Andũ onthe ma kĩveva ala Yeova woombie maĩ aseo. Nĩvo ĩndĩ mũlaĩka ũmwe waalyũkile atw’ĩka mũthũku. Nĩwe Satani Ndevili. Satani eethĩiwe ayenda andũ ĩũlũ wa nthĩ mamũthaithe we vandũ va Yeova. Kweethĩiwe ũũ:

Nthĩnĩ wa mũũnda wa Eteni, kwaĩ mĩtĩ mingĩ yasyaaa matunda me mũyo. Yeova eeie Atamu na mũka, Eva, kana maĩ matonya kũya mosyao mayo me na ũthasyo. Ĩndĩ vaĩ mũtĩ ũmwe ũla Ngai waisye maikaye mosyao maw’o. Aisye maya kumana naw’o, makakw’a vate nzika.—Mwambĩlĩlyo 2:9, 16, 17.

Mũthenya ũmwe Eva aĩ weka yĩla nzoka yaneenie nake. Kwa w’o, ti nzoka mbene yaneenie; Satani Ndevili nĩwe watumie kwoneka ta nzoka yaneenaa. Satani eeie Eva kana aya ĩtunda yĩla yavatanĩtwe, akeethĩwa e mũĩ ta Ngai. O na ĩngĩ nĩwaisye kana mũndũ mũka ũsu ndakakw’a. Moneeni asu elĩ maĩ movũngũ. Ĩndĩ, Eva nĩwaĩkĩĩie Satani na aya yĩla ĩtunda. Ĩtina wa ũu, nĩwanengie Atamu kĩlungu, o nake aya.—Mwambĩlĩlyo 3:1-6.

Kumana na ngewa ĩno ya w’o, twĩĩmanyĩsya kana Satani nĩ mũng’endu na nĩ mũneeni wa ũvũngũ. Eeie Eva kana alea kũmwĩw’a Ngai, ndakakw’a. Ũsu waĩ ũvũngũ. Mũndũ mũka ũsu vamwe na Atamu nĩmakwie. Satani ndaakw’a ĩvinda yĩu, o na vala mũminũkĩlyonĩ akesa kũkw’a nũndũ nĩweekie naĩ. O na kũilyĩ ũu, kwa yuyu e thayũ na aendeeaa kwasya mũvaĩ-wa-andũ. We no mũneeni wa ũvũ ngũ o na yuyu, na atataa kũtuma andũ matũla mĩao ya Ngai.—Yoana 8:44.

Ĩtina wa ũu, alaĩka angĩ nĩmaalyũũkile matw’ĩka athũku. Alaĩka asu moonie andũ aka anake ĩũlũ wa nthĩ na menda kũkomany’a namo. Kwoou mooka nthĩ na meekĩa mĩĩ ya kĩmũndũ ya kĩũme. Nĩvo ĩndĩ meeyoseie andũ aka asu. Ũndũ ũsu waĩ kũleana na kwenda kwa Ngai.—Mwambĩlĩlyo 6:1, 2; Yuta 6.

O na nĩwaeteie mũvaĩ-wa-andũ thĩna mwingĩ. Aka ma alaĩka asu nĩmasyaie syana, ĩndĩ syaĩ syana syĩ kĩvathũkany’o mũno. Syeanie syatw’ĩka mamũndũ mang’endilĩ, me ngũlũ. Ĩtina nthĩ nĩyausũie mũno ũng’endilĩ kũvika Yeova atw’a kwananga andũ athũku na kĩw’ũ kingĩ. Andũ oka ala mavonokie kĩla Kĩw’ũ Kingĩ maĩ Noa mũlũngalu na andũ ma mũsyĩ wake.—Mwambĩlĩlyo 6:4, 11; 7:23.

O na kũilyĩ ũu, ala alaĩka athũku nĩmasyokie wĩkalonĩ wa maveva; mayaakw’a. Ĩndĩ nĩmakwatie ũĩvĩthyo wa kwĩka naĩ. Mayaaĩtĩkĩlw’a kũsyoka nthĩnĩ wa mũsyĩ wa Ngai wa alaĩka alũngalu. Kwongeleela ũu, Yeova ndaasyoka kũmaeka mekĩe ĩngĩ mĩĩ ya kĩmũndũ. Na makooka kũkw’a nthĩnĩ wa ũla ũsilĩlo mũnene.—2 Vetelo 2:4; Yuta 6.

Mbeange nthĩnĩ wa kalinĩ ĩno yitũ, nĩkweethĩiwe kaũ ĩtunĩ. Ĩvuku ya Mbivilia ya Ũvuany’o nĩyĩnenganae ũvoo ũndũ kweethĩiwe: “Na kwaĩ kaũ ĩtunĩ: Mikaeli [Yesũ Klĩsto mũthayũũkw’a] na alaĩka make [aseo] maithi kũkita na ũla mũkũnga mũnene [Satani]; na mũkũnga ũsu na alaĩka maw’o [athũku] mokita; nao maiaakĩlya vinya, o na vaiaaoneka vandũ voo ĩtunĩ ĩngĩ. Na mũkũnga ũsu mũnene wekw’a nthĩ, naw’o nĩ nzoka ĩla ngũũ, yĩtawa Ndevili, na ĩngĩ Satani, mũkengani wa nthĩ yonthe; ekw’a nthĩ, na alaĩka make [athũku] mekw’a nthĩ vamwe nake.”

Na ĩndĩ kweethĩwa ata? Ũvoo wĩendeea kwasya atĩĩ: “Kwondũ wa ũu tanai, inyw’ĩ matu, na inyw’ĩ ala mũtwĩe nthĩnĩ wamo”! Alaĩka asu aseo maĩ matonya kũtana nũndũ Satani na ala alaĩka kana maveva mathũku nĩmavetiwe ĩtunĩ. Ĩndĩ nata kwa andũ ĩũlũ wa nthĩ? Mbivilia yaasya atĩĩ: “Woo nĩ wa nthĩ na wa ũkanga: nũndũ ndevili nĩwamũtheeea inyw’ĩ, e na ũthilĩku mũnene, akĩmanya kana e na kavinda o kanini.”—Ũvuany’o 12:7-9, 12.

Ĩĩ, Satani na atindany’a make athũku nĩmaasya andũ ĩũlũ wa nthĩ na kũmaetee woo mũnene. Alaĩka asu athũku metawa ndaimoni. Mo nĩ amaitha ma Ngai. Onthe nĩ athũku.