Meko ma Atũmwa 23:1-35
23 Vaulo nĩwaketeeie Nzama ya Ayuti, na asya: “Ana-a-asa, nĩyĩkalĩtye mbee wa Ngai nĩ na wasya wa ngoo mũtheu vyũ kũvika ũmũnthĩ.”
2 Yĩla mũthembi mũnene Anania weewie ũu, eaĩa ala maũngamĩte vakuvĩ nake mamũkũne mũnuka.
3 Nake Vaulo amwĩa: “Ngai nũkũũkũna, we ũkũta mũvake sokaa. Wĩkalĩte kĩvĩlanĩ kya sila ũinzilĩla kwosana na Mĩao, na ĩvindanĩ o yĩu ũimĩtũla kwa kwĩaa nĩkũnwe?”
4 Ala maũngamĩte vakuvĩ nake mamũkũlya: “We wĩuma mũthembi mũnene wa Ngai?”
5 Nake Vaulo asya: “Ana-a-asa, nyie ndiũmanyaa kana nĩ mũthembi mũnene. Nũndũ nĩkũandĩkĩtwe, ‘Ndwaĩlĩte kũneena naĩ ĩũlũ wa mũtongoi wa andũ maku.’”
6 Na yĩla Vaulo wamanyie kana amwe moo maĩ Asatukai ĩndĩ ala angĩ maĩ Avalisi, aneena na wasya mũnene vau Nzamanĩ ya Ayuti, asya: “Ana-a-asa, nyie nĩ Mũvalisi, mwana wa Avalisi. Na yu nĩsilĩlwa nũndũ wa kwĩthĩwa na wĩkwatyo wa kana akw’ũ makathayũũkw’a.”
7 Na nũndũ wa kwasya ũu, nĩkwookĩlile ngananĩo katĩ wa Avalisi na Asatukai, na ũmbano waanĩka.
8 Nĩkwĩthĩwa Asatukai maasya kana kũi ũthayũũkyo kana alaĩka kana veva, ĩndĩ Avalisi nĩmetĩkĩlaa* kana syĩndũ isu syonthe syĩ kw’o.
9 Kwondũ wa ũu kwookĩla ithokoo, na aandĩki amwe ma kyama kya Avalisi mookĩla na mambĩĩa kũkananĩa mũno, makyasya: “Tũikwona ĩvĩtyo ya mũndũ ũũ, ĩndĩ ethĩwa veva kana mũlaĩka nũneenie nake—.”
10 Yĩla ngananĩo isu syongelekile mũno, mũnene wa ita nĩwakwatiwe nĩ wia ayona ta matonya kũtembũanga Vaulo mamũae, na eaĩa asikalĩ matheee mamwose kuma katĩ woo na maimũtwaa kambinĩ ya asikalĩ.
11 Ĩndĩ ũtukũ ũla waatĩĩe, Mwĩaĩi aũngama vakuvĩ nake, na amwĩa: “Ĩthĩwa na ũkũmbaũ! Nũndũ o tondũ wĩthĩĩtwe ũyumya ũkũsĩ mwĩanĩu ĩũlũ wakwa vaa Yelusaleme, o ta ũu no nginya umye ũkũsĩ Lomi.”
12 Na kwakya, Ayuti mavanga mũvango na meevĩta makyasya kana mo nĩmakwatwe nĩ kĩumo ethĩwa nĩmeũya kana kũnyw’a matamũaĩte Vaulo.
13 Na vaĩ aũme mbee wa 40 mũvangonĩ ũsu wa kwĩvĩta.
14 Aũme asu nĩmaendie kwa anene ma athembi na atumĩa, na masya: “Nĩtwĩvĩtĩte vyũ tũkasya nĩtũkwatwe nĩ kĩumo ethĩwa nĩtũũya kĩndũ o na kĩva tũtamũaĩte Vaulo.
15 Kwoou yu inyw’ĩ vamwe na Nzama ya Ayuti nĩmwaĩle kũtavya mũnene wa ita amũtheesye Vaulo oke kũla mũĩ mwĩtw’ĩkĩthĩtye mwĩenda kũmanya nesa ĩũlũ wa ĩkoani yake. Ĩndĩ atanathengeea, ithyĩ nĩtũkwĩthĩwa twĩyũmbanĩtye kũmũaa.”
