ĨSOMO YA 47
We Nĩwĩyũmbanĩtye Kũvatiswa?
Kwĩsĩla ĩmanyĩsyo yĩĩ ya Mbivilia, nĩwĩmanyĩĩtye maũndũ maingĩ mũno ĩũlũ wa Yeova. Na nĩvatonyeka ũkethĩwa wĩkĩte moalyũku amwe nĩ kana ũatĩĩe maũndũ ala wĩmanyĩasya. Ĩndĩ o na vailye ũu, noĩthwa ve ũndũ mũna ũkũsiĩĩe kwĩyumya kwa Yeova na kũvatiswa. Ĩsomo yĩĩ nĩyĩũneenea maũndũ amwe ala matonya kũsiĩĩa mũndũ ndakavatiswe na ũndũ ũtonya kũmakĩlya vinya.
1. Waĩle kwĩthĩwa na ũmanyi wĩana ata nĩ kana ũvatiswe?
Nĩ kana mũndũ avatiswe aĩle kwĩthĩwa na “ũmanyi wa wʼo ĩũlũ wa ũla wʼo.” (1 Timotheo 2:4) Ũu ti kwasya kana ũtanamba kũvatiswa nĩwaĩle kũmanya mosũngĩo ma makũlyo onthe ma Mbivilia. O na Aklĩsto ala mavatisiwe tene no maendeee kwĩmanyĩsya. (Akolosai 1:9, 10) Ĩndĩ nĩwaĩle kwĩthĩwa wĩsĩ momanyĩsyo ma mũsingi ma Mbivilia. Atumĩa ma kĩkundi nĩmeũkũtetheesya kũmanya ethĩwa wĩ na ũmanyi ũtoetye.
2. Nĩ matambya meva waĩlĩte kwosa ũtanamba kũvatiswa?
Ũtanamba kũvatiswa nĩwaĩle ‘kwĩlila na ũialyũka.’ (Soma Meko ma Atũmwa 3:19.) Ũu nĩ kwasya kana nĩwaĩle kwĩlila nũndũ wa naĩ syonthe ila weekie na ũimũkũlya Yeova akũekee. O na nĩwaĩle kũleana vyũ na mwĩkalĩle mũthũku na ũitwʼa kũendeea kwĩkala kwa nzĩa ĩla ĩmwendeeasya Ngai. O vamwe na ũu, nĩwaĩle kwambĩĩa kũkwata mbau mĩvango ya kĩkundi kwa kũendaa maũmbanonĩ na kũtavanasya wĩ mũtavanyʼa ũte mũvatise.
3. Nĩkĩ ũtaĩlĩte kũkĩa kũvatiswa?
Amwe makĩaa kũvatiswa mayona kana ti ta metonya kwĩanĩsya kĩla mamwathie Yeova. Nĩwʼo kana mavinda amwe ũkavĩtasya o tondũ aũme na aka amwe aĩkĩĩku mawetetwe Mbivilianĩ mavĩtasya. Ĩndĩ lilikana kana Yeova ndekwatasya athũkũmi make meke maũndũ ta andũ mate na naĩ. (Soma Savuli 103:13, 14.) Nũtanaa mũno yĩla weeka kyonthe kĩla ũtonya nĩ kana ũmwendeesye! Na ndakalea kũũtetheesya. O na eka ũu, Yeova atũĩkĩĩthĩtye kana vaiĩ kĩndũ “kĩtonya kũtũvathana na wendo [wake].”—Soma Alomi 8:38, 39.
ĨMANYĨSYE MŨNANGO
Ĩmanyĩsye wone ũndũ ũtonya kũkĩlya vinya maũndũ ala matumaa ũtavatiswa, kwa kũendeea kũmũmanya Yeova nesanga na kwĩtĩkĩla ũtethyo wake.
4. Manya Yeova nesanga
Waĩle kũmũmanya Yeova mũno wĩana ata ũtanamba kũvatiswa? Waĩle kũmũmanya nesa nĩ kana ũmwende na ũyĩthĩwa na wendi wa kũmwendeesya. Ĩloelei VITIO nĩ kana mwone ũndũ amanyĩwʼa ma Mbivilia me kĩvathũkanyʼo ĩũlũ wa nthĩ mekĩte ũu. Na ĩndĩ mũineenea ĩkũlyo yĩla yĩatĩĩe.
-
Kwosana na ũndũ twoona vitionĩ, nĩ kyaũ kyatetheeisye amwe meyũmbanĩsye kũvatiswa?
Somai Alomi 12:2, na ĩndĩ mũineenea makũlyo aa:
-
We nĩwĩthĩwa na nzika ĩũlũ wa kĩla Mbivilia ĩmanyĩasya, kana ũkethĩwa na nzika ethĩwa Ngũsĩ sya Yeova nĩmo mamanyĩasya ũla wʼo?
-
Ethĩwa ũu nĩwʼo vailye, wĩona waĩle kwĩka ata?
5. Kĩlya vinya maũndũ ala matonya kwĩthĩwa maũsiĩĩe kũvatiswa
Ithyonthe nĩtũkwatawa nĩ mawetu yĩla twatwʼa kwĩyumya kũla kwĩ Yeova na kũvatiswa. Nĩ kana mwone ngelekanyʼo yonanĩtye ũu, ĩloelei VITIO, na ĩndĩ mũineenea makũlyo ala maatĩĩe.
