Ĩtina wa kũthayũũkwʼa, Yesũ nĩwavangie kũkomana na atũmwa make 11 kĩĩmanĩ kyaĩ Kalilii. Vau kĩĩmanĩ vaĩ amanyĩwʼa angĩ ta 500, na amwe moo nĩ ala maĩ na nzika mbeenĩ. (Mathayo 28:17; 1 Akolintho 15:6) Ĩndĩ ĩvindanĩ yĩĩ Yesũ nĩwawetie maũndũ maĩkĩĩthisye kĩla mũndũ waĩ vau kĩĩmanĩ kana kwa wʼo e thayũ.

Yesũ nĩwamaeleisye kana Ngai nũmũnengete ũkũmũ wʼonthe ĩtunĩ na ĩũlũ wa nthĩ. Nĩkyo kĩtumi wameie atĩĩ: “Endai ĩndĩ mũkatwʼĩkĩthye andũ ma mbaĩ syonthe amanyĩwʼa, na kũmavatisa ĩsyĩtwanĩ ya Asa na ya Mwana na ya veva mũtheu, na mũimamanyĩsya kũkwata maũndũ onthe ala namwĩaĩe.” (Mathayo 28:18-20) Kwoou, o vamwe na Yesũ kũĩkĩĩthya kana e thayũ, nĩwendaa amanyĩwʼa make maendeee kũtavanyʼa ũvoo mũseo.

Aatĩĩi onthe ma Yesũ, methĩwe nĩ aũme, aka, na syana, nĩmanengiwe wĩa wa kũtwʼĩkĩthya andũ amanyĩwʼa. O na kau andũ asu maĩ mavĩngwe mũno nĩ ala matendaa kwĩwʼa ũvoo mũseo, Yesũ amaĩkĩĩthisye amea: “Nĩnĩnengetwe ũkũmũ wʼonthe ĩtunĩ na kũũ nthĩ.” Ndeto isu sya Yesũ sya kana aĩ na ũkũmũ wʼonthe ĩtunĩ na kũũ nthĩ syesaa kũtetheesya aatĩĩi make ata? Ameie atĩĩ: “Sisyai! nyie nĩ vamwe nenyu mĩthenya yonthe nginya mũminũkĩlyo wa ĩvinda yĩĩ.” Yesũ ndaasya kana onthe ala makethĩwa maitavanyʼa ũvoo mũseo makeethĩwa na ũtonyi wa kwĩka syama. Ĩndĩ aisye kana onthe makatetheewʼa nĩ veva mũtheu maitethya wĩa ũsu.

Yesũ athayũũkwʼa, nĩwaumĩlĩĩile amanyĩwʼa make “kwa ĩvinda ya mĩthenya 40.” Nĩwamaumĩlĩĩile e na mwĩĩ wa nyama “mavinda maingĩ kwa nzĩa ikũĩkĩĩthya nesa vyũ kana aĩ thayũ” na amamanyĩsya “ĩũlũ wa Ũsumbĩ wa Ngai.”—Meko ma Atũmwa 1:3; 1 Akolintho 15:7.

Yesũ e o Kalilii vamwe na atũmwa make, nĩwamatavisye masyoke Yelusaleme. Ombanĩte namo, ameie atĩĩ: “Mũikaume Yelusaleme, ĩndĩ endeeai kweteela kĩla Asa wathanie, kĩla nyie namũtavisye; nĩkwĩthĩwa Yoana avatisaa na kĩwʼũ, ĩndĩ inywʼĩ mũkavatiswa na veva mũtheu ĩtina wa mĩthenya mĩnini.”—Meko ma Atũmwa 1:4, 5.

Ĩtina wa ĩvinda, Yesũ nĩwoombanie ĩngĩ na atũmwa make. Nĩwaendie namo “nginya Vethania,” ndũa ĩla yaĩ ngalĩko ya wumĩlonĩ wa syũa ya Kĩĩma kya Mĩthata. (Luka 24:50) O na kau Yesũ nĩwamatavĩtye maũndũ maingĩ ĩũlũ wa kũsyoka kwake ĩtunĩ, moonaa Ũsumbĩ wake ũkeethĩwa ĩũlũ wa nthĩ.—Luka 22:16, 18, 30; Yoana 14:2, 3.

