Kwakilyĩ kũkya yĩla Vetelo wamũkaĩie Yesũ ĩvinda ya katatũ. Na andũ ala maĩ Nzamanĩ ya Ayuti maĩ manamina kũmũsilĩla Yesũ kwa nzĩa ĩtaĩle na makataanĩsya. Ũnĩ ũsu kwakya tene, andũ asu nĩmoombanie ĩngĩ na nĩvatonyeka makethĩwa meekaa ũu nĩ kana ĩkoani yĩla meekie ũtukũ ũsu yoneke yaĩlĩte o na kau yĩyaaĩlĩte. Mũthenya ũsu waĩ Wakatano na Yesũ nĩwaetiwe mbee woo ĩngĩ.

Andũ ala mamũsilĩlaa Yesũ mamwĩie ĩngĩ atĩĩ: “Ethĩwa nue Klĩsto, tũtavye.” Nake Yesũ amasũngĩie amea: “O na ngamũtavya, mũiĩkĩĩa nongi. O na ĩngĩ, ngamũkũlya mũisũngĩa.” Ĩndĩ o na ũu wĩ o vo, Yesũ nĩwamaeleisye ate kũkĩa kĩndũ kana we nĩwe ũla wathanĩtwe ĩvukunĩ ya Ndanieli 7:13. Ameie atĩĩ: “Kuma yu na kũendeea, Mwana wa mũndũ akekala kw’okonĩ kwa aũme kwĩ vinya kwa Ngai.”—Luka 22:67-69; Mathayo 26:63.

Maendeeie kũmũkũlya atĩĩ: “Kwoou, we nue Mwana wa Ngai?” Nake amea: “Inyw’ĩ ene nĩmũkwasya ninyie we.” Andũ asu moonie makwata kĩtumi kĩanĩu kya kũmũsilĩla Yesũ kũawa kwa ĩvĩtyo ya kũmũuma Ngai. Kwoou makũlanilye atĩĩ: “Twĩmantha ũkũsĩ ũngĩ wakĩ?” (Luka 22:70, 71; Maliko 14:64) Na nũndũ wa ũu nĩmamwovie Yesũ na mamũtwaa kwa Ngavana Mũlomi weetawa Vondio Vilato.

Nĩvatonyeka Yutasi Isikalioti akethĩwa oonie Yesũ atwaĩtwe kwa Vilato. Yĩla Yutasi wamanyie kana Yesũ nĩwasilĩlwa kũawa, eewie aũmĩa mũno ngoonĩ. Ĩndĩ, vandũ va Yutasi kũmũsyokea Ngai na kwĩlila kuma ngoonĩ, atũngie ila ilungu 30 sya vetha kwa ala mamũnengete. Yutasi eeie anene ma athembi atĩĩ: “Nĩnĩkie naĩ kũvũnyanĩa nthakame ĩte na ĩvĩtyo.” Ĩndĩ mamũsũngĩie naĩ mamwĩa: “Yu wĩtũtavya kyaũ? Manya ũndũ ũkwĩka!”—Mathayo 27:4.

Yĩla anene ma athembi mamwĩie ũu nĩwekisye ila ilungu 30 sya vetha ĩkalũnĩ na avanga kwĩyũaa. Yutasi avangie kwĩyita, ĩndĩ mũtĩ ũla wooveee ĩkanda nĩwatilĩkile, avalũka mavianĩ na aatũkanĩla katĩ akw’a.—Meko ma Atũmwa 1:17, 18.

Kũyaĩ kũnakya vyũ Yesũ aitwawa nyũmba kwa Vondio Vilato. Ĩndĩ Ayuti ala mamũtwaĩte  kũu mayaalika. Masũanĩaa kana mavulana na Andũ-ma-mbaĩ-ingĩ mesaa kwĩthĩwa me avuku. Na ũu waĩ ũtonya kũtuma mataya lĩu matukũ 15 ma mwei wa Nisani. Mũthenya ũsu nĩw’o waĩ wa mbee wa Mboka ya Mũkate Ũte Ĩlawa na watalawa ta waĩ ĩvindanĩ ya Vasaka.

