Luka 10:1-42
10 Na ĩtina wa maũndũ asu Mwĩaĩi anyuva angĩ 70 na amatũma elĩ elĩ mathi mbee wake malike kĩla ndũa na kĩla vandũ we mwene waĩ athi.
2 Nĩvo ĩndĩ wameie: “Ngetha nĩ nene, ĩndĩ atethya ma wĩa nĩ anini. Kwoou, voyai Mũnene wa ngetha atũme atethya ma wĩa ngethanĩ yake.
3 Endai! Sisyai! nĩngũmũtũma ta tũtena twa malondu katĩ wa nzũi.
4 Mũikakue mũvuko wa mbesa kana mũvuko wa lĩu kana iatũ, na mũikakethye mũndũ o na ũmwe nzĩanĩ.
5 Nyũmba o na yĩva ĩla mwĩlika, ambai kwasya: ‘Mũuo nĩwĩthĩwe nyũmbanĩ ĩno.’
6 Na ethĩwa ve mũndũ wendete mũuo nyũmbanĩ ĩsu, mũuo wenyu ũkeethĩwa vamwe nake. Ĩndĩ ethĩwa nde vo, ũkamũsyokea.
7 Kwoou ĩkalai nyũmbanĩ ĩsu mũkĩya na kũnyw’a syĩndũ ila memũnenga, nũndũ mũtethya wa wĩa nĩwaĩle kũnengwa ndĩvi yake. Mũikatindĩe kũthama kuma nyũmba ĩmwe kũthi ĩngĩ.
8 “O na ĩngĩ, ndũa o na yĩva ĩla mwĩlika na maimũthokya, yai kĩla mwĩnengwa
9 na mũivosya ala awau ndũanĩ ĩsu, na mũimea: ‘Ũsumbĩ wa Ngai wĩ vakuvĩ nenyu.’
10 Ĩndĩ ndũa o na yĩva ĩla mwĩlika na mailea kũmũthokya, endai nzĩanĩ syayo nene, na mũkyasya:
11 ‘O na kĩtoo kya ndũa yenyu kĩla kĩkwatĩte maaũ maitũ nĩtũũmũtuangĩa. Ĩndĩ manyai ũndũ ũũ, kana Ũsumbĩ wa Ngai nĩ mũthengeeu.’
12 Nĩmũtavya kana mũthenya ũsu ũsilĩlo wa Sotomo ũkeethĩwa wĩ kavaa kwĩ wa ndũa ĩsu.
13 “Kyeva nĩ kwaku we Kolasini! Kyeva nĩ kwaku we Vethisaita! nũndũ ta kethĩwa syama ila syeekĩkie nthĩnĩ waku syeekĩkie Tile na Sitoni, methĩwa meelilile tene mũno, mekĩĩte ngũa sya makunia na makeyũmba mũu.
14 Kwondũ wa ũu, ũsilĩlo wa Tile na Sitoni ũkeethĩwa wĩ kavaa kwĩ wenyu.
15 Naku we Kavelinaumi, ũkookĩlw’a kũvika ĩtunĩ? Aiee, ũkatheea nginya Mbũanĩ!*
16 “Na mũndũ o na wĩva ũla ũmwĩthukĩĩasya ambĩthukĩĩasya nyie. Na mũndũ o na wĩva ũla ũmũvũthasya ambũthasya nyie. O na ĩngĩ, mũndũ o na wĩva ũla ũmbũthasya avũthasya Ũla wandũmie.”
17 Nĩvo ĩndĩ ala 70 masyokie me na ũtanu, makyasya: “Mwĩaĩi, o na ndaimoni niũtwĩnyivĩsya twatũmĩa ĩsyĩtwa yaku.”
18 Nake amea: “Nĩngwona Satani avalũkĩte kuma ĩtunĩ ta ũtisi.
19 Sisyai! nĩnamũnenga ũkũmũ wa kũkinyanga nzoka na ing’auĩ, na ũkũmũ ĩũlũ wa vinya w’onthe wa mũmaitha, na vaiĩ kĩndũ kĩkamũũmĩsya.
20 Ĩndĩ mũikatane nĩkwĩthĩwa maveva nĩmeũmwĩnyivĩsya, ĩndĩ tanai nũndũ masyĩtwa menyu nĩmaandĩke ĩtunĩ.”
21 Na saanĩ o ũsu atana mũno nthĩnĩ wa veva mũtheu, na asya: “Nĩngũũkumya ũtheinĩ, Asa, Mwĩaĩi wa ĩtu na nthĩ, nũndũ maũndũ aa nĩwavithie ala oĩ na me na ũmanyi, ĩndĩ wavuanĩsya syana nini. Ĩĩ, Asa, nũndũ ũu nĩw’o ũkwendeeasya.
