WE NĨWĨSĨ ũndũ wa mbee ũla Noa weekie yĩla we na mũsyĩ wake maumie ngalawanĩ? Nĩwathembie kana amũnenge Ngai mũthĩnzĩo. Nũtonya kũmwona ayĩka ũu visanĩ ũũ wĩ vaa ĩtheo. Noa nĩwanengie Ngai mũthĩnzĩo ũũ wa nyamũ nĩ kana amũtũngĩe mũvea nũndũ wa kũtaangĩĩa mũsyĩ wake kuma kĩla kĩw’ũnĩ kingĩ.

We nũĩsilya Yeova ta wendeeiw’e nĩ mũthĩnzĩo ũsu? Ĩĩ, nĩwendeeiw’e. Na ĩndĩ atianĩa na Noa kana ndakamyananga nthĩ ĩngĩ nongi na kĩw’ũ kingĩ

O kwa kavinda kanini nthĩ yonthe nĩyanyiaie, na Noa na mũsyĩ wake mambĩĩa mwĩkalo mweũ nza wa ngalawa. Ngai nĩwamaathimie na amea: ‘No nginya mwĩthĩwe na syana mbingĩ. No nginya mwongeleke mũno na mũinyaĩĩka kĩla vandũ ĩũlũ wa nthĩ.’

Ĩndĩ ĩtina, andũ mesa kwĩw’a ĩũlũ wa kĩw’ũ kingĩ, maĩ matonya ũkĩa makyona kĩw’ũ kyu ta kĩkoka o ĩngĩ. Kwoou Ngai anengane kĩndũ kya kũmalilikany’a andũ ũtianĩo wake kana ndakamyananga nthĩ ĩngĩ nongi na kĩw’ũ kingĩ. We nĩwĩsĩ anenganie kyaũ kĩmalilikanasye? Anenganie ũtaathi.

Ũtaathi nĩwonekaa mũno mũno yayayanĩ yĩla syũa yaa ĩtina wa kwaua. Ũtaathi nũtonya kwĩthĩwa na malangi maingĩ manake. We waaona ũmwe? Nũkwona ũũ wĩ vaa visanĩ?

Ũũ nĩ w’o Ngai waisye: ‘Nĩngũlũlũmĩlya ũtianĩo wakwa nenyu kana ndikananga andũ na nyamũ ĩngĩ nongi na kĩw’ũ kingĩ. Nĩngũwia ũtaathi wakwa mathweonĩ. Na yĩla ũkaumĩlaa, ngawoonaa na kũlilikana ũtianĩo ũũ wakwa.’

Kwoou we woona ũtaathi, w’o waĩlĩtwe ũkũlilikany’a kyaũ? Ũtũlilikanasya ũtianĩo wa Ngai kana ndakamyananga nthĩ ĩngĩ nongi na kĩw’ũ kingĩ.

Mwambĩlĩlyo 8:18-22; 9:9-17.