Yesũ nĩwatũmĩĩte ĩvinda kwĩkĩa atũmwa make vinya kwa kũneena namo kwa nzĩa nzeo me ĩla nyũmbanĩ ya ĩũlũ. Nĩvatonyeka saa sita ikethĩwa syaĩ ivĩtie, na kwoou kwaĩ kũnatuka mũno. O ĩvindanĩ yĩu, Yesũ nĩwamatavisye ngelekany’o ya kũmekĩa vinya.

Ambĩĩie kwa kũmea: “Nyie ninyie mũsavivũ ũla wa w’o, na Asa wakwa nĩwe mũĩmi.” (Yoana 15:1) Ngelekany’o ĩsu yavw’anene na ndeto ila syaneeniwe myaka maana maingĩ tene ĩũlũ wa mbaĩ ya Isilaeli, ĩla yeetawa mũsavivũ wa Yeova. (Yelemia 2:21; Osea 10:1, 2) Ĩndĩ o na ũu wĩ o vo, Yeova aĩ alee mbaĩ ĩsu. (Mathayo 23:37, 38) Kwoou ndeto sya Yesũ syoonanasya ata? Yesũ aneeneaa andũ angĩ eka mbaĩ ya Isilaeli. Oonanasya kana nĩwe waĩ mũsavivũ ũla Ĩthe wake waĩmĩaa kuma ĩvinda yĩla wamwĩtĩkĩsye mauta kwĩsĩla veva mũtheu mwaka wa 29. O na ũu wĩ o vo, Yesũ nĩwoonanisye kana mũsavivũ ũsu woonanasya andũ angĩ aingĩ. Aisye-ĩ:

“[Ĩthe wakwa] nũtilaa kĩla kaũvonge ke nthĩnĩ wakwa kala katasyaaa ũsyao, na nũtheasya kĩla kamwe kasyaaa ũsyao nĩ kana katonye kũsyaa ũsyao mwingĩ. . . . Na o tondũ kaũvonge katatonya kũsyaa ũsyao ke koka, ate o kekalile mũsavivũnĩ, o nenyu mũitonya kũsyaa ũsyao ate o mwĩkalile mwĩ ngwatanĩo vamwe nakwa. Nyie ninyie mũsavivũ; nenyu ninyw’ĩ tũũvonge.”—Yoana 15:2-5.

Yesũ athie amanyĩw’a make aĩkĩĩku kana athi akatũma mũtetheesya, nake nĩ veva mũtheu. Ĩtina wa mĩthenya 51, atũmwa vamwe na andũ angĩ nĩmetĩkĩw’e veva mũtheu, na matw’ĩka tũũvonge twa mũsavivũ. Na “tũũvonge” tũu tw’onthe twaaĩle kũendeea kwĩthĩwa na ngwatanĩo na Yesũ. Nĩkĩ twaaĩle kwĩka ũu?

Yesũ aeleisye ũndũ ũsu kwa kwasya atĩĩ: “Mũndũ o na wĩva ũla wĩkalaa e ngwatanĩo vamwe nakwa, nakwa nĩ ngwatanĩo vamwe nake, mũndũ ũsu nũsyaaa ũsyao mwingĩ; nũndũ mũte vamwe nakwa mũitonya kwĩka ũndũ nongi.” “Tũũvonge” tũu, tũla nĩ aatĩĩi aĩkĩĩku ma Yesũ, maĩ masyae ũsyao mwingĩ kwa kwĩthĩwa na ndaĩa ta sya Yesũ. O na ĩngĩ maaĩle kwĩka ũu kwa kũtavya andũ ĩũlũ wa Ũsumbĩ wa Ngai, na kwa nzĩa ĩsu maitw’ĩkĩthya andũ aingĩ amanyĩw’a. Nao nata ethĩwa ũmwe wa aatĩĩi ma Yesũ ndeendeea kwĩthĩwa na ngwatanĩo nake na ndesyaa ũsyao? Yesũ aeleisye asya: “Ethĩwa mũndũ o na wĩva ndekalaa e ngwatanĩo vamwe nakwa, ailye kaũvonge kala kekaw’a ĩtheka.” Yesũ aendeeie kwasya: “Ethĩwa mũkekala mwĩ ngwatanĩo vamwe nakwa, na ndeto syakwa iyĩkala nthĩnĩ wenyu, voyai ũndũ o na wĩva ũla mũkwenda na mũkakwata.”—Yoana 15:5-7.

