Yesũ amina kũkwʼa, ve mũndũũme ũmwe waĩ mũthwii weetawa Yosevu ũla waendie vala ve Vilato na amwĩtya mwanya akaumye mwĩĩ wa Yesũ mũtĩnĩ. Yosevu nĩwaumisye mwĩĩ wa Yesũ mũtĩnĩ, aũlinga ngũa nzeo ya katane, aũvaka syĩndũ syĩ mũuke mũseo, na ĩndĩ awia mbũanĩ ĩtaĩ yaathikwa mũndũ ũngĩ. Amina kwĩka ũu nĩwavingie mbũa ĩsu na ĩvia ĩnene. Namo anene ma athembi nĩmaendie vala ve Vilato na mamwĩa atĩĩ: ‘Nĩtũũkĩa nũndũ twĩona amanyĩwʼa amwe ma Yesũ no mose mwĩĩ wake na mayasya kana nũthaayũkie.’ Nĩvo ĩndĩ Vilato wameie, ‘Vingai mbũa ĩsu nesa na mũimĩsunga.’

Ĩtina wa mĩthenya ĩtatũ, ve aka maendie mbũanĩ kwakya tene na meethĩa kana yĩla ĩvia yamĩvingĩte nĩyĩvetiwe. Vaĩ mũlaĩka waĩ vau mbũanĩ nthĩnĩ na eeie aka asu atĩĩ: ‘Ekai kũkĩa. Yesũ nũthayũũkiwʼe. Endai mũkatavye amanyĩwʼa make mathi makakomane nake Kalilii.’

Mũndũ mũka ũmwe katĩ wa aka asu eetawa Meli Makatalene na nĩweekalatile athi kũtavya Vetelo na Yoana. Ameie: ‘Ve mũndũ wosie mwĩĩ wa Yesũ.’ Ĩtina wa ũu Vetelo na Yoana nĩmasembie nginya mbũanĩ. Yĩla masyaisye nthĩnĩ na meethĩa vate kĩndũ, nĩmenũkie.

Yĩla Meli wasyokie mbũanĩ, nĩwoonie alaĩka elĩ me vau mbũanĩ nthĩnĩ na ĩndĩ amea: ‘Ndyĩsĩ andũ mosie mwĩĩ wa Mwĩaĩi wakwa na mathi kũwia va.’ Ĩtina wa ũu nĩwoonie mũndũ na nũndũ oonaa tawe wasũvĩaa mũũnda ũsu, amwĩa: ‘Mwa ndavye vala ũiĩte mwĩĩ wa Yesũ.’ Ĩndĩ yĩla mũndũ ũsu wamwĩtie “Meli!” ũu watumie Meli amanya kana mũndũ ũsu nĩ Yesũ. Nĩvo ĩndĩ waneenie na wasya mũnene asya: “Mũmanyĩsya!” na amwĩkwatĩlĩĩla. Nake Yesũ amwĩa: ‘Enda ũkatavye ana-a-asa makwa kana nĩwambona.’ Vate kwananga ĩvinda Meli nĩwasembie na athi amatavya kana nĩwoona Yesũ.

Kũtanatuka, amanyĩwʼa elĩ nĩmaumie Yelusaleme mathi ndũanĩ ya Emau. Me nzĩanĩ ve mũndũ wookie aendanyʼe namo na amakũlya nĩ kyaũ maneeneaa. Namo mamũsũngĩa mamwĩa: ‘Ndũnewʼa kĩla kĩkĩkie? Mĩthenya ĩtatũ mĩvĩtu, anene ma athembi nĩmanamũaie Yesũ. Ĩndĩ yu,  ve aka mekwasya kana nũthayũũkiwʼe.’ Nĩvo ĩndĩ mũndũ ũsu wamakũlilye atĩĩ: ‘Inywʼĩ nĩmũĩkĩĩaa ndeto sya athani? Maisye kana Klĩsto akakwʼa na aithayũũkwʼa.’ Mũndũ ũsu nĩwaendeeie kũmaelesya maandĩko angĩ makonetye ũndũ ũsu. Yĩla mavikie ndũanĩ ya Emau amanyĩwʼa asu meeie mũndũ ũsu athi namo vala maendete. Maiya lĩu wa wĩoo, mũndũ ũsu nĩwavoyie matanamba kũya na ĩndĩ mamanya aĩ Yesũ. Na o ndatĩkanĩ ĩsu aaa.

Ĩtina wa ũu, amanyĩwʼa asu elĩ nĩmeekalatile na mathi Yelusaleme vala atũmwa moombanĩe na mamatavya maũndũ ala moona. Ĩndĩ o maendeee kũneena, Yesũ nĩwamaumĩlĩĩile. Yĩla mamwonie, mayaĩ matonya kũmanya kana aĩ Yesũ. Na ĩndĩ Yesũ amea: ‘Sisyai moko makwa; na mũingwata. Kũandĩkĩtwe kana Klĩsto akathayũũkwʼa.’