Kuma tene Ngũsĩ sya Yeova syĩthĩĩtwe na sukulu sya kwĩmanyĩsya maũndũ makonetye Mbivilia. Sukulu sya mwanya nĩsyĩkawa kwondũ wa andũ ala meyumĩtye methĩwe atavany’a ma ĩvinda yonthe. Sukulu isu nimatetheeasya ‘kwĩanĩsya ũthũkũmi woo.’—2 Timotheo 4:5.

Sukulu ya Mavainia. Ĩla mũndũ wamina mwaka ũmwe e vainia wa kĩla ĩvinda, nũthokaw’a sukulunĩ ya mavainia ĩla yĩthĩawa ya mĩthenya thanthatũ. Sukulu ĩsu nĩtonya kwĩthĩwa Nyũmbanĩ ya Ũsumbĩ ĩla yĩ vakuvĩ. Kĩeleelo kya sukulu ĩsu nĩ kũtetheesya mavainia mamũthengeee Yeova, methĩwe na mosyao maseo ũtavany’anĩ, na mayĩendeea kwĩthĩwa me aĩkĩĩku ũthũkũminĩ woo.

Sukulu ya Atavany’a ma Ũsumbĩ. Kĩeleelo kya sukulu ĩsu ya myei ĩlĩ nĩ kũmanyĩsya atavany’a ala methĩĩtwe me mavainia kwa ĩvinda ĩasa, na meyumĩtye kũtia mĩsyĩ yoo na kũthi isionĩ ila mekwendeka mathi. Nĩmaatĩĩaa ngelekany’o ya Mũtavany’a ũla waĩ mũnene vyũ ĩũlũ wa nthĩ, Yesũ Klĩsto, na vate nzika nĩmaasya, “Ninyioo; ndũma nyie.” (Isaia 6:8; Yoana 7:29) Ĩndĩ, kũthamĩĩa vaasa na mĩsyĩ yoo no kũtume memanyĩsya kwĩthĩwa na kĩlasi kĩ nthĩ wa kĩla manaĩ nakyo. Nĩvatonyeka ũkethĩa kĩthĩo, nzeve, na lĩu syĩ kĩvathũkany’o na kũla manatũaa. O na ĩngĩ, nĩvatonyeka ũkethĩa no nginya memanyĩsye kĩthyomo kyeũ. Sukulu ya Atavany’a ma Ũsumbĩ ĩendawa nĩ ana-a-asa ala matatwaanĩte, eĩtu-a-asa ala mate atwae na Aklĩsto ala me nthĩnĩ wa mũtwaano. Onthe maĩle kwĩthĩwa na myaka katĩ wa 23 na 65. Sukulu ĩsu nĩtumaa methĩwa na ndaĩa sya Kĩklĩsto ila syendekaa nthĩnĩ wa wĩa woo. O na ĩngĩ, nĩtumaa methĩwa na ũmanyĩ ũla ũmatetheeasya matũmĩwe nĩ ­Yeova na ũseũvyo wake nthĩnĩ wa maũndũ maingĩ.

Sukulu ya Mbivilia ya Ngileati. Nthĩnĩ wa kĩthyomo kya Kĩevelania, ndeto “Ngileati” ĩkonanĩtye na “ũkũsĩ.” Kuma ĩla Sukulu ya Mbivilia ya Ngileati yambĩlĩĩilw’e mwaka wa 1943, amisonalĩ mbee wa 8,000 kuma sukulu ĩsu nĩmatũmĩtwe makaumye ũkũsĩ “kũvika itulunĩ syonthe sya nthĩ,” na makwata mosyao maseo. (Meko ma Atũmwa 13:47) Kwa ngelekany’o, ĩla amisonalĩ maitũ mavikie Peru ĩvinda ya mbee, kũyaĩ na ikundi kũu, ĩndĩ yu kwĩ na ikundi mbee wa 1,000. Ĩla amisonalĩ maitũ mambĩĩie kũtavany’a nthĩ ya Japan, kwaĩ Ngũsĩ itavika ĩkũmi kũu, ĩndĩ yu kwĩ Ngũsi mbee wa 200,000. Nthĩnĩ wa Sukulu ĩsu yĩthĩawa ya myei ĩtano, Ndeto ya Ngai nĩkunĩkĩlawa kwa ũliku. Mavainia ma mwanya, ala matũmĩtwe makatavany’e me amisonalĩ, ala mathũkũmaa ovisinĩ sya ũvonge, na ala me wĩanĩ wa kũthyũlũlũka ikundi nĩmathokaw’a sukulunĩ ĩsu. Nĩmamanyĩaw’a mũno nĩ kana malũlũmĩĩlye wĩa wa Ũsumbĩ nthĩ yonthe.

• Kĩeleelo kya Sukulu ya Mavainia nĩ kyaũ?

• Naaũ maendaa Sukulu ya Atavany’a ma Ũsumbĩ?