Meko ma Atũmwa 9:1-43
9 Ĩndĩ Saulo, o aendeee kũmatĩsya na ayenda mũno kũmoaa amanyĩw’a ma Mwĩaĩi, nĩwaendie kwa mũthembi mũnene
2 na amwĩtya mavalũa athi masinakokenĩ ma Ndamasiku, nĩ kana eethĩa andũ o na meva ma Ĩla Nzĩa, methĩwe nĩ aũme kana nĩ aka, amaete Yelusaleme me ove.
3 Na e nzĩanĩ, akilyĩ kũvika Ndamasiku, o mĩtũkĩ kyeni kyauma ĩtunĩ na kyamulĩka ngalĩko syonthe vala waĩ,
4 na avalũka nthĩ na eew’a wasya ũineena nake, ũkĩmwĩa: “Saulo, Saulo, nĩkĩ ũũnthĩny’a?”
5 Nake akũlya: “Nue ũũ, Mwĩaĩi?” Nake asya: “Ninyie Yesũ, ũla ũũthĩny’a.
6 Ĩndĩ ũkĩla na ũithi ndũanĩ, na nũũtavw’a ũndũ waĩle kwĩka.”
7 Na andũ ala maendanĩtye nake maũngama mateũneena, mayĩw’a wasya, ĩndĩ mate kwona mũndũ o na ũmwe.
8 Na Saulo ookĩla, ĩndĩ o na kau nĩwasalukĩtye, ndaĩ atonya kwona kĩndũ. Kwoou mamũtongoesya mamũkwete kw’oko na mamũtwaa Ndamasiku.
9 Na kwa mĩthenya ĩtatũ ndoonaa kĩndũ, na ndaaya kana kũnyw’a.
10 Na Ndamasiku kwaĩ mũmanyĩw’a weetawa Anania, na Mwĩaĩi amwĩa woninĩ atĩĩ: “Anania!” Nake asya: “Ninyioo, Mwĩaĩi.”
11 Na Mwĩaĩi amwĩa: “Ũkĩla na ũithi nzĩanĩ nene ĩla yĩtawa Ndũngalu, na wavika nyũmba kwa Yutasi ũikũlya mũndũ wĩtawa Saulo kuma Taliso. Nũndũ sisya! nũkũvoya,
12 na woninĩ nĩwonie mũndũ wĩtawa Anania ooka na amwilĩĩla moko nĩ kana atonye kwona ĩngĩ.”
13 Ĩndĩ Anania amũsũngĩa: “Mwĩaĩi, nĩnĩw’ĩte kuma andũnĩ aingĩ ĩũlũ wa mũndũ ũsu, na ĩũlũ wa maũndũ onthe mathũku ala ũmekĩte atheu maku Yelusaleme.
14 Na yu nũnengetwe ũkũmũ nĩ anene ma athembi wa kũmakwata* onthe ala mawetaa ĩsyĩtwa yaku.”
15 Ĩndĩ Mwĩaĩi amwĩa: “Enda! nũndũ mũndũ ũsu nĩ mũio wakwa nĩnyuvĩte nĩ kana atavany’e ĩsyĩtwa yakwa kwa andũ ma mbaĩ ingĩ, o na kwa asumbĩ na ana ma Isilaeli.
16 Nakwa nĩngũmwony’a ũtheinĩ mathĩna ala memũkwata kwondũ wa ĩsyĩtwa yakwa.”
17 Kwoou Anania athi alika nyũmbanĩ ĩsu, na amwilĩĩla moko na amwĩa: “Saulo, mwana-a-asa, Mwĩaĩi Yesũ, ũla ũnakumĩlĩile wĩ nzĩanĩ ĩla ũnookĩte nayo, nĩwandũma nĩ kana ũtonye kwona ĩngĩ na ũyusũwa nĩ veva mũtheu.”
18 Na vau kwa vau, syĩndũ iilye ta makwaũ syavalũka kuma methonĩ make, na ambĩĩa kwona ĩngĩ. Na ĩndĩ ookĩla na avatiswa,
19 na aya lĩu na akwata vinya.
Na ekala mĩthenya yĩana ũndũ mũna e na amanyĩw’a ala maĩ Ndamasiku,
20 na o mĩtũkĩ ambĩĩa kũtavany’a masinakokenĩ ĩũlũ wa Yesũ, akyasya kana ũsu nĩwe Mwana wa Ngai.
21 Ĩndĩ onthe ala mamwĩw’aa nĩmaseng’aa, na maikũlya atĩĩ: “We mũndũ ũũ tyo ũla ũnamathĩnasya mũno ala mawetaa ĩsyĩtwa yĩu kũya Yelusaleme? Na kĩeleelo kyake kya kũka kũũ tyo kũmakwata na kũmatwaa* kwa anene ma athembi?”
22 Ĩndĩ Saulo aendeea kũkwata vinya mwingĩ, na nĩwamasaanĩasya Ayuti ala mekalaa Ndamasiku, kwa kwonany’a nesa vyũ kana Yesũ nĩwe Klĩsto.
