KWASISYA kĩla kĩendee vaa! Ũya nĩ Mose ũtambũũkĩtye ndata yake ĩũlũ wa Ũkanga Mũtune. Asu me nake vandũ vate na mũisyo ngalĩko ĩsu ĩngĩ nĩ Aisilaeli. Ĩndĩ Valao na asikalĩ make onthe maendee na kũkw’ĩĩa ũkanganĩ. Ekai twone kĩla kyatumie ũndũ ũũ wĩkĩka.

O tondũ twĩmanyĩisye, Valao eeie Aisilaeli nĩmaume Misili ĩtina wa Ngai kũete ũthĩny’o wa 10 ĩũlũ wa Amisili. Aũme Aisilaeli ta 600,000 nĩmaendie, o vamwe na iveti na syana mbingĩ. O na andũ angĩ aingĩ ala maĩ manamwĩtĩkĩla Yeova, nĩmaendanisye vamwe na Aisilaeli. Nĩmoosie ndĩthya syoo sya malondu, mbũi, na ng’ombe mathi nasyo.

Na Aisilaeli matanamba kũthi, meetya Amisili ngũa na syĩndũ sya thaavu na vetha. Na Amisili maĩ na w’ĩa mũno nũndũ wa ũthĩny’o ũsu wa mũthya. Kwoou mamanenga Aisilaeli kyonthe kĩla meetisye.

Ĩtina wa mĩthenya mĩvũthũ Aisilaeli nĩmavikie Ũkanganĩ Mũtune. Na mathũmũa vau. O ĩvindanĩ yĩu, Valao na andũ make mambĩĩa kwĩlila nũndũ nĩmalekilye Aisilaeli mathi. Namo masya, ‘Tũlekilye ngombo sitũ syathi!’

Kwoou Valao aalyũla mesilya ĩngĩ. Na oombany’a ita syake na ĩkasya yake ya kaũ. Na ĩndĩ akuthũka atĩĩa Aisilaeli e na makasya ma kaũ manyuve 600, o vamwe na makasya ala angĩ onthe ma kaũ ma Misili.

Yĩla Aisilaeli moonie Valao na ita syake mamatĩĩe, makwatwa nĩ w’ĩa mũno. Vayaĩ nzĩa maĩ matonya kũkĩĩla. Ũkanga Mũtune waĩ ngalĩko ĩmwe yoo, namo Amisili maĩ ngalĩko ĩla ĩngĩ mokĩte. Ĩndĩ Yeova aũngamya kĩtuĩ kya mũumbĩ katĩ wa andũ make na Amisili. Kwoou Amisili mayaĩ matonya kwona Aisilaeli ũndũ matonya kũkita namo.

Yeova ĩndĩ eea Mose atambũũkye ndata yake ĩũlũ wa Ũkanga Mũtune. Yĩla weekie ũu, Yeova aete kĩuutani kĩnene kuma ũmĩlonĩ wa syũa. Na ũkanga wataanĩsya, na kĩw’ũ kya ũkanga kyasiĩĩwa ngaliko syelĩ.

Na Aisilaeli malika ũkanganĩ katĩ na mainga makinyĩle nthĩ nyũmũ. Andũ asu milioni mbingĩ vamwe na indo syoo maingie ũkanga ũsu masaa maingĩ vate mũisyo nginya ngalĩko ĩla ĩngĩ. Ĩtina vyũ Amisili nĩmaĩ matonya kũmona Aisilaeli ĩngĩ. Ngombo syoo nĩsyatolokete! Kwoou meekalaata malika ũkanganĩ katĩ mamaatĩĩe.

Yĩla meekie ũu, Ngai aumya ndĩa sya makasya moo ma kaũ. Amisili makwatiwe nĩ w’ĩa mũno na maua mbu: ‘Yeova nũkũkitĩa Aisilaeli kũla tũĩ. Tũkĩei tume vaa!’ Ĩndĩ maĩ aselee.

Yu nĩw’o ĩndĩ Yeova weeie Mose nĩatambũũkye ndata yake ĩũlũ wa Ũkanga Mũtune, tondũ wonie visanĩ. Na yĩla Mose weekie ũu, kĩw’ũ kya ũkanga kyasyokeanĩa na kyavw’ĩka Amisili na makasya moo ma kaũ. Ita syoo syonthe nĩsyalikĩte ũkanganĩ katĩ ivikĩlĩte Aisilaeli. Vaiĩ Mũmisili o na ũmwe waaumĩla e thayũ!

Andũ ma Ngai matanie ta kĩ kũvonokw’a! Aũme mainie wathi wa kũmũtũngĩa Yeova mũvea, mayasya: ‘Yeova nũsindĩte ũsindi mũnene. Mbalasi na ala maitũlĩte nĩwĩkĩtye ũkanganĩ.’ Nake Miliamu mwĩĩtu-a-inyia wa Mose oosa kathembe kw’okonĩ kwake, na aka onthe mamũatĩĩa mena tũthembe twoo. Namo masũngaa, mayina o wathi ũla wainawa nĩ aũme: ‘Yeova nũsindĩte ũsindi mũnene. Mbalasi na ala maitũlĩte nĩwĩkĩtye ũkanganĩ.’

Kuma kilungu kya 12 nginya 15.