Kwasũanĩa wĩkalaa ndũanĩ ya Yeliko. Ndũa ĩsu yĩ nthĩ ya Kanaani, na andũ ma kũu maimũthaithaa Yeova. Mũndũ mũka wĩtawa Laavi ekalaa ndũanĩ ĩsu.

Ĩla Laavi waĩ kelĩtu kanini nĩweewie ũndũ Mose waanisye Ũkanga Mũtune, na atongoesya syana sya Isilaeli kuma Misili. O na ĩngĩ, nĩweewie ũndũ Yeova wamatetheeisye Aisilaeli kũsinda amaitha moo kaũnĩ. Na yu Laavi nĩwĩsĩ kana Aisilaeli nĩmombanĩte vakuvĩ na ndũa ya Yeliko!

Mũthenya ũmwe kũtanamba kũtuka vyũ, Aisilaeli elĩ nĩmaendie ndũanĩ ya Yeliko nĩ kana makasisye ũndũ ĩilyĩ. Mavika ndũanĩ ĩsu, nĩmaendie kwa Laavi, nake amathokya kwake. Ũtukũ ũsu, mũsumbĩ wa Yeliko nĩwamanyie kana kwĩ andũ elĩ malikile ndũanĩ ya Yeliko na mathi kwa Laavi. Kwoou mũsumbĩ atũma andũ makamakwate. Ĩla Laavi wamanyie ũu, nĩwamavithie andũ asu elĩ kĩalanĩ kya nyũmba yake. Amina kwĩka ũu, Laavi nĩwameie andũ ala matũmĩtwe nĩ mũsumbĩ atĩĩ: ‘Andũ asu nĩmokie kwakwa, ĩndĩ nĩmaendie. Maatĩĩei na mĩtũkĩ na nĩmũũmakwata!’ Nĩwĩsĩ nĩkĩ Laavi wamavithie Aisilaeli asu elĩ?— Nũndũ nĩwamũĩkĩĩe Yeova na nĩweesĩ kana Yeova akamanenga Aisilaeli nthĩ ya Kanaani.

Aisilaeli asu matanamba kuma kwa Laavi, nĩmamwathie kana we na andũ ma nyũmba yake makatangĩĩwa ĩla Yeliko yĩanangwa. Nĩwĩsĩ Aisilaeli asu mamwĩie eke ata?— Mamwĩie atĩĩ: ‘Osa ĩkanda yĩĩ ĩtune na ũiyoveleela ndĩlĩsyanĩ ya nyũmba yaku. Weeka ũu, andũ onthe ala makethĩwa nyũmbanĩ yaku makatangĩĩwa.’ Laavi nĩweekie o ũndũ Aisilaeli asu mamwĩie. Nĩwĩsĩ ũndũ kweethĩiwe mamina kũthi?—

Ĩtina wa matukũ manini, Aisilaeli nĩmeelingĩlile ndũa ya Yeliko mavindĩtye ki. Mambie kwĩlingĩla ndũa ĩsu mĩthenya thanthatũ, na meelingĩlaa yĩlingĩla o yĩmwe kĩla mũthenya. Ĩndĩ mũthenya wa mũonza, meelingĩlile mavinda mũonza. Mamina melingĩla asu, Aisilaeli nĩmalonzanisye na wasya mũnene. Na o vu kwa vu, Yeova avalũkya ngũta sya ndũa ĩsu. Ĩndĩ nyũmba ĩla yaĩ na yĩla ĩkanda ĩtune ndĩlĩsyanĩ ndyaavalũka! Nũmyene nyũmba ĩsu visanĩ  ũũ?— Laavi na andũ ma nyũmba yake nĩmatangĩĩiwe!

Ũtonya kwĩmanyĩsya kyaũ kumana na Laavi?— Laavi nĩwamũĩkĩĩie Yeova nũndũ wa maũndũ ma ũsengy’a ala weemanyĩisye ĩũlũ wake. O naku nũtonya kũendeea kwĩmanyĩsya maũndũ ma ũsengy’a ĩũlũ wa Yeova. We nũmũĩkĩĩaa Yeova o tondũ Laavi wamũĩkĩĩte?— Nĩnĩsĩ nũmũĩkĩĩaa.