Yesũ e o nyũmbanĩ ya ĩũlũ na atũmwa make maiya kyaũya kya wĩoo, nĩwamekĩie vinya kwa kũmea atĩĩ: “Ngoo syenyu iikathĩnĩke. Mũĩkĩĩei Ngai, na mũindĩkĩĩa nyie.”—Yoana 13:36; 14:1.

Yesũ nĩwatavisye atũmwa make aĩkĩĩku nĩkĩ mataaĩle kũthĩnĩka amatia. Ameie atĩĩ: “Nyũmbanĩ ya Asa wakwa kwĩ mawĩkalo maingĩ. . . . Nathi kũmũseũvĩsya vandũ, ngooka ĩngĩ na ngamũthokya kwakwa, nĩ kana vala nĩĩ o nenyu mwĩthĩwe vo.” Atũmwa mayaeleawa kana Yesũ ameaa nũkũthi ĩtunĩ. Nĩkyo kĩtumi Thoma wamũkũlilye Yesũ atĩĩ: “Mwĩaĩi, ithyĩ tũyĩsĩ vala ũendete. Tũtonya ata kũmanya nzĩa?”—Yoana 14:2-5.

Yesũ asũngĩie asya: “Nyie ninyie nzĩa na ninyie w’o na ninyie thayũ.” Yesũ oonanasya kana nĩ kenda mũndũ ethĩwe atonya kũlika nyũmbanĩ ya Asa wake aĩle kwĩtĩkĩla ũ Yesũ, kwĩtĩkĩla momanyĩsyo make, na kũatĩĩa ngelekany’o yake. Nĩkyo kĩtumi waisye: “Vaiĩ mũndũ wũkaa kwa Asa atesĩle kwakwa.”—Yoana 14:6.

Vilivu nĩwamwĩthukĩĩsye Yesũ nesa na amwĩa atĩĩ: “Mwĩaĩi, twony’e Asa, na nĩtũkwĩanĩwa.” Veonekana Vilivu nĩ ta wendaa kwona woni ĩũlũ wa Ngai ta mawoni ala Mose, Eliya, na Isaia moonie. Ĩndĩ, atũmwa nĩmoonete ũndũ ũngĩ mũseango kwĩ mawoni asu. Yesũ aielesya ĩũlũ wa ũndũ ũsu amwĩie Vilivu atĩĩ: “O na ĩtina wa kwĩthĩwa nenyu ĩvinda yĩasavĩte ũu, we Vilivu ndũmbĩsĩ? Mũndũ o na wĩva ũla wambonie nĩwamwonie Asa o nake.” Yesũ nĩwoonanasya nesa vyũ ndaĩa sya Ĩthe wake, kwoou kwĩkalany’a nake na kwona maũndũ ala weekaa kwaĩ o ũndũ ũmwe na kwona Ĩthe wake. Vate nzika, Asa nĩ mũnene kwĩ Mwana, na nĩkyo kĩtumi Yesũ waisye: “Ndeto ila ngũmũtavya, isu iyumanĩte nakwa mwene.” (Yoana 14:8-10) Atũmwa nĩmoonie kana ũndũ w’onthe ũla Yesũ wamanyĩasya endaa ũmũtaĩe Ĩthe wake.

Yesũ nĩweekĩte maũndũ ma ũsengy’a na akatavany’a ũvoo mũseo wa Ũsumbĩ wa Ngai, na atũmwa nĩmoonie ayĩka maũndũ asu. Ĩndĩ ameie atĩĩ: “Mũndũ o na wĩva ũla ũndĩkĩĩaa o nake akatethya mawĩa ala ndethasya; na akatethya mawĩa manene kwĩ asu.” (Yoana 14:12) Yesũ ndameaa kana makeeka syama nene kwĩ ila weekaa. Ĩndĩ, oonanasya kana makatavany’a  kwa ĩvinda yĩasa kwĩ yĩla watavanisye, matavany’e kĩsio kĩnene kwĩ kĩla watavanisye, na maitavya andũ aingĩ mũno kwĩ ala watavisye.

