Satani na ndaimoni methĩĩtwe me ang’endu na me mũisyo ĩvinda yonthe. Mavinda ma tene Satani ooaie indo na athũkũmi ma Yovu wĩ kĩthito. Nĩvo ĩndĩ wooaie syana ĩkũmi sya Yovu kwa kũtuma “kĩseve kĩnene” kyananga nyũmba ĩla syaĩ. Ĩtina wa ũu Satani nĩwakũnie Yovu na “mĩimũ mĩthũku kuma ũnyaĩĩ wa kũũ kwake kũvika lolotya wake.”—Yovu 1:7-19; 2:7.

Mũthenyanĩ wa Yesũ, ndaimoni syatumie andũ amwe methĩwa andũ mataneenaa, na ililinda. (Mathayo 9:32, 33; 12:22) Syathĩnisye mũndũ mũũme ũmwe mũno na syatuma etilanga na mavia. (Maliko 5:5) O na nĩsyatumie kĩmwana kĩmwe kĩkaya, syakĩkimany’a na nthĩ, na ‘syakĩthingithangya [‘syatuma kĩyiliitya na kwĩkootanga naĩ mũno,’ ũalyũũlo wa New World].’—Luka 9:42.

Ũmũnthĩ, Satani na ndaimoni nĩ oaani mũno o ta tene. Kwa w’o, ũthũkũmi woo nĩ mwongeleku kuma yĩla mekiw’e kuma ĩtunĩ. Movoo ala mekuma kĩthyũlũlũ kya nthĩ yonthe  meĩkĩĩthya ũng’endu woo. Makũnaa andũ amwe na ũwau. Mathĩnasya andũ angĩ ũtukũ, makĩmavata too kana kũmanenga ndoto nthũku mũno. Nĩmathĩnasya andũ amwe makew’a ta makomanĩtye na mũndũ ũngĩ. O na nĩmaũũkasya andũ amwe, makaingĩĩsya angĩ moaane, kana angĩ kwĩyũaa.

Lintina, ũla wĩkalaa Sulinamu, enengana ũvoo akĩweta kana ndaimoni ĩmwe, kana veva mũthũku, nĩyooaie andũ 16 ma mũsyĩ wake na yamũthĩny’a mũno kĩmwĩĩ na kĩlĩkonĩ kwa ĩvinda ya myaka 18. Kwa kwĩyonea we mwene ũndũ kwĩthĩawa kũilyĩ, easya kana ndaimoni “itanĩaa kũthĩny’a mũno ala matekwenda kũthĩnw’a kũvika ikamoaa.”

Ĩndĩ Yeova nũtonya kũsũvĩa athũkũmi make na mokũno ma Satani.—Nthimo 18:10.