Vilato eeie ĩkomano yĩla yendaa Yesũ oawe atĩĩ: “Katĩ wa maũndũ ala mũũweta ĩũlũ wake ndinona ũndũ ũtonya kũtuma asikatwa. Vate nzika, o nake Elote ndanona ũndũ.” (Luka 23:14, 15) Nũndũ Vilato nĩwatataa mũno kũsiĩĩa Yesũ ndakoawe, nĩwatũmĩie nzĩa ĩngĩ. Eeie andũ atĩĩ: “Kwosana na kĩthĩo kyenyu nĩnaĩle kũmũthaĩsya mũndũ ĩvinda ya Vasaka. Kwoou nĩmũkwenda nĩmũthaĩsye Mũsumbĩ wa Ayuti?”—Yoana 18:39.

Vilato nĩweesĩ kana vaĩ mũndũ mwove weetawa Valava, ũla waĩ kĩng’ei, mũaani, na nĩweekĩaa andũ vinya maleane na silikalĩ. Kwoou Vilato akũlilye andũ atĩĩ: “Mwĩenda nĩmũthaĩsye ũũ, nĩ Valava, kana nĩ Yesũ ũla andũ metaa Klĩsto?” Nũndũ wa kũthing’ĩĩw’a nĩ anene ma athembi, andũ maisye mathaĩw’e Valava, ĩndĩ ti Yesũ. Vilato akũlilye ĩkomano ĩngĩ atĩĩ: “Mwĩenda nĩmũthaĩsye ũũ katĩ wa andũ aa elĩ?” Namo masya: “Valava”!—Mathayo 27:17, 21.

Ũndũ ũsu ndwaamũtanĩthya Vilato, na kwoou akũlya ĩkomano-ĩ: “Mwĩenda nĩkane ata na Yesũ ũla andũ metaa Klĩsto?” Na onthe masya: “Akoaĩwe mũtĩnĩ!” (Mathayo 27:22) Andũ asu maĩ ma kwĩw’ĩwa tei nũndũ mendaa mũndũ ũte na mavĩtyo oawe. Nĩkyo kĩtumi Vilato e na kĩmako kingĩ wamakũlilye atĩĩ: “Nĩkĩ? Nĩ ĩvĩtyo yaũ mũndũ ũũ wĩkĩte? Ndinona ũndũ wĩkĩte ũtonya kũtuma oawa; kwoou nĩĩka kũmũvũa na ngĩmũthasya.”—Luka 23:22.

O na kau Vilato nĩwatatie vyũ Yesũ ndakoawe, ĩkomano yaĩ na ũthatu mwingĩ na kwoou yaendeea kwasya: “Akoaĩwe mũtĩnĩ!” (Mathayo 27:23) Atongoi ma ndĩni nĩmathokoanĩtye ilĩko sya ĩkomano nginya ũkethĩa yĩsũanĩa o kwĩta nthakame tũ! Na ũsengy’o nĩ kana ti nthakame ya mũndũ mũthũku ta mũaani. Ĩndĩ nĩ nthakame ya mũndũ ũte na mavĩtyo ũla mĩthenya ĩtano mĩvĩtu waĩ anathokw’a Yelusaleme ta Mũsumbĩ. Ethĩwa amanyĩw’a ma Yesũ maĩ vo andũ mayenda oawe, nĩmakilĩtye na mayendaa maimanyĩka.

Vilato nĩwamanyie kana ang’ang’anaa o mana. Ĩkomano yaendeee kũlua nduuthĩ, na kwoou Vilato nĩwoosie kĩw’ũ na athamba moko mbee wa andũ. Amina kwĩka ũu eeie andũ atĩĩ: “Nyie ndi na ĩvĩtyo ĩũlũ wa nthakame ya mũndũ ũũ. Nĩ ĩũlũ wenyu kwĩka ũndũ mũkwona.” Ndeto isu sya Vilato iyaavĩndũa kĩla ĩkomano yendaa. Ĩndĩ vandũ va ũu ĩkomano yĩu yaisye: “Eka nthakame yake yĩthĩwe ĩũlũ witũ na ĩũlũ wa syana sitũ.”—Mathayo 27:24, 25.

Ngavana Vilato endaa kwĩanĩsya wendi wa andũ vandũ va kwĩka kĩla weesĩ kana nĩkyo kyaĩle. Nũndũ wa ũu eekie kwosana na wendi wa  ĩkomano na amũthasya Valava. Ĩtina wa ũu, aisye Yesũ aumw’e ngũa na aikũnwa ivoko.

Kwoou asikalĩ nĩmamũvũie Yesũ mũno, na mamũtwaa nyũmbanĩ kwa ngavana. E vau, asikalĩ nĩmoombanie na maendeea kũmũthĩny’a. Maseũvisye ngovia ya mĩw’a na mamwĩkĩa. O na ĩngĩ asikalĩ asu nĩmamũkwatĩthisye Yesũ mũangi kw’okonĩ kwake kwa aũme, na mamwĩkĩa ngũa ya langi ũilyĩ ta mũtune, ta ĩla yeekĩawa nĩ anene ũsumbĩnĩ. Ĩtina wa ũu mambĩĩie kũmũthekeea Yesũ na kũmwĩa: “Ũvoo waku, Mũsumbĩ wa Ayuti!” (Mathayo 27:28, 29) O na eka ũu, nĩmamũtw’ĩlangile Yesũ mata na mamũkũna makovi. O na nĩmoosie ũla mũangi wakwete na mamũkũna naw’o mũtwe. Kwĩka ũu kwatumie ĩla ngovia ya mĩw’a mamwĩkĩĩte ĩmũtonyeea mũtwe.

Nũndũ Yesũ nĩwauĩtye na aendeea kwĩthĩwa na vinya ĩvindanĩ yĩu yonthe wathĩnaw’a, Vilato nĩwendeeiw’e nĩ ũndũ ũsu na kwoou avanga kwĩka ũndũ ũngĩ nĩ kana etaanany’e na mathĩna. Eeie ĩkomano atĩĩ: “Sisyai! Nĩngũmumaalya nza kũla mũĩ nĩ kana mũmanye kana nyie ndikwona mũndũ ũũ e na ĩvĩtyo.” We Vilato no ethĩwe asũanĩaa kana kũete Yesũ mbee wa ĩkomano emũkũne vyũ na auĩte kwaĩ kũtonya kũtuma ĩkomano yĩmwĩw’ĩa Yesũ tei? Yesũ aũngye mbee wa ĩkomano yĩu yĩtaĩ na tei, Vilato aneenie asya: “Sisyai! Mũndũũme!”—Yoana 19:4, 5.

O na kau Yesũ aĩ mũvũe mũno na aĩ na itau mbingĩ, nĩwauĩtye na ndaavũavũana. Ũndũ ũsu nĩwamwendeeisye Vilato mũno nũndũ ndeto ila waneenie nĩsyoonanisye kana nĩwamũnengete Yesũ ndaĩa na nĩwamwĩw’ĩaa tei.