ĨSOMO YA 26
Nĩkĩ kwĩ Ũthũku na Mathĩna Maingĩ?
Yĩla ũndũ mũna mũthũku weekĩka, andũ aingĩ nĩmakothaa kũkũlya, “Nĩkĩ weekĩka?” Ĩndĩ nĩtũtanaa mũno nũndũ Mbivilia nĩsũngĩĩte ĩkũlyo yĩu kwa nzĩa nzeo vyũ!
1. Nĩ kyaũ Satani weekie kyatuma kwĩthĩwa na mathĩna ĩũlũ wa nthĩ?
Satani, ũla Ndevili, nĩwaleanile na Ngai. Endaa kũsumbĩka ala angĩ, na nũndũ wa ũu, atuma andũ ma mbee, Atamu na Eva, mamũlea Ngai. Satani eekie ũu kwa kũmũkenga Eva. (Mwambĩlĩlyo 3:1-5) Atumie Eva ambĩĩa kũsũanĩa kana Yeova nĩ ta wamaimĩte maũndũ maseo. O na ĩngĩ, oonanisye kana andũ no methĩwe me atanu malea kũmwĩwʼa Ngai. Satani nĩwaneenie ũvũngũ wa mbee vyũ yĩla watavisye Eva kana ndakakwʼa. Na nũndũ wa ũu, Mbivilia ĩmwĩtĩte Satani “mũkengani na ĩthe wa ũvũngũ.”—Yoana 8:44.
2. Atamu na Eva manyuvie kwĩka ata?
Yeova nĩwoonetye Atamu na Eva ũlau mwingĩ mũno. Ameie kana no maye matunda ma mĩtĩ yonthe ĩla yaĩ mũũndanĩ ũsu ate o ma mũtĩ ũmwe. (Mwambĩlĩlyo 2:15-17) Ĩndĩ o na vailye ũu, manyuvie kũya matunda ma mũtĩ ũsu. Eva nĩwatwie “ũsyao wawʼo, aya.” Na ĩndĩ ĩtina anenga mũũme “nake aya.” (Mwambĩlĩlyo 3:6) Kwoou onthe nĩmaleile kũmwĩwʼa Ngai. Nũndũ Atamu na Eva mayaĩ na naĩ, ndwaĩ ũndũ wĩ vinya kwoo kwĩka kĩla kyaĩlĩte. Ĩndĩ nũndũ wa kũlea na ngenda kũmwĩwʼa Ngai, nĩmeekie naĩ na malea aimasumbĩka. Ũtwi ũsu nĩwamalikilye thĩnanĩ mũnene mũno.—Mwambĩlĩlyo 3:16-19.
3. Ũtwi ũla Atamu na Eva meekie ũtumĩte tũkwatwa nĩ kyaũ?
Yĩla Atamu na Eva mavĩtisye, nĩmakwatiwe nĩ naĩ, na matuma nzyawa syoo syonthe syĩthĩwa na naĩ. Mbivilia yaĩtye ũũ ĩũlũ wa Atamu: “Kwĩsĩla mũndũ ũmwe naĩ yalikile ĩũlũ wa nthĩ na kĩkwʼũ kwĩsĩla naĩ, na kwondũ wa ũu, kĩkwʼũ kyavikĩa andũ onthe.”—Alomi 5:12.
Ũmũnthĩ nĩtũkwatawa nĩ mathĩna nũndũ wa itumi syĩ kĩvathũkanyʼo. Mavinda amwe, tũthĩnaa nũndũ wa kwĩka motwi mate maseo. Mavinda angĩ, tũkwatawa nĩ mathĩna nũndũ wa motwi mate maseo ma andũ angĩ. O na nĩtũkwatawa nĩ mathĩna nũndũ wa maũndũ matataĩĩwe.—Soma Mũtavanʼya 9:11.
ĨMANYĨSYE MŨNANGO
Ĩmanyĩsye wone kana ti Ngai ũtumaa ũthũku na mathĩna methĩwa ĩũlũ wa nthĩ ũmũnthĩ, na ũimanya ũndũ wĩwʼaa yĩla woona tũithĩna.
4. Nũũ ũla ũtumaa tũthĩna?
Andũ aingĩ maĩkĩĩaa kana Ngai nĩwe ũsumbĩkĩte nthĩ ĩno. Ĩndĩ ũu nĩ wʼo? Ĩloelei VITIO.
Somai Yakovo 1:13 na 1 Yoana 5:19, na ĩndĩ mũineenea ĩkũlyo yĩĩ:
-
We Ngai nĩwe ũtumaa ũthũku na mathĩna methĩwa kwʼo?
5. Kwĩthĩĩtwe ata kuma Satani ambĩĩa kũsumbĩka nthĩ?
Somai Mwambĩlĩlyo 3:1-6, na ĩndĩ mũineenea makũlyo aa:
-
Satani akenganie ata?—Sisya mũsoa wa 4 na 5.
