KWASISYA matunda aa makuĩtwe nĩ aũme aa. Kwasisya ũndũ kĩtũngo kĩĩ kya nzavivũ kĩnenevete. No mũvaka kĩkuwe nĩ aũme elĩ na mũtĩ. Na kwasisya makũyũ na makũngũmanga. Matunda aa manakavĩte ũu maumĩte va? Maumĩtw’e nthĩ ya Kanaani. Lilikana kana Kanaani nĩ kw’o Avalaamu, Isaka na Yakovo mekalaa ĩvinda ya tene. Ĩndĩ nũndũ wa nzaa ĩla yaĩ kũu, Yakovo vamwe na andũ ma mũsyĩ wake mathamĩĩa Misili. Na ĩtina wa myaka ta 216, Mose nĩwamatongoesye Aisilaeli amatũnge Kanaani. Na yu maĩ weũnĩ, vandũ veetawa Katesi.

Nthĩ ya Kanaani yekalaa andũ athũku. Kwoou Mose atũma athiani 12, na amea: ‘Sisyai nĩ andũ meana ala matwĩe kw’o, na mena vinya kana mati na vinya. Sisyai mwone ũndũ nthĩ ĩilyĩ kana nĩ nzeo ya kũĩma. Na mũikaeme kũsyoka na ũsyao ũmwe wa nthĩ ĩsu.’

Yĩla athiani asu masyokie Katesi, matavisye Mose ũũ: ‘Ĩsu nĩ nthĩ nzeo vyũ.’ Na nĩ kana maĩkĩĩthye ũu nĩw’o, moony’a Mose ũsyao wayo. Ĩndĩ athiani 10 katĩ woo masya: ‘Andũ ala matwĩe nthĩ ĩsu nĩ anene na me na vinya. Tũkooawa ethĩwa tũkatata kwosa ĩ nthĩ.’

Yĩla Aisilaeli meewie ũu makĩa na masya, ‘Twenda kethĩwa twakw’ĩĩe nthĩ ya Misili kana vaa weũnĩ. Tũkooaĩwa kaũnĩ, na iveti sitũ na syana sitũ iitavwa. Twie mũndũ ũngĩ ethĩwe mũtongoi vandũ va Mose, na tũisyoka Misili!’

Ĩndĩ elĩ, katĩ wa ala athiani 12, nĩmamũĩkĩĩe Yeova, namo matata kũvoovya andũ. Masyĩtwa moo nĩ Yosua na Kalevu. Mameie: ‘Mũikakĩe. Yeova e vamwe naitũ. Ũkeethĩwa ũndũ ũvũthũ kwitũ kwosa ĩ nthĩ.’ Ĩndĩ andũ mayaaĩthukĩĩsya. O na nĩmendaa kũaa Yosua na Kalevu.

Ũndũ ũsu nĩwathilĩkilye Yeova mũno, nake amwĩa Mose: ‘Vai ũmwe wa ala mavikĩtye myaka 20 na mbee ũkalika nthĩ ya Kanaani. Nĩmonete syama syonthe ila neekie Misili na vaa weũnĩ, na o na kũilyĩ ũu maikũndĩkĩĩa. Kwoou makanganga weũnĩ myaka 40 nginya mũndũ wa mũthya akw’e. No Yosua na Kalevu makalika nthĩ ya Kanaani.’

Motalo 13:1-33; 14:1-38.