Ndũanĩ ya Kaisalea vaĩ mũnene ũmwe wa asikalĩ ũla waĩ Mũlomi na eetawa Kolinelio. O na kau ndaĩ Mũyuti, Ayuti nĩmamũnengete ndaĩa. Aĩ mũlau na nĩwatetheeasya andũ ala ngya na me na mathĩna. Kolinelio nĩwamũĩkĩĩaa Yeova na amũvoyaa kĩla ĩvinda. Mũthenya ũmwe mũlaĩka nĩwookie kũla kwĩ Kolinelio na amwĩa: ‘Ngai nĩwĩwʼĩte mboya syaku. Kwoou yu tũma andũ ndũanĩ ya Yova vala Vetelo ũkwĩkala makamwĩe nĩ oke vaa kwaku.’ Kolinelio nĩwatũmie aũme atatũ mathi Yova ĩla yaĩ ta kĩlomita 50 ngalĩko ya ĩtheo.

Ĩvindanĩ o yĩu Vetelo e Yova nĩwoonie woni. Oonie nyamũ ila Ayuti mataaĩlĩte kũya, na ĩndĩ eewʼa wasya ũimwĩa aye nyamũ isu. Vetelo nĩwaleile na asya: ‘Nyie ndyaaya nyamũ ĩte ntheu mũthenya o na ũmwe.’ Ĩndĩ wasya ũsu wamwĩa: ‘Eka kwasya nyamũ ii ti ntheu. Ngai nũtumĩte syĩthĩwa syĩ ntheu.’ O ĩngĩ nĩwataviwʼe atĩĩ: ‘Ve aũme atatũ me mũomonĩ kwaku. Enda namo.’ Ĩtina wa ũu, Vetelo nĩwaendie mũomonĩ, na akũlya aũme asu kĩla mekwenda. Namo masũngĩa: ‘Twatũmwa nĩ Mũlomi wĩtawa Kolinelio, ũla nĩ mũnene wa asikalĩ. Eenda ũthi mũsyĩ kwake Kaisalea.’ Ũtukũ ũsu Vetelo nĩwathokisye  aũme asu makome kwake. Ĩndĩ mũthenya ũla waatĩĩe nĩwaendanisye namo Kaisalea, vamwe na ana-a-asa angĩ kuma Yova.

Yĩla Kolinelio woonie Vetelo, nĩwatulilye ndu. Ĩndĩ Vetelo amwĩa: ‘Ũkĩla. Nyie nĩ o mũndũ o taku. Ngai andũmie nũke mũsyĩ kwaku, o na kau Ayuti mailikaa mũsyĩ kwa andũ ma mbaĩ ingĩ. Kwoou, mwa ndavye nĩkĩ ũndũmanie.’

Nĩvo Kolinelio weeie Vetelo atĩĩ: ‘Mĩthenya ĩna mĩvĩtu nĩnakililye ndimũvoya Ngai, mũlaĩka ambĩa nĩũtũmane. Kwoou tũmanyĩsye ĩũlũ wa Yeova.’ Nake Vetelo amwĩa: ‘Nĩnamanya kana Ngai ndendeeasya andũ. Nĩwĩtĩkĩlaa mũndũ o na wĩva ũla ũkwenda kũmũthaitha.’ Vetelo nĩwamamanyĩisye maũndũ maingĩ ĩũlũ wa Yesũ. Kwoou, veva mũtheu nĩwookie ĩũlũ wa Kolinelio na andũ ala maĩ nake, na onthe mavatiswa.