Yesũ nĩwasyokie kũweta ũndũ wawetete mavinda angĩ elĩ, naw’o nĩ kũkwata mĩao yake. (Yoana 14:15, 21) Nĩwaeleisye ũndũ amanyĩw’a matonya kwonany’a kana nĩmakwataa mĩao yake kwa kwasya atĩĩ: “Ethĩwa mũkakwataa mĩao yakwa, mũkekalaa wendonĩ wakwa, o tondũ nyie nĩkwataa mĩao ya Asa wakwa na kwĩkala wendonĩ wake.” Ĩndĩ o na ũu wĩ o vo, nĩvendekaa maũndũ angĩ maingĩ eka o kũmwenda Yeova Ngai na Mwana wake. Yesũ aiĩkĩĩthya ũndũ ũsu aisye atĩĩ: “Ũũ nĩw’o mwĩao wakwa, inyw’ĩ mwendane o tondũ namwendie. Vaiĩ mũndũ wĩ wendo mwingĩ kwĩ ũũ, mũndũ kwĩyumya akw’e kwondũ wa anyanyae. Inyw’ĩ mwĩ anyanyawa ethĩwa mũkeekaa kĩla ngũmwĩaĩa.”—Yoana 15:10-14.

Ĩtina wa masaa manini, Yesũ aĩ onany’e ũndũ wendete andũ kwa kumya thayũ wake kwondũ wa andũ onthe ala mamũĩkĩĩaa. Ngelekany’o yake nĩyaaĩle kũtuma aatĩĩi make mendana o tondũ we wamendete. Wendo waĩ ũtume mamanyĩka nesa o tondũ Yesũ wawetete. Aĩtye atĩĩ: “Nũndũ mweeka ũu andũ onthe makamanya kana mwĩ amanyĩw’a makwa—ethĩwa mũkeethĩwa na wendo katĩ wenyu.”—Yoana 13:35.

 Atũmwa nĩmaaĩle kũmanya nĩkĩ Yesũ ũkũmeta “anyanyawa.” Yesũ nĩwoonanisye nĩkĩ wametaa ũu yĩla wameie-ĩ: “Nĩmwĩta anyanyawa, nũndũ nĩnamũtavisye maũndũ onthe ala neewie kuma kwa Asa wakwa.” Waĩ ũndũ wa mwanya mũno kwĩthĩwa anyanya ma Yesũ na kũmanya kĩla Ĩthe wake wamũtavisye! Ĩndĩ nĩ kana atũmwa asu matanĩe ũnyanya ũsu maaĩle ‘kũendeea kũsyaa ũsyao.’ Yesũ aisye kana meeka ũu, ‘ũndũ o na wĩva ũla mevoya Asa ĩsyĩtwanĩ yake, akamanenga.’—Yoana 15:15, 16.

Amanyĩw’a ma Yesũ, ala nĩmo “tũũvonge,” maĩ methĩwe na wendo ũla waĩ ũmatetheesye kũmĩĩsya maũndũ ala maĩ mamakwate. Yesũ amakanisye amea kana nthĩ ĩkamamena, ĩndĩ asyoka amatavya ndeto sya kũmakiakisya amea: “Ethĩwa nthĩ nĩkũmũmena, nĩmwĩsĩ kana nĩyamenie nyie ĩtanamba kũmũmena inyw’ĩ. Ta kethĩwa mwĩ ma nthĩ, nthĩ yĩthĩwa yendete ala mayo. Na nũndũ mũi ma nthĩ, . . . nthĩ nĩkũmũmena.”—Yoana 15:18, 19.

Yesũ nĩwaendeeie kũmaelesya nĩkĩ nthĩ ĩkamamena. Ameie atĩĩ: “Makamwĩka maũndũ asu onthe kwondũ wa ĩsyĩtwa yakwa, nũndũ maimwĩsĩ Ũla wandũmie.” Yesũ aisye kana syama ila weekaa nĩsyasilĩlaa andũ ala mamũmenete. Eeie amanyĩw’a make atĩĩ: “Ta kethĩwa ndyaaĩka katĩ woo maũndũ mataaĩkwa nĩ mũndũ ũngĩ o na wĩva, mayĩthĩwa me na naĩ; ĩndĩ yu nĩmambonete na makamena nyie o vamwe na Asa wakwa.” Vate nzika, kĩmena kyoo kyeanĩasya wathani.—Yoana 15:21, 24, 25; Savuli 35:19; 69:4.

Yesũ nĩwasyokie atha amanyĩw’a make kũmatũmĩa mũtetheesya, nake nĩ veva mũtheu. Veva mũtheu waĩ ũtume aatĩĩi onthe ma Yesũ methĩwa na vinya mwingĩ na ũimatetheesya methĩwe na ũsyao, naw’o ũsyao ũsu nĩ “kumya ũkũsĩ.”—Yoana 15:27.