-
Kwosana na ũndũ twoona vitionĩ, nĩ mawetu meva Narangerel waaĩle kũmakĩlya vinya nĩ kana amũthũkũme Yeova?
-
Kũmwenda Yeova kwamũtetheeisye ata akĩlya vinya mawetu asu?
Somai Nthimo 29:25 na 2 Timotheo 1:7, na ĩndĩ mũineenea ĩkũlyo yĩĩ:
-
Nĩ kyaũ kĩtũnengae ũkũmbaũ wa kũkĩlya vinya mawetu?
6. Ĩkĩĩa vyũ kana Yeova no aũtetheesye
Mavinda onthe Yeova akaũtetheeasya nĩ kana ũmwendeesye. Ĩloelei VITIO, na ĩndĩ mũineenea makũlyo ala maatĩĩe.
-
Kwosana na ũndũ twoona vitionĩ, nĩ kyaũ kyatumaa mũmanyĩwʼa ũsu wa Mbivilia akũĩĩsya kũvatiswa?
-
Nĩ kyaũ weemanyĩisye kyamũtetheesya kũlũlũmĩĩlya mũĩkĩĩo wake kũla kwĩ Yeova?
Somai Isaia 41:10, 13, na ĩndĩ mũineenea ĩkũlyo yĩĩ:
-
Nĩkĩ ũtaĩle kwĩthĩwa na nzika kana no wĩanĩsye kĩla wamwatha Yeova yĩla ũkwĩyumya kwake?
7. Tũngaa mũvea mũno nũndũ wa wendo ũla Yeova ũkwonetye
O ũndũ waendeea kũvindĩĩsya ũndũ Yeova ũkwendete, nowʼo ũkamũtũngĩaa mũvea mũnango, na wendi waku wa kũmũthũkũma ĩvinda yonthe ũyongeleka. Somai Savuli 40:5, na ĩndĩ mũineenea ĩkũlyo yĩĩ:
-
Nĩ maũndũ meva Yeova ũkwĩkĩte matumaa wenda kũmũtũngĩa mũvea?
Mwathani Yelemia nĩwamwendete Yeova mũno o vamwe na ndeto yake, na nĩwoonaa ne kĩanda kya mwanya kwĩtanĩwʼa na ĩsyĩtwa yake. Aisye atĩĩ: “Ndeto syaku kwaka syaĩ mũyo na ũtanu wa ngoo yakwa: nũndũ nĩtanĩawʼa na syĩtwa yaku, ame Yeova, Ngai.” (Yelemia 15:16) Sũngĩai makũlyo aa:
-
Nĩkĩ ne kĩanda kya mwanya kwĩthĩwa wĩ ũmwe wa Ngũsĩ sya Yeova?
-
We no wende kũvatiswa nĩ kana wĩthĩwe ũmwe wa Ngũsĩ sya Yeova?
-
Ve kĩndũ kĩũsiĩĩe ndũkeke ũu?
-
We wĩona nĩ kyaũ waĩle kwĩka nĩ kana wose ĩtambya yĩu ya kũvatiswa?
ANDŨ AMWE MAASYA: “Nyie ndikwona ta ndonya kwĩanĩsya maũndũ onthe ala ngwendeka nĩanĩsye namina kũvatiswa.”
-
We ũu nĩwʼo wĩwʼaa?
KĨLA TWEEMANYĨSYA
Yeova no aũtetheesye nĩ kana ũkĩlye vinya ũndũ o na wĩva ũla ũũkũsiĩĩa ndũkavatiswe.
Makũlyo ma Kũsyokeleela
-
Waĩle kwĩthĩwa na ũmanyi wa Mbivilia wĩana ata nĩ kana ũvatiswe?
-
Nĩ moalyũku meva waĩle kwĩka ũtanamba kũvatiswa?
-
Nĩkĩ ũtaĩle kũkĩa kũvatiswa?
MAŨNDŨ ANGĨ MA KWĨMANYĨSYA
Soma wone kĩla kyaĩle kũtuma wĩyumya ũvatiswe.
“We Nĩwĩyũmbanĩsye Kũvatiswa?” (Mũsyaĩĩsya, Mwei wa 3, 2020)
Soma nĩ kana wone ũndũ ũtonya kũkĩlya vinya maũndũ amwe ala matonya kwĩthwa maũsiĩĩe ndũkavatiswe.
“Nĩ Kyaũ Kĩũnziĩĩa Kũvatiswa?” (Mũsyaĩĩsya, Mwei wa 3, 2019)
Ĩloele vitio wone ũndũ mũndũũme ũmwe wakĩlilye vinya maũndũ amwe maĩ maito mamũsiĩĩe ndakavatiswe.
Mbeenĩ, mũndũũme ũmwe wĩtawa Ataa nĩwakũĩĩasya kũvatiswa. Ĩloele vitio wone nĩ kyaũ kyamwĩkĩie vinya ose ĩtambya yĩu ya vata.
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