23 Na ĩtina wa mĩthenya mingĩ, Ayuti nĩmasamanie vamwe mamũae.
24 Ĩndĩ Saulo nĩwamanyie mũvango ũsu woo. O na ĩngĩ, nĩmasyaĩĩasya mĩvĩa nesa mũthenya na ũtukũ nĩ kana mamũae.
25 Kwoou amanyĩw’a make mamwosa ũtukũ na mamũtheelelya ndĩlĩsyanĩ yaĩ ũkũtanĩ, e kĩkavũnĩ.
26 Yĩla wavikie Yelusaleme, nĩwatatie kũvulana na amanyĩw’a, ĩndĩ onthe nĩmamũkĩaa, nũndũ mayaĩkĩĩaa kana we nĩ mũmanyĩw’a.
27 Kwoou Valanava amũtetheesya na amũtwaa kũla kwĩ atũmwa, na amaelesya nesa ũndũ Saulo e nzĩanĩ wamwonie Mwĩaĩi na Mwĩaĩi aneena nake, na ũndũ e Ndamasiku waneenaa na ũkũmbaũ ĩsyĩtwanĩ ya Yesũ.
28 Kwoou nĩwekalanilye namo, na nĩwaendaa kĩla vandũ* Yelusaleme, na kũneena na ũkũmbaũ ĩsyĩtwanĩ ya Mwĩaĩi.
29 Nĩwaneenaa na kũkananĩa na Ayuti ala maneenaa Kĩkiliki, ĩndĩ asu nĩmamanthaa ũndũ meũmũaa.
30 Yĩla ana-a-asa mamanyie ũu, nĩmamũtheeisye Kaisalea na mamwĩa athi Taliso.
31 Na ĩndĩ ikundi syonthe sya Yutia na Kalilii na Samalia syeethĩwa na ĩvinda ya mũuo na kũlũlũmĩĩlw’a; na nũndũ wa kũmũkĩa Yeova na kũkiakiw’a nĩ veva mũtheu, nĩkweethĩiwe na wongeleku mũnene.
32 Na Vetelo aendeee kũtambũka kĩsionĩ kĩu kyonthe, nĩwatheeie kwa atheu ala mekalaa Lita.
33 Kũu nĩweethĩie mũndũ weetawa Ainea, ũla weethĩĩtwe ate kuma ũkomonĩ wake kwa ĩvinda ya myaka nyanya, nĩkwĩthĩwa aĩ mwonzu mamutha.
34 Na Vetelo amwĩa: “Ainea, Yesũ Klĩsto nĩwaũvosya. Ũkĩla na ũyalany’a ũkomo waku.” Na vau kwa vau ookĩla.
35 Yĩla onthe ala mekalaa Lita na Ũiĩnĩ wa Saloni mamwonie, nĩmamũĩkĩĩie Mwĩaĩi.
36 Na Yova kwaĩ mũmanyĩw’a weetawa Tavitha, na ũalyũlo wayo nĩ, “Ndolokasi.”* Mũndũ mũka ũsu nĩweekaa maũndũ maingĩ maseo na nĩwanenganae mĩthĩnzĩo mingĩ ya tei.
37 Ĩndĩ mĩthenyanĩ ĩsu nĩwawaie na akw’a. Kwoou mathambya mwĩĩ wake na mawia nyũmbanĩ ya ĩũlũ.
38 Na nũndũ Lita yaĩ vakuvĩ na Yova, yĩla amanyĩw’a meewie kana Vetelo aĩ ndũanĩ ĩsu, nĩmatũmie aũme elĩ vala ũĩ makamwĩe atĩĩ: “Mwa! ũka kwitũ na mĩtũkĩ.”
39 Kwoou Vetelo ookĩla na aendany’a namo. Na yĩla wavikie, mamũtwaa ĩla nyũmbanĩ ya ĩũlũ; na ndiwa syonthe syooka vala ũĩ, ikĩĩa na kũmwony’a ngũa mbingĩ na kanzũ* ila Ndolokasi ũnaitumĩaa yĩla ũnaĩ thayũ.
40 Kwoou Vetelo eea kĩla mũndũ aumaale, na atulya ndu na avoya. Na ĩndĩ eethyũũa asisya ũla mwĩĩ, na asya: “Tavitha, ũkĩla!” Na Tavitha asalukya, na amwona Vetelo, ekala nthĩ.
41 Na Vetelo amũkwata kw’oko amũkĩlya, na ameta atheu na ila ndiwa na amũnengane kwoo e thayũ.
42 Ũndũ ũsu nĩwamanyĩkie Yova yonthe, na aingĩ mamũĩkĩĩa Mwĩaĩi.
43 Vetelo nĩwekalile Yova mĩthenya mingĩ, na ekalaa na Simoni, ũla waĩ mũseũvya wa ithuma.
Maelesyo ma kwongeleela
^ Ndeto kwa ndeto, “kwova; kwĩkĩa kyovonĩ.”
^ Ndeto kwa ndeto, “nĩ kana amatwae me ove.”
^ Ndeto kwa ndeto, “nĩwalikaa na kumaala.”
^ Ũalyũlo wa ĩsyĩtwa ya Kĩkiliki Ndolokasi na ya Kĩalamu Tavitha nĩ, “Nthwaia.”
^ Kana “ngũa sya ĩũlũ.”
