa, na mwaĩlĩte kũĩĩa ndũanĩ syenyu* ĩvinda yonthe mwasyenda.*
22 No mũmĩye o ũndũ mũtonya kũya kĩlongʼa na nthia; mũndũ mũvuku na mũndũ ũte mũvuku no mamĩye.
23 Ĩndĩ tw’ai vyũ kana mũikaya nthakame, nũndũ nthakame nĩyo thayũ, na mũikaye thayũ vamwe na nyama.
24 Mũikamĩye. Mwaĩlĩte kũmĩta nthĩ ta kĩwʼũ.
25 Mũikamĩye, nĩ kana maũndũ menyu vamwe na ma syana syenyu ĩtina wenyu mathi nesa, nũndũ mwĩĩka kĩla kyaĩlĩte methonĩ ma Yeova.
26 Mwaĩlĩte kũete o syĩndũ syenyu ntheu vamwe na nthembo syenyu sya wĩvĩto yĩla mũkũka vala Yeova ũkanyuva.
27 Mũkaumĩsya nthembo syenyu sya kũvĩvw’a vau, nyama na nthakame, kĩthembeonĩ kya Yeova Ngai wenyu, na nthakame ya nthembo syenyu yaĩlĩte kwĩtwa ũtee wa kĩthembeo kya Yeova Ngai wenyu, ĩndĩ no mũye nyama.
28 “Ĩthĩwai metho mwĩwʼe ndeto ii syonthe ila ngũmwĩaĩa, nĩ kana maũndũ menyu maendae nesa na ma ana menyu ĩtina wenyu, nũndũ mwĩĩka kĩla kĩseo na kyaĩlĩte methonĩ ma Yeova Ngai wenyu.
29 “Yĩla Yeova Ngai wenyu ũkamina mbaĩ ila mũkakĩlya vinya, na yĩla mũkethĩwa mũtwĩe nthĩ yasyo,
30 ĩthĩwai mwĩ metho mũikalike kĩteinĩ o tasyo ĩtina wa mbaĩ isu kũminwa syume mbee wenyu. Mũikakũlye ĩũlũ wa ngai syoo, mũyasya, ‘Mbaĩ ino syathaithaa ngai syoo ata? O nakwa nĩĩka o tasyo.’
31 Mũikeke Yeova Ngai wenyu ũu, nũndũ mekaa ngai syoo kĩla mũthemba wa maũndũ ma kũthatya ala Yeova ũmenete, o na nĩmavĩvasya ana na eĩtu moo na mwaki kwondũ wa ngai syoo.
32 Kĩla ndeto ngũmwĩaĩa mwaĩlĩte kwĩthĩwa mwĩ metho mũmĩke. Mũyaĩlĩte kũmyongela kana kũmĩolanga.
Maelesyo ma Kwongeleela
^ Kana “kĩla kĩsyaĩtwe mbee kya.”
^ Kana “ũkũsũanĩa ta kyaĩlĩte.”
^ Ndeto kwa ndeto, “nthĩnĩ wa mĩvĩa yenyu.”
^ Kana “wendinĩ wʼonthe wa mathayũ menyu.”
^ Ndeto kwa ndeto, “nthĩnĩ wa mĩvĩa yenyu yonthe.”
^ Ndeto kwa ndeto, “nthĩnĩ wa mĩvĩa yenyu.”
^ Kana “kĩla kĩsyaĩtwe mbee kya.”
^ Ndeto kwa ndeto, “nthĩnĩ wa mĩvĩa yenyu.”
^ Kana “mathayũ menyu me na wendi.”
^ Kana “wendinĩ wʼonthe wa mathayũ menyu.”
^ Ndeto kwa ndeto, “nthĩnĩ wa mĩvĩa yenyu.”
^ Kana “wendinĩ wʼonthe wa mathayũ menyu.”