Kwoou nũndũ mayaalika, Vilato nĩwaumaalile nza na amakũlya: “Nĩ ũndũ wĩva mũũsikatĩa mũndũ ũũ?” Namo mamũsũngĩa: “Ta kethĩwa mũndũ ũũ ti mwĩki wa naĩ, tũyĩthĩwa twamũete kwaku.” Vilato nũtonya kwĩthĩwa oonaa ta meũmũingĩĩsya eke ũndũ mekwenda na kwoou amea atĩĩ: “Mwosei mũkamũsilĩle kwosana na mĩao yenyu.” Ayuti nĩmoonanisye nesa kĩeleelo kyoo kya kwenda Yesũ oawe yĩla meeie Vilato atĩĩ: “Ti ũndũ wosanĩte na mĩao ithyĩ kũaa mũndũ o na wĩva.”—Yoana 18:29-31.

Vate nzika, atongoi asu ma Ayuti keka nĩmamũaie Yesũ ĩvinda ya kũtanĩa mboka ya Vasaka, nĩvatonyeka andũ makethĩwa mesaa kũlua nduuthĩ. Ĩndĩ nĩmeesĩ kana Alomi maĩ na ũkũmũ wa kũsilĩla ala matũla mĩao ya silikalĩ ya Lomi. Kwoou Ayuti mendaa Alomi maĩkĩĩe kana Yesũ nũtũlĩte mĩao na kwoou aĩle kũawa. Alomi mamũaa Yesũ, atongoi Ayuti mayesaa kũtũlwa mũtĩ nĩ andũ o na kau nĩmo mendaa Yesũ oawe.

Atongoi asu ma ndĩni mayaamũtavya Vilato kana mamũsilĩlaa Yesũ nĩkwĩthĩwa nĩwaumĩte Ngai. Vandũ va ũu, mamũtavisye Vilato maũndũ angĩ ma ũvũngũ. Mamwĩie atĩĩ: “Twĩthĩie mũndũ ũũ [1] aimasya andũ [2] kwa kũmavata kũĩva Kaisali koti, na [3] akyasya we mwene nĩ Klĩsto mũsumbĩ.”—Luka 23:2.

Nũndũ Vilato aĩ ngavana ũsumbĩnĩ wa Lomi, nĩwendaa kũmanya nĩkĩ andũ asu maasya kana Yesũ eĩtw’ĩkĩthya mũsumbĩ. Kwoou Vilato nĩwalikile nyũmba ĩngĩ, amwĩta Yesũ na amũkũlya: “We nue Mũsumbĩ wa Ayuti?” Kwa ndeto ingĩ, no ũndũ ũmwe Vilato ta wamũkũlasya Yesũ, ‘We nũtũlĩte mĩao ya ũsumbĩ wa Lomi kwa kwĩtw’ĩkĩthya mũsumbĩ nĩ kana ũvĩnge Kaisali?’ Noĩthwa Yesũ endaa kũmanya maũndũ ala Vilato watavĩtw’e nĩ andũ ĩũlũ wake, na kwoou amũkũlya-ĩ: “Ũndũ ũsu ũũkũlya wumanĩte naku mwene, kana nĩ andũ angĩ makũtavĩtye ũu ĩũlũ wakwa?”—Yoana 18:33, 34.

Vilato nĩwoonanisye kana ndesĩ maũndũ maingĩ ĩũlũ wa Yesũ, ĩndĩ aĩ na wendi wa kũmamanya, na kwoou amwĩa atĩĩ: “We nĩwĩsĩ kana nyie ndi Mũyuti.” Ongeleeile kũmwĩa: “Andũ ma mbaĩ yaku mwene na anene ma athembi nĩmo makũetie vala nĩĩ. Nĩ ũndũ wĩva wĩkĩte?”—Yoana 18:35.

Yesũ asũngĩie Vilato kwa kũmũelesya ĩũlũ wa Ũsumbĩ, na maũndũ ala wawetie matumie Vilato aseng’a mũno.