Atũmwa mamũkũlilye Yesũ atĩĩ: “Mwĩaĩi, wĩtũngĩa Isilaeli ũsumbĩ ĩvindanĩ yĩĩ?” Yesũ amasũngĩie amea: “Ti ĩũlũ wenyu kũmanya saa kana mavinda ala Asa ũtwʼĩte.” Ĩtina Yesũ nĩwakindĩlĩĩile wĩa ũla maaĩle kũtethya kwa kũmea atĩĩ: “Mũkakwata vinya yĩla veva mũtheu wĩũka ĩũlũ wenyu, na mũkeethĩwa mwĩ ngũsĩ syakwa Yelusaleme, Yutia yonthe, na Samalia, na kũvika itulu sya nthĩ.”—Meko ma Atũmwa 1:6-8.

Atũmwa maĩ Kĩĩmanĩ kya Mĩthata yĩla Yesũ wambĩĩie kwambata ĩtunĩ. Ambatĩte, ĩtu nĩyamũvithanisye wesa kwĩthĩa maimwene. Yesũ athayũũkwʼa, ve mavinda weekĩaa mwĩĩ wa nyama. Ĩndĩ ĩvindanĩ yĩĩ, nĩwaumisye mwĩĩ ũsu weekĩĩte mũthenya ũsu na ambata ĩtunĩ e kyũmbe kya veva. (1 Akolintho 15:44, 50; 1 Vetelo 3:18) Atũmwa mamũsyaĩĩsye Yesũ, nĩmoonie “aũme elĩ mekĩe ngũa nzaũ” maũngama vakuvĩ namo. Aũme asu maĩ alaĩka meekĩĩte mĩĩ ya andũ. Makũlilye atũmwa atĩĩ: “Aũme ma Kalilii,  nĩkĩ mũũngamĩte mũsyaĩtye yayayanĩ? Yesũ ũsu wooswa kuma vala mũĩ na ambatwʼa ĩtunĩ akasyoka oou mwoona aithi ĩtunĩ.”—Meko ma Atũmwa 1:10, 11.

Yesũ ayuma ĩũlũ wa nthĩ, no andũ anini mamwonie, namo nĩ aatĩĩi make aĩkĩĩku. Yesũ aĩ ‘asyoke oou,’ atenekee nĩ andũ aingĩ. No aatĩĩi make me oka maĩ mamanye kũka kwake e Mũsumbĩ Ũsumbĩnĩ wa Ngai.

Atũmwa nĩmasyokie Yelusaleme. Mĩthenya ĩla yaatĩĩe, nĩmoombanie na amanyĩwʼa ala angĩ, na “Meli inyia wa Yesũ na ana-a-inyia make” maĩ vo. (Meko ma Atũmwa 1:14) Amanyĩwʼa asu moombanĩte nĩmavoyie na kĩthito. Ũndũ ũmwe watumaa mavoya nĩ kũnyuva mũmanyĩwʼa ũla waĩ ose mwanya wa Yutasi Isikalioti nĩ kana meanĩĩe atũmwa 12. (Mathayo 19:28) Mendaa mũmanyĩwʼa ũla woonete maũndũ onthe ala Yesũ weekie vamwe na kwona Yesũ e mũthayũũkye. Kwoou amanyĩwʼa asu nĩmakũnie kula nĩ kana mamanye kwenda kwa Ngai. Yĩĩ nĩyo ĩvinda ya mũthya Mbivilia kũweta ĩũlũ wa kũnyuva mũndũ kwa kũkũna kula. (Savuli 109:8; Nthimo 16:33) Mũmanyĩwʼa weetawa Mathia, ũla ũtonya kwĩthĩwa aĩ ũmwe wa ala 70 Yesũ watũmie makatavanyʼe, nĩwanyuviwe na “atalwa vamwe na ala atũmwa 11.”—Meko ma Atũmwa 1:26.

Mĩthenya ĩkũmi ĩtina wa Yesũ kwambata ĩtunĩ, Ayuti nĩmatanĩie mboka ya Vendekosito ya mwaka wa 33. Mũthenya ũsu amanyĩwʼa ta 120 nĩmoombanĩe nyũmbanĩ ya ĩũlũ Yelusaleme. O mĩtũkĩ, nĩkweewʼĩkie kelele ta wa kĩseve kĩkũuutana na vinya, na kyausũa nyũmba vala mailyĩ. Amanyĩwʼa asu nĩmoonie nĩmĩ iilye ta sya mwaki, na syavũĩla kĩla ũmwe woo. Onthe nĩmambĩĩie kũneena na ithyomo syĩ kĩvathũkanyʼo. Ũu woonanasya kana nĩmetĩkĩiwʼe veva mũtheu o tondũ Yesũ wathanĩte!—Yoana 14:26.