Yesũ na atũmwa make nĩmaingie Mwanda wa Kitiloni na mathi Kĩĩmanĩ kya Mĩthata. Kwaĩ kũvĩtũkie ũtukũ katĩ, na mwei waĩ mũima. Yĩla mavikie mũũndanĩ wa Ngesemanii, Yesũ eeie atũmwa make atĩĩ: “Ĩkalai vaa na mũyĩendeea kũsyaĩĩsya.” Ĩtina wa ũu, Yesũ nĩwaendangie na atulya ndu. Na nũndũ nĩwathĩnĩkaa mũno, nĩwavoyie Yeova amwĩa: “Eka kwenda kwaku kwĩkĩke.” Na ĩndĩ Yeova atũma mũlaĩka nĩ kana amwĩkĩe vinya. Yĩla Yesũ wasyokie vala ve atũmwa make, amethĩie onthe me atatũ makomete. Nĩvo ĩndĩ wameie: ‘Amũkai. Mũyaĩlĩte kwĩthĩwa mũkomete ĩvindanĩ yĩĩ. Saa nĩ mũviku nĩ kana nĩnenganwe mokonĩ ma amaitha makwa.’

Ĩtina wa kavinda kanini, Yutasi nĩwavikie atongoesye andũ aingĩ makuĩte mbyũ na nzũma. Yutasi nĩweesĩ vala Yesũ waĩ nũndũ mavinda maingĩ nĩmaendaa vau me na Yesũ na amanyĩwʼa ala angĩ. O na nĩwatavĩtye asikalĩ kana nũkũmonyʼa Yesũ nĩwe wĩva. Kwoou, aendie ĩmwe kwa ĩmwe vala ve Yesũ na amwĩa: ‘Ũvoo mũmanyĩsya,’ na ĩndĩ amũmumunya. Nake Yesũ amwĩa: ‘Yutasi wĩmbũnyanĩa kwa kũmumunya?’

Ĩtina wa ũu, Yesũ nĩwathengeeie andũ asu na amakũlya: “Mwĩmantha ũũ?” Namo masũngĩa masya: “Yesũ Mũnasaleti.” Na ĩndĩ amasũngĩa: “Ninyie we,” na andũ asu masyoka ĩtina na mavalũka nthĩ. Ĩtina wa ũu Yesũ nĩwamakũlilye ĩngĩ: “Mwĩmantha ũũ?” Namo mamwĩa: “Yesũ Mũnasaleti.” Nĩvo ĩndĩ Yesũ wamasũngĩie: ‘Namwĩa ninyie we. Kwoou ekanai na aũme aa mathi.’

Yĩla Vetelo wamanyie kĩla kyaendeee, nĩwaumisye ũvyũ wake na atila kũtũ kwa Malikusi, ũla waĩ mũthũkũmi wa mũthembi mũnene. Ĩndĩ Yesũ nĩwakiitie kũtũ kwa mũndũũme ũsu na avoa. Na ĩndĩ amwĩa Vetelo: ‘Tũnga ũvyũ waku.  Wokita na ũvyũ, ũkooawa na ũvyũ.’ Ĩtina wa ũu, asikalĩ nĩmamũkwatie Yesũ, moova moko make, namo atũmwa moona ũu masemba mathi. Na ĩndĩ andũ asu matwaa Yesũ kwa mũnene wa athembi, ũla weetawa Anasi. Anasi nĩwamũkũlilye Yesũ makũlyo na asya atwawe kwa Mũthembi Mũnene Kaiava. Ĩndĩ nĩ maũndũ maũ mesie kũkwata atũmwa?