Ũvuany’o 9:1-21
9 Na mũlaĩka wa katano avuva soo wake. Na noona ndata yaĩ ĩnavalũka nthĩ kuma ĩtunĩ, na anengwa ũvungũo wa yĩla ĩima yĩte kĩtulu.*
2 Na avingũa yĩla ĩima yĩte kĩtulu,* na syũki yĩilye ta syũki ya ĩiko ĩnene yambata kuma ĩimanĩ yĩu, na syũa yamesya kĩvindu, na nzeve o nayo yamesya kĩvindu, nũndũ wa syũki yĩla yaumĩte ĩimanĩ yĩu.
3 Na ngie syauma syũkinĩ yĩu syathi ĩũlũ wa nthĩ, na syanengwa ũkũmũ, o ta ũla wa ila ing’auĩ sya nthĩ.
4 Na syeewa iikanange nyeki sya nthĩ kana mũtĩ o na wĩva mwĩũ kana mũtĩ ũngĩ o na wĩva, ĩndĩ syanange o andũ ala mate na ũsiĩlo wa Ngai itulyanĩ syoo.
5 Na ngie isu syanengwa ũkũmũ wa kũmathĩny’a myei ĩtano, ĩndĩ iikamoae, na ũthĩny’o wasyo wailye ta wa kĩng’auĩ yĩla kyaũma mũndũ.
6 Mĩthenyanĩ ĩsu andũ makamantha kĩkw’ũ ĩndĩ maikakyona, na makenda kũkw’a, ĩndĩ kĩkw’ũ kĩkasemba kuma vala maĩ.
7 Na ngie isu syavw’anene na mbalasi syĩyũmbanĩtye kwondũ wa kaũ; na mĩtwenĩ yasyo syaĩ na syĩndũ iilye ngovia sya ũsumbĩ sya thaavu, na syaĩ na mothyũ mailye ma andũ,
8 ĩndĩ syaĩ na nzw’ĩĩ iilye sya aka. Na maeo masyo mailye ma mĩnyambũ,
9 na syaĩ na ngao sya kĩthũi iilye ngao sya kyũma. Na wasya wa nthwau syasyo waĩ ta wasya wa makasya makusĩtw’e nĩ mbalasi isembete kaũnĩ.
10 O na syaĩ na isithe syaĩ na mĩthya* ta ya ing’auĩ, na ũkũmũ wa kũthĩny’a andũ vandũ va myei ĩtano waĩ isithenĩ syasyo.
11 Na syaĩ na mũsumbĩ, mũlaĩka wa yĩla ĩima yĩte kĩtulu.* Ĩsyĩtwa yake kwa Kĩevelania nĩ Avatoni,* ĩndĩ kwa Kĩkiliki etawa Avolioni.*
12 Kyeva kya mbee nĩ kĩvĩtu. Sisya! Ve mavinda elĩ ma kyeva mokĩte ĩtina wa maũndũ asu.
13 Na mũlaĩka wa thanthatũ avuva soo wake. Na neew’a wasya kuma mbyanĩ sya kĩla kĩthembeo kya thaavu, kĩla kĩ mbee wa Ngai,
14 ũimwĩa ũla mũlaĩka wa thanthatũ waĩ na soo: “Thasya ala alaĩka ana movetwe ũsĩnĩ mũnene wa Euvalati.”
15 Na alaĩka asu ana ala moombanĩtw’e kwondũ wa ũla saa na mũthenya na mwei na mwaka nĩmathaiw’e nĩ kana moae kĩlungu kya katatũ kya andũ.
16 Na ũtalo wa ita sya ala makuĩtwe nĩ mbalasi waĩ makili mĩongo ĩlĩ kũndũ makili ĩkũmi; na nĩneewie ũtalo woo.
17 Na ũũ nĩw’o noonie ila mbalasi woninĩ na ala mekalĩte ĩũlũ wasyo: Maĩ na ngao sya kĩthũi sya langi mũtune ta mwaki na wa mbuluu na wa mũvĩlĩtĩ, na mĩtwe ya mbalasi isu yailye ya mĩnyambũ, na kwaumĩla mwaki na syũki na mũvĩlĩtĩ makanyw’anĩ masyo.
18 Na kĩlungu kya katatũ kya andũ nĩkyooaiwe nĩ mothĩny’o atatũ, namo nĩ mwaki na syũki na mũvĩlĩtĩ, ala maumie makanyw’anĩ masyo.
19 Nũndũ ũkũmũ wa mbalasi isu wĩ makanyw’anĩ masyo na isithenĩ syasyo, nũndũ isithe syasyo iilye nzoka na syĩ na mĩtwe, na itũmĩaa isithe isu kũũmĩsya.
20 Ĩndĩ andũ ala angĩ mataaũawa nĩ mothĩny’o asu mayaaĩlila kumana na mawĩa ma moko moo; mayaaeka kũthaitha ndaimoni na mĩvw’anano ya thaavu na ya vetha na ya ũthuku* na ya mbwaũ, ĩla ĩtatonya kwona kana kwĩw’a kana kũthi.
21 Na mayaaĩlila naĩ syoo ila mekĩte sya ũaani kana maũndũ ma ũwe kana ũlaalai* kana ũng’ei.
Maelesyo ma kwongeleela
^ Kana “aviso.” Sisya Maelesyo ma Ndeto.
^ Kana “aviso.” Sisya Maelesyo ma Ndeto.
^ Kana “moa.”
^ Kana “aviso.” Sisya Maelesyo ma Ndeto.
^ Ũalyũlo wayo nĩ, “Wanangĩko.”
^ Ũalyũlo wayo nĩ, “Mwanangi.”
^ Kĩsũngũ, copper.
^ Kĩkiliki, por·neiʹa. Sisya Maelesyo ma Ndeto.
