Ĩtina wa mboka ya mũtwaano ĩla yaĩ Kena, Yesũ nĩwaendie taoninĩ ya Kavelinaumi. Aendie kw’o e na inyia, na ana-a-inyia make, ala nĩ Yakovo, Yosevu, Simoni, na Yutasi.

Ĩndĩ no twĩkũlye-ĩ, ‘Nĩkĩ Yesũ waendie taoninĩ ĩsu ya Kavelinaumi?’ Taoni ĩsu yaĩ nene na yaakĩtwe vandũ vaseo kũvĩtũka taoni ya Nasaleti na Kena. Ũndũ ũngĩ nĩ kana aingĩ ma amanyĩw’a ma mbee ma Yesũ mekalaa taoninĩ ĩsu kana isionĩ ila syaĩ vakuvĩ nayo. Kwoou Yesũ aĩ atonya kũmamanyĩsya me kĩsionĩ kĩla masyaĩwe.

Yesũ e taoninĩ ĩsu ya Kavelinaumi, nĩweekie maũndũ maingĩ ma kũsengy’a. Nũndũ wa ũu, andũ ala mekalaa taoninĩ ĩsu na isionĩ ila syaĩ vakuvĩ nayo nĩmamanyie maũndũ ala weekaa ndũanĩ ĩsu. Ĩndĩ Yesũ na amanyĩw’a make, ala maĩ Ayuti na meeyumĩtye vyũ kũmũthũkũma Ngai, nĩmaaĩle kũthi Yelusaleme kwondũ wa mboka ya Vasaka ya mwaka wa 30.

Yĩla maĩ ĩkalũnĩ Yelusaleme, amanyĩw’a ma Yesũ nĩmoonie ũndũ wa kwendeesya mũno ĩũlũ wake, na ũndũ ũsu waĩ kĩvathũkany’o na maũndũ ala moonete ayĩka mbeenĩ.

Mĩaonĩ ĩla Ngai wanengete Aisilaeli, ve ũmwe waĩtye kana mathi ĩkalũnĩ maĩle kumya nthembo sya nyamũ, na aeni ala mooka ĩkalũnĩ nĩmendaa lĩu ĩvindanĩ yĩla mekwĩkala Yelusaleme. Mĩao ĩsu nĩyeetĩkĩlĩtye Aisilaeli ala mekuma kũndũ kũasa moke na mbesa sya kũthooa “ng’ombe, kana malondu,” kana mbũi, na syĩndũ ingĩ ila mendaa kũtũmĩa me Yelusaleme. (Kũtũngĩlĩlwa Kwa Mĩao 14:24-26) Nĩ kana andũ makwate syĩndũ isu, akũni ma viasala ala maĩ Yelusaleme nĩmathooeasya andũ indo na nyũnyi vau ĩkalũnĩ. Akũni amwe ma viasala nĩmakengaa andũ kwa kũmathooesya syĩndũ thooa mũnene.

Yesũ oona ũu, nĩwathatie mũno na etanga mbesa sya ala mavunzasya mbesa, ang’uthũlanga mesa syoo, na amakuthũa ĩkalũnĩ. Amina kwĩka ũu, Yesũ ameie atĩĩ: “Vetai syĩndũ ii vaa! Ekai kũmĩtw’a nyũmba ya Asa wakwa nyũmba ya viasala!”—Yoana 2:16.

Yĩla amanyĩw’a ma Yesũ moonie maũndũ ala weeka, nĩmalilikanile wathani ũmwe wakonetye Mwana wa Ngai. Wathani ũsu waĩtye atĩĩ: “Kĩthito kwondũ wa nyũmba yaku kĩkandya.” Kĩvathũkany’o na woni wa amanyĩw’a, Ayuti mamũkũlilye-ĩ, “Nĩ kyama kĩva ũtonya kũtwony’a kya kũĩkĩĩthya kana Ngai nũkũnengete ũkũmũ wa kwĩka maũndũ aa?” Yesũ amasũngĩie amea: “Omboangai ĩkalũ yĩĩ, na ngayĩũngamya ĩngĩ ĩtina wa mĩthenya ĩtatũ.”—Yoana 2:17-19; Savuli 69:9.

Ayuti moonie Yesũ ta ũkũneenea ĩkalũ yĩu yaĩ Yelusaleme, na kwoou mamũkũlya atĩĩ: “Ĩkalũ yĩĩ yaakiwe myaka 46, na wĩasya ũkayĩũngamya ĩtina wa mĩthenya ĩtatũ?” (Yoana 2:20) Kĩvathũkany’o na woni woo, Yesũ awetie ĩkalũ aineenea ĩũlũ wa mwĩĩ wake. Amanyĩw’a make nĩmesie kũlilikana ndeto isu ĩtina wa myaka ĩtatũ yĩla Yesũ wakwie na athayũũka.