“Kĩla Ũandĩko nĩwaveveewe nĩ Ngai.”​—⁠2 Timotheo 3:⁠16, The Bible in Kikamba, 1974.

Nũkwataa mosũngĩo maseo ma makũlyo ala ma vata thayũnĩ.​—⁠Nthimo 2:​1-5.

Nũkwataa ũtao mũseo wa kũũtongoesya maũndũnĩ maku ma kĩla mũthenya.​—⁠Savuli 119:105.

Nũtonya kwĩthĩwa na wĩkwatyo mũlũmu ki wa ĩvinda yĩla yũkĩte.​—⁠Alomi 15:⁠4.

Ĩĩ, nũndũ wa itumi ta itatũ:

• Yĩ wĩw’ano wa ũsengy’o. Mbivilia yaandĩkiwe nĩ andũ me kĩvathũkany’o ta 40. Mamĩandĩkie kwa myaka mbee wa 1,600. Aingĩ moo o na mayeesene. Ĩndĩ, Mbivilia yonthe yĩ wĩw’ano na ĩneeneaa kyongo o kĩmwe kĩnene!

• Aandĩki mayo maĩ aĩkĩĩku. Mavinda maingĩ aandĩki ma mavuku nĩmavithaa mawonzu ma andũ moo. Ĩndĩ, aandĩki ma Mbivilia nĩmawetete ũtheinĩ wonzu woo ene na wa nthĩ yoo.​—⁠2 Mavinda 36:⁠15, 16; Savuli 51:​1-4.

• Wathani wayo nĩ wa w’o. Mbivilia nĩyathanie kwanangwa kwa mũsyĩ wa Mbaviloni myaka ta 200 mbeewanangĩko ũsu. (Isaia 13:17-​22) Nĩyoonanisye ũndũ Mbaviloni yĩanangwa, o na yaweta ĩsyĩtwa ya ũla wĩmyananga!​—⁠Isaia 45:​1-3.

  Mawathani angĩ maingĩ nĩmeanĩie, o na kũvikĩa tũmaũndũ tũla tũnini vyũ. Na vate nzika, ũu nĩw’o Ndeto ya Ngai yaĩle kwĩthĩwa ĩilyĩ.​—⁠2 Vetelo 1:​21.