-
Satani oonanisye ata kana Yeova nĩ ta wamaimĩte andũ kĩndũ kĩseo?
-
Satani oonanisye ata kana ti nginya andũ matongoewʼe nĩ Yeova nĩ kana methĩwe me atanu?
Somai Mũtavanʼya 8:9, na ĩndĩ mũineenea ĩkũlyo yĩĩ:
-
Ĩvindanĩ yĩu Yeova ũtethĩĩtwe asumbĩkĩte nthĩ ĩno, maũndũ methĩĩtwe mailye ata?
-
Mbeenĩ Atamu na Eva mayaĩ na naĩ na mekalaa nthĩnĩ wa Valatiso. Ĩndĩ nĩmamwĩthukĩĩisye Satani na malea kũmwĩwʼa Yeova
-
Ĩtina wa ũlei ũsu, andũ nĩmakwatiwe nĩ naĩ, na mambĩĩa kũthĩna, o na kũkwʼa
-
Yeova akamina naĩ, mathĩna, na kĩkwʼũ. Na o tondũ kwailye mbeenĩ, andũ mayĩthĩwa me eanĩu na mayĩkala nthĩ yĩ Valatiso
6. Yeova nũtũthĩnĩkĩaa yĩla twĩ na mathĩna
We Ngai nũlũnganaa na mathĩna maitũ? Kwasũanĩa kĩla Mũsumbĩ Ndaviti na mũtũmwa Vetelo maandĩkie. Somai Savuli 31:7 na 1 Vetelo 5:7, na ĩndĩ mũineenea ĩkũlyo yĩĩ:
-
We weewʼa ata wamanya kana Yeova nũmanyaa yĩla twĩ mathĩnanĩ, na nũtũthĩnĩkĩaa mũno?
7. Ngai akamina mathĩna onthe ala matũkwataa
Somai Isaia 65:17 na Ũvuanyʼo 21:3, 4, na ĩndĩ mũineenea ĩkũlyo yĩĩ:
-
Nĩkĩ nĩ ũndũ wa kũtanĩthya mũno kũmanya kana Yeova akamina maũndũ mathũku onthe ala mathĩnasya andũ?
We nĩwĩsĩ?
Yĩla Satani waneenie ũvũngũ wa mbee vyũ, nĩwamwanangĩie Yeova ĩsyĩtwa. Kwa ndeto ingĩ, atumie andũ mambĩĩa kũsũanĩa kana Yeova nĩ Mũsumbĩ ũtasilaa katĩ na ũte wendo. Yeova akathesya ĩsyĩtwa yake yĩla ũkamina ũthũku wʼonthe ĩũlũ wa nthĩ ĩvindanĩ yũkĩte. Kwa ndeto ingĩ, akaĩkĩĩthya kana Ũsumbĩ wake nĩwʼo mũseo vyũ. Kũthewʼa kwa ĩsyĩtwa ya Yeova nĩwʼo ũndũ ũla wa vata vyũ ĩtunĩ na kũũ nthĩ.—Mathayo 6:9, 10.
ANDŨ AMWE MAASYA: “Ngai atũeteae mathĩna nĩ kana atũtate.”
-
We ũtonya kwasya ata?
KĨLA TWEEMANYĨSYA
Satani, ũla Ndevili, o vamwe na Atamu na Eva, nĩmo matumie ũthũku wĩthĩwa vaa ĩũlũ wa nthĩ. Yeova nũthĩnĩkaa mũno yĩla twĩ mathĩnanĩ, na o mĩtũkĩ nũkũmamina onthe.
Makũlyo ma Kũsyokeleela
-
Satani, ũla Ndevili, akengie Eva ata?
-
Ũlei wa Atamu na Eva ũtumĩte tũkwatwa nĩ maũndũ meva?
-
Nĩ kyaũ kĩũkũĩkĩĩthya kana Yeova nũthĩnĩkaa yĩla twĩ mathĩnanĩ?
MAŨNDŨ ANGĨ MA KWĨMANYĨSYA
Ĩmanyĩsye wone kĩla Mbivilia ĩwetete ĩũlũ wa naĩ.
Soma ũmanye maũndũ maingangĩ ĩũlũ wa kĩla Satani, ũla Ndevili, wawetie mũũndanĩ wa Eteni.
“Nĩkĩ Ngai Wĩtĩkĩlĩtye Andũ Mathĩne?” (Mũsyaĩĩsya, Ĩtukũ 1, Mwei wa 1, 2014)
Soma wone mosũngĩo ma kwendeesya ma ĩkũlyo yĩmwe yĩthĩnĩtye andũ mũno.
“Nĩkĩ Ayuti Aingĩ Mooaiwe Ĩvinda ya Hitler? Nĩkĩ Ngai Ũtaasiĩĩa Ũaani Ũsu?” (Ũvoo wĩ kĩsesenĩ)
Sisya wone kĩla mũndũũme ũmwe weemanyĩisye ĩũlũ wa ũthũku ũla woonaa ũendeee.
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