Yesũ athi ndesaa kũtia atũmwa me oka, nĩkyo kĩtumi wameie atĩĩ: “Ethĩwa mũkavoya ũndũ o na wĩva ĩsyĩtwanĩ yakwa, ngawĩka.” Ongeleeile kũmea-ĩ: “Ngamũvoya Asa na akamũnenga mũtetheesya ũngĩ ethĩwe nenyu tene na tene, nake nĩ veva wa ũla w’o.” (Yoana 14:14, 16, 17) Amaĩkĩĩthisye kana makanengwa veva mũtheu, ũla ũkamatetheeasya. Ũndũ ũsu nĩweanĩie mũthenya wa Vendekosito.

Yesũ aendeeie kũmea atĩĩ: “Vatiele ĩvinda ĩnini na nthĩ ndĩkambona ĩngĩ, ĩndĩ inyw’ĩ mũkambona, nũndũ nĩ thayũ nenyu mũkeethĩwa thayũ.” (Yoana 14:19) Yesũ athayũũka, amanyĩw’a maĩ mamwone atanamba kũthi ĩtunĩ, na ĩtina wa ĩvinda mayĩthĩwa vamwe nake ĩtunĩ.

Ĩtina wa ũu, Yesũ nĩwasyokie amatavya ũndũ ũngĩ wa vata. Ameie-ĩ: “Mũndũ o na wĩva ũla wĩtĩkĩlaa mĩao yakwa na kũmĩkwata, ũsu nĩwe ũmbendete. Nake mũndũ o na wĩva ũla ũmbendete akendwa nĩ Asa wakwa, nakwa ngamwenda, na nyie mwene ngeeyonany’a ũtheinĩ kwake.” Ĩtina wa kwĩw’a ndeto isu mũtũmwa Yutasi, ũla kwa ĩsyĩtwa yĩngĩ weetawa Thatayo amũkũlilye Yesũ atĩĩ: “Mwĩaĩi, kwĩthĩiwe ata weethĩa nũkwenda kwĩyonany’a ũtheinĩ kwitũ na ti kwa nthĩ?” Yesũ asũngĩie asya: “Mũndũ o na wĩva ũla ũmbendete, akakwata ndeto yakwa, na Asa wakwa akamwenda . . . Mũndũ o na wĩva ũla ũtambendete ndakwataa ndeto syakwa.” (Yoana 14:21-24) Kĩvathũkany’o na aatĩĩi ma Yesũ, andũ ala aingĩ ĩũlũ wa nthĩ mayeesĩ kana Yesũ nĩwe nzĩa, nĩwe w’o, na nĩwe thayũ.

Yesũ athi, amanyĩw’a make maĩ malilikane ata maũndũ onthe ala wamamanyĩisye? Yesũ ameie-ĩ: “Ũla mũtetheesya, nake nĩ veva mũtheu, ũla Asa wĩtũma ĩsyĩtwanĩ yakwa, ũsu akamũmanyĩsya maũndũ onthe na kũmũlilikany’a maũndũ onthe ala namũtavisye.” Atũmwa nĩmoonete maũndũ onthe ala Yesũ weekĩte atetheew’e nĩ veva mũtheu, kwoou ndeto isu wamatavisye nĩsyamekĩie vinya mũno. Yesũ aendeeie kũmea: “Nĩmũtiĩa mũuo; nĩmũnenga mũuo wakwa. . . . Ngoo syenyu iikathĩnĩke o na iikethĩwe na wia.” (Yoana 14:26, 27) Kwoou, amanyĩw’a mayaĩ na kĩtumi kya kũthĩnĩka nũndũ maĩ matongoew’e na maisũvĩwa nĩ Ĩthe wa Yesũ.

Ĩtina wa ĩvinda ĩnini, amanyĩw’a maĩ mamanye kana Ngai nũsũvĩaa athũkũmi make. Yesũ ameie atĩĩ: “Mũnene wa nthĩ nĩwũkĩte, nake nde na ũtonyi ĩũlũ wakwa.” (Yoana 14:30) Ndevili nĩwalikile nthĩnĩ wa Yutasi na amũtongoesya. Ĩndĩ, Yesũ ndaĩ na wonzu Satani waĩ atonya kũtũmĩa amũvathany’e na Ngai. O na ĩngĩ, Ndevili ndaĩ na ũndũ wĩka nĩ kana asiĩĩe Yesũ ndakathayũũkw’e. Nĩkĩ tũkwasya ũu? Yesũ aisye-ĩ: “Nyie nĩĩka o ũndũ Asa ũmbĩaĩe nĩke.” Yesũ nĩweesĩ nesa vyũ kana Ĩthe wake akamũthayũũkya.—Yoana 14:31.