Ĩtina wa Yesũ kwĩkala Samalia vandũ va mĩthenya ĩlĩ, nĩwaendie kĩsionĩ kya kwoo. Yesũ nĩwekalĩte kwa ĩvinda yĩana ũna kĩsionĩ kya Yutia aitavany’a, ĩndĩ ndasyokete Kalilii akathyũmũe. Avika kĩsionĩ kĩu weanĩie, nĩwongeleeile ũthũkũmi wake. Nĩvatonyeka Yesũ akethĩwa eesĩ kana andũ kĩsionĩ kĩu nĩmatonya kũlea kũmwĩthukĩĩsya, nũndũ o tondũ waisye, “mwathani ndanengawe ndaĩa kĩsionĩ kya kwoo.” (Yoana 4:44) Ĩndĩ mo amanyĩw’a make meekie ata? Vandũ va kũmũatĩĩa Yesũ, nĩmasyokie mĩsyĩ kwoo na masyokea mawĩa ala mathũkũmaa.

Yesũ ambĩĩie kũtavany’a ĩũlũ wa kyaũ? Atavanasya akyasya, “Ũsumbĩ wa Ngai nĩ mũthengeeu. Ĩlilei, na mũyĩĩkĩĩa ũvoo mũseo.” (Maliko 1:15) Ũtavany’a ũsu wa Yesũ watumie andũ meka ata? Andũ aingĩ ma Kalilii nĩmamũthokisye Yesũ nesa na mamũnenga ndaĩa. Ĩndĩ mayaaĩka ũu nũndũ wa ũvoo ũla Yesũ watavanasya. Andũ amwe ma Kalilii maĩ Yelusaleme kwondũ wa kũtanĩa Vasaka myei mĩvũthũ mĩvĩtu, na nĩmoonie syama nene ila Yesũ weekie.—Yoana 2:23.

Yesũ e Kalilii ambĩĩisye kũtavany’a ndũanĩ yĩva? Veonekana ambĩĩie ndũanĩ ya Kena, vala ĩvinda yĩmwe waĩ anavĩndũa kĩw’ũ kĩkatw’ĩka mbinyu e mbokanĩ ya mũtwaano. Ĩvindanĩ yĩu wasyokie Kena, Yesũ nĩwamanyie kana vaĩ kamwana kaĩ kawau mũno nginya ũkethĩa ke vakuvĩ kũkw’a. Kamwana kau kaĩ ka mũthũkũmi ũmwe wa Elote Andiva, mũsumbĩ ũla ĩtina wesie kwasya Yoana Mũvatisi oawe kwa kũtilwa mũtwe. Mũthũkũmi ũsu aĩ ew’ĩte kana Yesũ nũnaumie Yutia athi Kena. Kwoou, nĩwaumie mũsyĩ kwake Kavelinaumi na athi Kena kũmũmantha Yesũ. E na kyeva kingĩ ngoonĩ, mũthũkũmi ũsu wa mũsumbĩ amwĩie Yesũ atĩĩ: “Mwĩaĩi, theea mwana wakwa atanakw’a.”—Yoana 4:49.

No nginya mũthũkũmi ũsu ethĩwe aseng’ie mũno yĩla Yesũ wamũsũngĩie amwĩa: “Enda; mwana waku e thayũ.” (Yoana 4:50) Mũthũkũmi ũsu wa Elote nĩwamũĩkĩĩie Yesũ na ambĩĩa savalĩ ya kũsyoka mũsyĩ kwake. E nzĩanĩ nĩwakomanie na ngombo syake syũkĩte kũmũtavya ũndũ mũseo. Syamwĩie kana kamwana kake nĩkavoie na ke thayũ. Ayenda kũmanya ũndũ kavoangie, aikũlilye “kavoie saa siana.”

Nasyo syamwĩa: “Ĩyoo saa mũonza nĩw’o ndetema ĩnavoie.”—Yoana 4:52.

Mũthũkũmi ũsu eethĩie kana saa isu nĩsyo Yesũ wamwĩie, “Mwana waku e thayũ.” Ĩtina wa maũndũ asu kwĩkĩka, mũthũkũmi ũsu, ũla waĩ mũthwii mũno nginya ũkethĩa e na ngombo, nĩwatw’ĩkie mũmanyĩw’a wa Klĩsto vamwe na mũsyĩ wake.

Kũvika ĩvinda yĩu, Kena nĩyo ndũa ĩla Yesũ weekĩte syama ilĩ. Eekie kyama kya mbee yĩla wavĩndũie kĩw’ũ kyatw’ĩka mbinyu na kya kelĩ nĩ yĩla wavoisye kamwana kaĩ vandũ va ũasa wa kĩlomita ta 26 kuma vala waĩ. Yesũ ndaaũngamĩlya kwĩka syama vau. Ĩndĩ kyama kĩu kya kũvosya kamwana kyaĩ kya vata mũno nũndũ nĩkyo weekie asyoka Kalilii oou. Vate nzika, Yesũ nĩ mwathani wĩtĩkĩlĩtwe nĩ Ngai, ĩndĩ nĩ kwa kĩwango kĩana ata andũ ma Kalilii mesaa ‘kũmũnenga ndaĩa mwathani ũsu e kĩsionĩ kyake’?

Ũndũ ũsu wamanyĩkie nesa Yesũ asyoka kĩsionĩ kĩla weanĩie kya Nasaleti. Nĩ maũndũ meva meekĩkie Nasaleti?