16 Ĩndĩ mwanake ũmwe ũla inyia wake wasyaanĩw’e na Vaulo eew’a mũvango ũsu wa kũmwoveesya, na alika kambinĩ ya asikalĩ na atavya Vaulo ũndũ ũsu.
17 Nake Vaulo eeta ũmwe wa anene ma asikalĩ, na amwĩa: “Enda na mwanake ũũ kũla kwĩ mũnene wa ita, nũndũ e na ũndũ ũkwenda kũtavya mũnene ũsu.”
18 Kwoou amwosa na amũtwaa kũla kwĩ mũnene wa ita, na asya: “Ũla mwovwa wĩtawa Vaulo nĩwambĩta na ambĩa nĩete mwanake ũũ vala ũĩ nũndũ e na ũndũ ũkwenda kũũtavya.”
19 Nake mũnene ũsu wa ita amũkwata kw’oko na athi nake vandũ vate andũ, na amũkũlya: “Wĩenda kũmbĩa ata?”
20 Nake amwĩa: “Ayuti nĩmetĩkĩlanile kũũkũlya ũtheesye Vaulo ũnĩ kũla kwĩ Nzama ya Ayuti, metw’ĩkĩthĩtye meenda kũmanya maũndũ maingĩ ĩũlũ wa ĩkoani yake.
21 Ĩndĩ ndũketĩkĩlane namo, nũndũ aũme mbee wa 40 katĩ woo nĩmamwoveesye Vaulo, na nĩmevĩtĩte makasya nĩmakwatwe nĩ kĩumo ethĩwa nĩmeũya kana kũnyw’a matamũaĩte; na yu nĩmeyũmbanĩtye na meteele watho waku.”
22 Na mũnene ũsu wa ita aeka mwanake ũsu athi, ĩtina wa kũmwĩaĩa atĩĩ: “Ndũkatavye mũndũ o na ũmwe kana nĩwandavya ũndũ ũsu.”
23 Na eeta anene elĩ ma asikalĩ, na amea: “Ũmbany’ai asikalĩ 200 o vamwe na aũme 70 matũlĩte mbalasi na aũme 200 me na matumo, nĩ kana mathi nginya Kaisalea ta saa itatũ sya ũtukũ.*
24 Na mayosa mbalasi nĩ kana ikue Vaulo, na mũimũtwaa mũmũsũvĩĩte nginya avike kwa Ngavana Velike.”
25 Na aandĩka maũndũ aa valũanĩ:
26 “Kilautiosi Lisiasi kwa Mũtaĩwa, Ngavana Velike: Nĩnaũkethya!
27 Mũndũ ũũ nĩwakwatiwe nĩ Ayuti na maĩ vakuvĩ kũmũaa, ĩndĩ nooka na mĩtũkĩ nĩ na asikalĩ makwa na namũtangĩĩa, nĩkwĩthĩwa nĩnamanyie kana nĩ Mũlomi.
28 Na nũndũ nĩnendaa kũmanya kĩla kyatumaa mamũsikata, namũtheesya namũtwaa Nzamanĩ yoo.
29 Na neethĩa kana mamũsikatĩte nũndũ wa kũneena maũndũ meũleana na Mĩao yoo, na vaiĩ ũndũ o na ũmwe mamũsikatĩe ũtonya kũtuma oawa kana ovwa.
30 Ĩndĩ nũndũ nĩnataviw’e kana ve mũvango wa kũmũaa, nĩngũmũtũma kwaku na mĩtũkĩ na kwĩaĩa ala mamũsikatĩte maneene mbee waku kĩla mamũsikatĩe.”
31 Kwoou asikalĩ asu mamwosa Vaulo kwosana na ũndũ meeaĩwe na mamũtwaa na ũtukũ mamũvikya Andivatili.
32 Na ũnĩ wake mamũnengane kũla kwĩ aũme ala matũlĩte mbalasi mathi nake, namo masyoka kambinĩ ya asikalĩ.
33 Aũme asu matũlĩte mbalasi nĩmalikile Kaisalea na manenga ngavana ũla valũa na mamũnengane Vaulo kũla ũĩ.
34 Na aũsoma na akũlya kĩsio kĩla Vaulo wumĩte na eethĩa aumĩte Silisia.
35 Na ĩndĩ asya: “Ngakwĩthukĩĩsya nesa ala maũsikatĩte mooka.” Na aumya mwĩao atwawe nyũmbanĩ ya Mũsumbĩ Elote na aisungwa.
