Vasaka ya mwaka wa 32 ĩtanamba kũvika, atũmwa nĩmasyokie kuma kũla maendete kũtavanyʼa. Maĩ anou, na kwoou Yesũ amea maendanyʼe nake Vethisaita makathũmũe kwʼo. Maendie na ĩsiwa. Ĩndĩ yĩla ĩsiwa yavikie ũtee wa ũkanga, Yesũ nĩwoonie andũ ngili mbingĩ ala mamũatĩĩie vau. O na kau Yesũ endaa kwĩthĩwa e na atũmwa make me oka, nĩwathokisye andũ asu nesa. Nĩwavoisye andũ ala maĩ awau na ambĩĩa kũmamanyĩsya. Mũthenya ũsu wʼonthe, nĩwamamanyĩisye ĩũlũ wa Ũsumbĩ wa Ngai. Yĩla kwatukie, atũmwa nĩmaendie vala ve Yesũ na mamwĩa: ‘No nginya andũ aa methĩwe mayĩwʼa nzaa. Matavye mathi makamanthe kĩndũ maye.’

Yesũ eeie atũmwa make atĩĩ: ‘Andũ aa mayaĩle kũthi. Manengei kĩndũ maye.’ Namo atũmwa mamũkũlya Yesũ: ‘Wĩenda tũthi tũkamathooee mĩkate?’ Ũmwe wa atũmwa ũla weetawa Vilivu, asya: ‘O na kethĩwa twĩĩ na mbesa mbingĩ, tũyĩsa kũthooea andũ aa maingĩvĩte ũu mĩkate yĩanĩtye.’

Nake Yesũ amakũlya: ‘Twĩ na lĩu wĩana ata?’ Mũtũmwa ũmwe weetawa Endelea asũngĩa asya: ‘Twĩ na mĩkate ĩtano na tũkũyũ twĩlĩ tũnini, na lĩu ũsu ndwĩsa kwĩana o na vanini.’ Nake Yesũ amea: ‘Ndeteei mĩkate ĩsu na makũyũ asu.’ Ĩtina wa ũu, eeie andũ asu mekale nthĩ nyekinĩ me ikundi sya andũ 50 na ingĩ sya andũ 100. Nĩvo ĩndĩ Yesũ woosie mĩkate ĩsu na makũyũ, asisya ĩtunĩ, na avoya. Ĩtina wa ũu, nĩwanengie atũmwa lĩu ũsu, namo manenga andũ. Onthe ala maĩ vau, aũme 5,000 na iveti na syana nĩmaĩe mavũna. Mamina  kũya, atũmwa nĩmoosanisye lĩu ũla watialile, nĩ kana vaikanangĩke kĩndũ. Moosanisye ikavũ 12 syusĩe. Vate nzika, kĩu kyaĩ kyama kya kũsengyʼa mũno.

Kyama kĩu Yesũ weekie nĩkyatumie andũ matana mũno nginya menda kũmũtwʼĩkĩthya mũsumbĩ. Ĩndĩ Yesũ nĩweesĩ kana yĩu ti yo yaĩ ĩvinda ya Yeova ya kũmũtwʼĩkĩthya mũsumbĩ. Kwoou, nĩweeie ĩkomano yĩu ya andũ yĩthi na eea atũmwa make maende ngalĩko ĩla ĩngĩ ya Ũkanga wa Kalilii. Atũmwa nĩmalikile ĩsiwanĩ mathi, nake Yesũ athi kĩĩmanĩ e weka. Nĩkĩ waendie kĩĩmanĩ e weka? Nũndũ nĩwendaa ĩvinda ya kũvoya Asa wake. O na Yesũ e na maũndũ maingĩvĩte ata, nĩwaumasya ĩvinda kwondũ wa kũvoya.