Ũvuany’o 4:1-11
4 Ĩtina wa maũndũ asu nĩnoonie, na sisya! mũomo mũvingũe ĩtunĩ, na wasya wa mbee ũla neewie ũineena nakwa waĩ ta wa soo, naw’o wambĩa: “Ambata kũũ, na nĩngũkwony’a maũndũ ala matalea kwĩkĩka.”
2 Ĩtina wa ũu, o mĩtũkĩ veva wa Ngai nĩwookie ĩũlũ wakwa, na sisya! noona kĩvĩla kya ũsumbĩ kĩ vandũ vakyo ĩtunĩ, na vaĩ ũmwe wekalĩte kĩvĩlanĩ kĩu kya ũsumbĩ.
3 Na Ũla wekalĩte kĩvĩlanĩ kĩu oonekaa ailye ĩvia ya yasivi na ĩvia ya salitũ, na kĩvĩla kĩu kya ũsumbĩ kyathyũlũlũkĩtwe nĩ ũtaathi ũilye sumalatai.
4 Na kĩvĩla kĩu kya ũsumbĩ kyathyũlũlũkĩtwe nĩ ivĩla 24 sya ũsumbĩ, na noona atumĩa 24 mekalĩte ivĩlanĩ isu sya ũsumbĩ mekĩĩte ngũa nzaũ, na mĩtwenĩ yoo me na ngovia sya ũsumbĩ sya thaavu.
5 Na kĩvĩlanĩ kĩu kya ũsumbĩ vauma ũtisi na mawasya na itundumo; na mbee wa kĩvĩla kĩu kya ũsumbĩ vaĩ taa mũonza sya mwaki wakanĩte, nasyo syĩonany’a ala maveva mũonza ma Ngai.
6 Na mbee wa kĩvĩla kĩu kya ũsumbĩ vaĩ kĩndũ ta ũkanga ũilye kĩoo, ta kĩoo kĩũkenga.
Na katĩkatĩ vala kĩvĩla kya ũsumbĩ kyaĩ, vaĩ syũmbe inya syĩ thayũ ila syathyũlũlũkĩte kĩvĩla kĩu, na syaĩ na metho mbee na ĩtina.
7 Kyũmbe kĩ thayũ kya mbee kyailye mũnyambũ, na kyũmbe kĩ thayũ kya kelĩ kyailye nzaũ, na kyũmbe kĩ thayũ kya katatũ kyaĩ na ũthyũ ũilye wa mũndũ, na kyũmbe kĩ thayũ kya kana kyailye ndiũ ĩũlũkĩte.
8 Na kĩla kĩmwe kya syũmbe isu inya syĩ thayũ kyaĩ na nthwau thanthatũ; na nthwau isu syaĩ na metho kĩla vandũ, o na ungu wasyo. Na mũthenya na ũtukũ iendeeaa kwasya: “Mũtheu, mũtheu, mũtheu nĩ Yeova Ngai, Mwene Vinya W’onthe, ũla waĩ kw’o na wĩ kw’o na wũkĩte.”
9 Ĩvinda yonthe yĩla syũmbe isu syĩ thayũ iũmũkumya na kũmũtaĩa na kũmũtũngĩa mũvea Ũla wĩkalĩte kĩvĩlanĩ kya ũsumbĩ, Ũla wĩkalaa tene na tene,
10 ala atumĩa 24 nĩmavalũkaa mbee wa Ũla wĩkalĩte kĩvĩlanĩ kya ũsumbĩ na maimũthaitha Ũla wĩkalaa tene na tene, na mayĩkya ngovia syoo sya ũsumbĩ mbee wa kĩvĩla kĩu kya ũsumbĩ, makyasya:
11 “Nĩwaĩlĩte we Yeova Ngai waitũ, kwĩthĩwa na nguma na ndaĩa na vinya, nũndũ nĩwoombie syĩndũ syonthe, na nũndũ wa kwenda kwaku nĩsyeethĩiwe kw’o na syoombwa.”
