Ve mũsumbĩ ũngĩ wa Mbaviloni weetawa Ndalio Mũmetia. Ndalio nĩweesĩ kana Ndanieli nĩ mũndũ wa mwanya. Kwoou nĩwamũnyuvie aũngamĩe andũ ala anene ma nthĩ ĩsu. Andũ asu nĩmambĩĩie kũmwĩwʼĩa Ndanieli kĩwĩu, na kwoou mavanga kũmũmina. Na nũndũ nĩmeesĩ Ndanieli amũvoyaa Yeova mavinda atatũ kĩla mũthenya, nĩmaendie kũla kwĩ Ndalio na mamwĩa: ‘Mũsumbĩ, nĩ vaĩle kwĩthĩwa na mwĩao ũkwasya kana andũ onthe nue maĩle kũvoya. Mũndũ o na wĩva ũla wĩlea kwĩwʼa mwĩao ũsu aĩle kwĩkwʼa ĩimanĩ yĩ na mĩnyambũ.’ Ndalio nĩwendeeiwʼe nĩ woni ũsu na kwoou eekĩa mwĩao ũsu saii.

Yĩla Ndanieli weewie ĩũlũ wa mwĩao ũsu mweũ, nĩwaendie nyũmbanĩ yake. Alika, atulilye ndu mbee wa ndĩlĩsya ĩla yaĩ mbingũe, na amũvoya Yeova. Aendeee kũvoya, ala aũme maĩ kĩwĩu nĩmalikile nyũmbanĩ yake na mamwĩthĩa aivoya. Nĩmasembie kũla kwĩ Ndalio na mamwĩa: ‘Ndanieli nĩwatũla mwĩao. Avoyaa kwa Ngai wake mavinda atatũ kĩla mũthenya.’ Ndalio nĩwamwendete Ndanieli mũno na ndendaa aikwʼa. Mũthenya ũsu wʼonthe nĩwaendeee kũsũanĩa ũndũ ũtonya kũmũtangĩĩa. Ĩndĩ o na eeka ata, ndaĩ atonya kũalyũla mwĩao ũla we mwene weekĩĩte saii. Nĩwameaĩe athũkũmi make mamwĩkye Ndanieli ĩimanĩ ya mĩnyambũ yaĩ mĩthũku mũno.

 Ũtukũ ũsu, Ndalio nĩwathĩnĩkie mũno nũndũ wa Ndanieli nginya aaĩwa nĩ too. Kwakya kũu, Ndalio nĩwasembie yĩla ĩimanĩ, na ĩndĩ amwĩta Ndanieli amũkũlya: ‘Ngai waku nũkũtangĩĩie?’

Ndalio nĩweewie wasya wa mũndũ aineena. Waĩ wasya wa Ndanieli. Nĩvo ĩndĩ Ndanieli wamwĩie Ndalio atĩĩ: ‘Yeova nũtũmie mũlaĩka atumya makanywʼa ma mĩnyambũ. Ndĩnambũmĩsya o na vanini.’ Ndalio nĩwatanie mũno, na ĩndĩ asya Ndanieli aumwʼe yĩla ĩimanĩ. Ndanieli aumie vau ate mũũmĩsye o na vanini. Nĩvo ĩndĩ mũsumbĩ waumisye mwĩao asya: ‘Makwatei onthe ala manamũsikatĩte Ndanieli na matuma ekwʼa ĩimanĩ ya mĩnyambũ.’ Yĩla aũme asu makwatiwe nĩmekiwʼe yĩla ĩimanĩ na mĩnyambũ ĩsu yamatilanga tũlungu.

Ndalio nĩwatũmanie kũla kwĩ andũ make onthe asya: ‘Kĩla mũndũ aĩlĩte kũkĩa Ngai wa Ndanieli. Nĩwe ũmũtangĩĩie ndakaminwe nĩ mĩnyambũ.’

We nũmũvoyaa Yeova kĩla mũthenya o tondũ Ndanieli weekaa?