22 Asa wakwa nũnengete syĩndũ syonthe, na vaiĩ mũndũ wĩsĩ Mwana nũũ ate o Asa, na vaiĩ mũndũ wĩsĩ Asa nũũ ate o Mwana vamwe na o ũla Mwana wendaa kũmũvuanĩsya.”
23 Amina ũu ethyũũĩa amanyĩw’a make na amatavya ũũ me oka: “Nĩ matanu metho ala mekwona maũndũ ala mũkwona.
24 Nũndũ nĩngũmwĩa, athani aingĩ na asumbĩ nĩmendie mũno kwona maũndũ ala mũkwona ĩndĩ mayaamona, na kwĩw’a maũndũ ala mũkwĩw’a ĩndĩ mayaamew’a.”
25 Na sisya! mũndũ ũmwe weesĩ Mĩao nesa nĩwaũngamie nĩ kana amũtate, na amũkũlya: “Mũmanyĩsya, naĩle kwĩka ata nĩ kana nĩkwata thayũ wa tene na tene?”
26 Nake amũkũlya: “Nĩ kyaũ kĩandĩkĩtwe Mĩaonĩ? Ũsomaa ata?”
27 Nake amũsũngĩa, amwĩa: “‘No nginya ũmwende Yeova Ngai waku na ngoo yaku yonthe, na thayũ waku w’onthe, na vinya waku w’onthe, na kĩlĩko kyaku kyonthe,’ na ‘mũtũi waku o ũndũ wĩyendete.’”
28 Nake amwĩa: “Nĩwasũngĩa nesa; endeea kwĩka ũu na ũkakwata thayũ.”
29 Ĩndĩ ayenda kwonany’a kana we nĩ mũlũngalu, mũndũ ũsu amũkũlya Yesũ: “Kwa w’o mũtũi wakwa nũũ?”
30 Yesũ amũsũngĩa, amwĩa: “Vaĩ mũndũ ũmwe waumĩte Yelusaleme atheeete Yeliko na avithũkĩwa nĩ ing’ei na syamumya ngũa, syamũvũa, na syathi syamũtia akilyĩ kũkw’a.
31 Na kweethĩwa mũthembi ũmwe nĩwatheeete na nzĩa ĩsu, ĩndĩ yĩla wamwonie esĩla ngalĩko ĩla ĩngĩ.
32 O nake Mũlivai yĩla wavikie vau na amwona, esĩla ngalĩko ĩla ĩngĩ.
33 Ĩndĩ Mũsamalia ũmwe esĩle nzĩanĩ ĩsu nĩwavikie vala waĩ, na yĩla wamwonie amwĩw’ĩa tei mũno.
34 Kwoou amũthengeea na oova itau syake, na asyĩtĩkĩsya mauta na mbinyu. Na amũlĩsya nyamũnĩ yake, amũtwaa mũkaawanĩ, na amũsũvĩa.
35 Na ũnĩ wake aumya ndinalĩ ilĩ amũnenga mũsũvĩi wa mũkaawa, akĩmwĩa: ‘Mũsũvĩe, na watũmĩa ingĩ eka ii, ngakũĩva yĩla nĩsyoka.’
36 We wĩona katĩ wa andũ asu me atatũ nũũ ũla woonanisye kana nĩ mũtũi wa mũndũ ũsu wavithũkĩiwe nĩ ing’ei?”
37 Nake asya: “Nĩ ũla wamwĩw’ĩie tei.” Na ĩndĩ Yesũ amwĩa: “Enda o naku ũkeke oou.”
38 Na maendete nzĩanĩ, alika ũtũinĩ mũna. Na vau mũndũ mũka weetawa Matha amũthokya ethĩwe mũeni nyũmbanĩ kwake.
39 Nake aĩ na mwĩĩtu-a-inyia weetawa Meli, ũla wekalile nthĩ maaũnĩ ma Mwĩaĩi na aendeea kwĩthukĩĩsya kĩla waneenaa.*
40 Ĩndĩ Matha ndaĩ atonya kwĩthukĩĩsya nũndũ wa kũvĩngĩĩswa nĩ mawĩa maingĩ ala watethasya. Kwoou ooka vala ve Yesũ, na amwĩa: “Mwĩaĩi, we no ũkwona kana mwĩĩtu-a-ia andekanĩisye na wĩa ndethye nĩ nyioka? Mwĩe oke andetheesye.”
41 Nake Mwĩaĩi amũsũngĩa, amwĩa: “Matha, Matha, nũkwĩmakĩa na kũthĩnĩka ĩũlũ wa maũndũ maingĩ.
42 Ĩndĩ no maũndũ manini mekwendeka, kana ũndũ o ũmwe. Meli anyuvie ũndũ mũseo,* na ndakavenwa.”
Maelesyo ma kwongeleela
^ Kana “Andesi,” ũu nĩ kwasya, mbũa ya andũ onthe. Sisya Maelesyo ma Ndeto.
^ Ndeto kwa ndeto, “ndeto yake.”
^ Kana “ũndũ ũla mũseo vyũ.”
