Ngewa ya 5: Kwambĩĩa kwa Ĩvinda ya Thĩna
NZA wa mũũnda wa Eteni, Atamu na Eva maĩ na mathĩna maingĩ. Maĩ no mũvaka mathũkũme na vinya nĩ kana makwate lĩu. Vandũ va mĩtĩ yĩ matunda maseo, moonie mĩw’a mingĩ na thangila imeete kĩla vandũ. Ũu nĩ w’o weethĩiwe yĩla Atamu na Eva maleile kũmwĩw’a Ngai na maeka kũtw’ĩka anyanya Make
Na ũndũ ũla mũthũku vyũ, Atamu na Eva nĩmambĩĩie kũkw’a. Lilikana Ngai nĩwamatavĩtye kana makakw’a ethĩwa makaya kuma mũtĩnĩ mũna. Mũthenya o ũla maĩye now’o mambĩlĩĩlye kũkw’a. Matumanĩte ta kĩ kũema kũmwĩw’a Ngai!
Syana syonthe sya Atamu na Eva syasyaiwe ĩtina wa Ngai kũmalũngya kuma mũũndanĩ wa Eteni. Ũu nĩkwasya kana syana isu o nasyo syaĩ no mũvaka ikũe na kũkw’a.
Kethĩwa Atamu na Eva nĩmamwĩwie Yeova, mo na syana syoo methĩwa matanĩie thayũ. Onthe mesaa kwĩkala na ũtanu tene na tene kũũ nthĩ. Vayaĩ ũmwe wesaa kũkũa, kũwaa na kũkw’a.
Ngai endaa andũ matũae na ũtanu tene na tene, na nĩwathanĩte kana mũthenya ũmwe ũu ũkeanĩa. Nthĩ yonthe ĩkethĩwa yĩ mbanake, namo andũ onthe makeethĩwa na mĩĩ mĩseo. Na kĩla mũndũ akeethĩwa mũnyanyae mũseo wa andũ onthe na wa Ngai.
Ĩndĩ Eva ndaaendeea kwĩthĩwa e mũnyanyae wa Ngai. Kwoou ndwaĩ ũndũ mũvũthũ kwake kũsyaa syana. Nĩweethĩawa na woo. Vate nzika kwĩthĩwa ate mwĩwi kwa Yeova nĩkwamũeteie kyeva kingĩ. We ndũĩtĩkĩlana na ũndũ ũsu?
Atamu na Eva maĩ na syana sya imwana na eĩtu. Yĩla mwana woo wa mbee wasyaiwe, mamwĩtie Kaini. Na mwana woo wa kelĩ mamwĩta Aveli. Nata kweekĩkie kwoo? We nĩwĩsĩ?
Mwambĩlĩlyo 3:16-23; 4:1, 2; Ũvuan’yo 21:3, 4.
Makũlyo
- Mwĩkalĩle wa Atamu na Eva nza wa mũũnda wa Eteni wailyĩ ata?
- Atamu na Eva mambĩĩe ũkwatwa nĩ kyaũ, na nĩkĩ?
- Nĩkĩ syana sya Atamu na Eva syaĩ ikũae na kũkw’a?
- Kethĩwa Atamu na Eva nĩmamwĩwie Yeova, mwĩkalĩle woo na wa syana syoo wĩthĩwa wailyĩ ata?
- Kũlea kwĩw’a kwa Eva kwamũeteie woo ata?
- Syana sya mbee ilĩ sya Atamu na Eva syeetawa ata?
- Syana ii ingĩ syĩ visanĩ nĩ syĩva?
Makũlyo ma kwongeleela
- Soma Mwambĩlĩlyo 3:16-23 na 4:1, 2.
Kũumanĩwa kwa mũthanga kwaetie kyaũ thayũnĩ wa Atamu? (Mwa. 3:17-19; Alo. 8:20, 22)
Nĩkĩ syĩtwa ya Eva yĩla ũalyũlo wayo nĩ “Ũla Wĩ Thayũ,” yaĩlĩte? (Mwa. 3:20)
Yeova oonanisye ĩnee ata kwa Atamu na Eva mamina kwĩka naĩ? (Mwa. 3:7, 21)
- Soma Ũvuan’yo 21:3, 4.
Nĩ “maũndũ ma mbee” meva weteele kwona maivetwa?
