Yĩla mũtũmwa Yoana woovetwe kĩthamanĩ kya Vatimo, Yesũ nĩwamwonisye mawoni 16 me kĩvathũkanyʼo. Mawoni asu maeleetye maũndũ ala maĩ methĩwe ĩvinda yũkĩte. Nĩmoonanĩtye ũndũ ĩsyĩtwa ya Ngai yĩkathewʼa, kũka kwa Ũsumbĩ wake, na ũndũ kwenda kwake kũkekwa ĩũlũ wa nthĩ o ta ĩtunĩ.

Woninĩ ũmwe Yoana nĩwoonie Yeova e ĩtunĩ ekalĩle kĩvĩla kyake kya ũsumbĩ kĩla kyaĩ kĩtheu mũno, na athyũlũlũkĩtwe nĩ atumĩa 24 ala meekĩĩte ngũa nzaũ, na mĩtwenĩ yoo maĩ na ngovia sya thaavu. Ũtisi na wasya wa kĩtundumo nĩsyaendeee kuma kĩvĩlanĩ kĩu. Namo ala atumĩa 24 nĩmakumanaa mbee wa Yeova na maimũthaitha. Na ĩndĩ woninĩ ũngĩ Yoana nĩwoonie andũ aingĩ mũno maumĩte nthĩ, mbaĩnĩ, na ithyomonĩ syonthe maendeee kũmũthaitha Yeova. Andũ asu maendeee kũtongoewʼa nĩ Kalondu, kana Yesũ, nginya kĩwʼũnĩ kya thayũ. Ĩtina, Yoana nĩwooniwʼe woni wa Yesũ ayambĩĩa kũsumbĩka ta Mũsumbĩ ĩtunĩ e vamwe na ala atumĩa 24. Woni ũla waatĩĩe ũsu, Yoana nĩwoonie Yesũ ayũkita na mũkũnga vamwe na ndaimoni syawʼo. Mũkũnga ũsu nĩ Satani. Yesũ nĩwasindie kaũ ũsu na ekya Satani na ndaimoni syake kũũ nthĩ.

 Nĩvo ĩndĩ Yoana woonie woni mũseo wa kala Kalondu na andũ 144,000 maũngye Kĩĩmanĩ kya Saioni. O na ĩngĩ, nĩwoonie mũlaĩka aũlũkĩte ĩũlũ wa nthĩ na aitavya andũ mamũkĩe Ngai na maimũkumya.

Yoana amina kwonwʼa woni ũsu nĩwasyokie oonwʼa ũngĩ woonanĩtye kaũ wa Alimaketoni ũendeee. Kaũnĩ ũsu, Yesũ na ita syake nĩmaanangie vyũ nthĩ ĩno nthũku ya Satani. Na ĩndĩ woninĩ wa mũthya, Yoana nĩwoonie syũmbe syonthe ĩtunĩ na ĩũlũ wa nthĩ iimũtaĩa Yeova syĩ ngwatanĩo. Satani vamwe na onthe ala maĩ ngalĩko yake nĩmaanangiwe vyũ. Woni ũsu nĩwoonanĩtye kĩla kyũmbe kĩ ĩtunĩ na kũũ ĩũlũ wa nthĩ kĩendeee kũtaĩa ĩsyĩtwa ĩtheu ya Yeova na kũmũthaitha e weka.