Ngewa ya 95: Ũndũ Yesũ Wamanyĩasya
MŨTHENYA ũmwe Yesũ nĩweeie mũndũ ũmwe kana no nginya ende mũtũi wake. Nake mũndũ ũsu amũkũlya: ‘Mũtũi wakwa nũũ?’ Yesũ nĩweesĩ ũndũ mũndũ ũsu wasũanĩaa. We asũanĩaa kana andũ ala ma mbaĩ na ndĩni yake tũ, nomo atũi make. Kwoou ekai twone ũndũ Yesũ wasũngĩie.
Mavinda angĩ Yesũ nĩwamanyĩasya kwa kũtavany’a ngewa. Ũu nĩw’o weekie. Yesũ nĩwamũtavisye ngewa ĩũlũ wa Mũyuti na Mũsamalia. Nĩtũminĩte kwĩmanyĩsya kana Ayuti aingĩ mayendete Asamalia. Yu-ĩ, ĩno nĩyo ngewa ya Yesũ:
Mũthenya ũmwe kwaĩ Mũyuti watheeete nzĩanĩ ya kĩĩmanĩ, aendete Yeliko. Ĩndĩ avutani mamũvithũkĩa. Moosa mbesa syake na mamũkũna matia akilĩlye kũkw’a.
Ĩtina, mũthembi Mũyuti nĩwesĩile nzĩa ĩsu. Na oona mũndũ ũsu waĩ mũkũne. We wĩsũanĩa ta weekie ata? Eelelũkile akĩla nzĩa aenda ngalĩko ĩsu ĩngĩ na aendeea na kũthi. Na ĩndĩ mũndũ ũngĩ waĩ wa ndĩni mũno esĩla vau. Aĩ Mũlivai. Nĩwaũngamie? Aiee, o nake ndaaũngama atetheesye mũndũ ũsu waĩ mũkũne. Nũtonya kwona mũthembi ũsu na Mũlivai vaaya matheete nzĩanĩ.
Ĩndĩ kwasisya ũũ wĩ vaa vamwe na mũndũ ũũ mũkũne. Nĩ Mũsamalia. Mũsamalia ũsu nĩwamũtetheeisye Mũyuti ũsu. Nĩweekĩie itau syake ndawa. Na ĩtina wa ũu, amũtwaa vandũ vala ũtonya ũthũmũa na kũkwata kavaa.
Ĩtina wa kũmina ngewa yake, Yesũ nĩwamũkũlilye mũndũ ũla wamũkũlĩtye yĩla ĩkũlyo: ‘We wĩsũanĩa nĩ wĩva katĩ wa asu atatũ woonanisye aĩ mũtũi wa mũndũ ũsu waĩ mũkũne? Wĩsũanĩ nĩ mũthembi, kana nĩ Mũlivai, kana nĩ Mũsamalia?’
Nake mũndũ ũsu asũngĩa: ‘Nĩ Mũsamalia. We aĩ na tei kwa mũndũ ũsu waĩ mũkũne.’
Ĩndĩno Yesũ amwĩa: ‘Waneena w’o. Kwoou enda na ũyĩkaa ala angĩ o ta ũu we weekie.’
We nũkwendeew’a nĩ nzĩa ĩla Yesũ wamanyĩasya nayo? Nĩtũtonya kwĩmanyĩsya maũndũ maingĩ mũno ma vata ethĩwa tũkeethukĩĩsya ũndũ Yesũ ũneenete Mbivilianĩ, kana ti w’o?
Luka 10:25-37.
Makũlyo
- Nĩ ĩkũlyo yĩva mũndũ ũmwe wakũlilye Yesũ, na nĩkĩ?
- Mavinda angĩ Yesũ atũmĩaa kyaũ kũmanyĩsya, na tũminĩte kwĩmanyĩsya kyaũ ĩũlũ wa Ayuti na Asamalia?
- Nthĩnĩ wa ngewa ĩla Yesũ waeie, kweethĩiwe ata kwa Mũyuti ũla waĩ nzĩanĩ ĩla yaendete Yeliko?
- Kweethĩiwe ata yĩla mũthembi Mũyuti na Mũlivai mesĩile nzĩanĩ ĩsu?
- Nthĩnĩ wa visa ũũ, nũũ ũkũtetheesya Mũyuti ũũ mũũmĩsye?
- Yesũ akũlilye ĩkũlyo yĩva amina kũea ngewa ĩsu, na ũ mũndũ asũngĩie ata?
Makũlyo ma kwongeleela
- Soma Luka 10:25-37.
Vandũ va kũsũngĩa o ĩmwe kwa ĩmwe, Yesũ amũtetheeisye ata mũndũ ũsu weesĩ Mĩao asũanĩe ĩũlũ wa ũndũ ũsu? (Lk. 10:26; Mt. 16:13-16)
Yesũ atũmĩie ngelekany’o ata nĩ kana amatetheesye ethukĩĩsya make maeke kĩmena? (Lk. 10:36, 37; 18:9-14; Tito 1:9)
No Wendeewʼe Nĩ Ii
YESŨ NĨWE NZĨA, NĨWE W’O, NĨWE THAYŨ
Mũsamalia Woonanisye Kana Nĩ Mũtũi Mũseo
Yesũ atũmĩie ata ngelekany’o ya “Mũsamalia mũseo,” kũmanyĩsya ĩsomo ya vata mũno?
YESŨ NĨWE NZĨA, NĨWE W’O, NĨWE THAYŨ
Kũsyoka kwa Mwana Waĩ Mwau
Nĩ maũndũ meva tũtonya kwĩmanyĩsya kuma ngelekany’onĩ ya Yesũ ya mwana kĩmaamai?
