Yeova nĩwanengete Aisilaeli asili mamatongoesye, ĩndĩ ve vandũ mavikie menda kũtongoeawʼa nĩ mũsumbĩ. Meeie Samueli atĩĩ: ‘Mbaĩ syonthe ila itũthyũlũlũkĩte itongoeawʼa nĩ asumbĩ. O naitũ twĩenda kũtongoeawʼa nĩ mũsumbĩ.’ Samueli ndaaendeewʼa nĩ ũndũ ũsu, na kwoou nĩwamũvoyie Yeova ĩũlũ wawʼo. Yeova amwĩie Samueli atĩĩ: ‘Andũ aa ninyie meũlea ĩndĩ tuwe. Matavye kana nũũmanyuvĩa mũsumbĩ, ĩndĩ mamanye kana mũsumbĩ ũsu akeethĩawa ayenda mamũnenge syĩndũ mbingĩ.’ Ĩndĩ o na ũu wĩ o vo, andũ asu maisye atĩĩ: ‘Tũikwenda kũmanya, ĩndĩ twĩenda mũsumbĩ!’

Yeova amwĩie Samueli kana Saulo nĩwe waĩ ethĩwe mũsumbĩ wa mbee wa Isilaeli. Yĩla Saulo waendie Lama kũmwona Samueli, Samueli nĩwamwĩtĩkĩisye mauta mũtwe nĩ kana atwʼĩke mũsumbĩ.

Ĩtina, Samueli nĩwoombanisye Aisilaeli nĩ kana amonyʼe mũsumbĩ woo mweũ. Ĩndĩ mamantha Saulo weethĩa mayĩũmwona. We nĩwĩsĩ aĩ va? Saulo eevithĩte mĩionĩ. Yĩla mesie kũmwona Saulo, nĩmamumĩlilye na mamũũngamya katĩ wa andũ. Saulo aĩ mũasa mũno kwĩ andũ onthe ala maĩ vau, na aĩ mwanake mũno. Samueli ameie atĩĩ: ‘Sisyai ũla Yeova ũnyuvĩte kwondũ wenyu.’ Yĩla andũ meewie ũu, nĩmatanie mũno na maneena na wasya mũnene makyasya: ‘Mũsumbĩ nĩekale thayũ ĩvinda yĩasa!’

Mbeenĩ mũsumbĩ Saulo nĩwamwĩthukĩĩasya Samueli na nĩwamwĩwʼaa Yeova. Ĩndĩ nĩwesie kũvĩndũka. Kwa ngelekanyʼo, ve ĩvinda Saulo waumisye nthembo o na kau ndaaĩle kumya nthembo isu. Samueli amwĩĩte Saulo amweteele oke kumya nthembo isu, ĩndĩ Samueli ndaaũka na mĩtũkĩ. Kwoou Saulo avanga kumya nthembo isu. Yĩla Samueli wookie eekie ata? Amwĩie Saulo atĩĩ: ‘Ndũnaaĩle kũlea kũmwĩwʼa Yeova.’ We Saulo nĩweemanyĩisye kumana na mavĩtyo make?

Ĩtina wa ĩvinda Saulo nĩwaendie kũkita na Aamaleki. Samueli amwĩie Saulo oae Aamaleki asu onthe. Ĩndĩ Saulo ndaamũaa Akaki  mũsumbĩ wa Aamaleki. Na nũndũ wa ũu Yeova amwĩa Samueli atĩĩ: ‘Saulo ndekwenda kũmbĩwʼa.’ Samueli nĩweewie woo mũno na kwoou amwĩa Saulo atĩĩ: ‘Nũndũ nũekete kũmwĩwʼa Yeova, nũkũnyuva mũsumbĩ ũngĩ.’ Yĩla Samueli wavĩndũkie athi, Saulo nĩwakwatie mũthya wa ngũa ya Samueli na yatembũka. Ĩtina wa ũu, Samueli amwĩie Saulo atĩĩ: ‘O tondũ ngũa ĩsu yatembũka, Yeova nũkũvenie ũsumbĩ.’ Yeova aĩ anenge ũsumbĩ ũsu mũndũ ũla ũmwendete na ũmwĩwʼaa.