KWASŨANĨA ũendeee kwĩmanyĩsya Mbivilia na mũndũ, na ũyona ewʼĩte mũyo mwingĩ nũndũ nĩwaelewa nĩ ĩandĩko ĩna mwasoma. Na kwa wasya wĩ nthĩ ayasya, “Yu wĩenda kwasya kana Mbivilia ĩmanyĩasya nthĩ ĩno ĩkaseũvwʼa ĩtwʼĩke vandũ vaseo vala tũkekala tene na tene?” Mwana-a-asa ũla ũũtavanyʼa nake aitheka o vanini na aimũkũlya, “We teene wasoma kyaũ Mbivilianĩ?” Mũmanyĩwʼa ũsu wa Mbivilia aithingithya mũtwe asengʼete, na ayasya, “Nĩsengʼa mũno kwĩthĩwa ndamanyĩĩtwʼe maũndũ asu!” Na kavindanĩ o kau ũililikana syumwa nini mbĩtu nũnawetete ũndũ ta ũsu ĩtina wa amanya kana ĩsyĩtwa ya Ngai nĩ Yeova.

We waakomana na ũndũ ta ũsu? Athũkũmi aingĩ ma Ngai nĩmakomanie nawʼo. Ve maũndũ manini matonya kũtũlilikanyʼa nesa mũthĩnzĩo mũseo ũla tũnengetwe, nawʼo nĩ ũmanyi wa ũla wʼo! Kwasũanĩa o vanini: We wakwatie mũthĩnzĩo ũsu ata? Nthĩnĩ wa ĩsomo yĩĩ, nĩtũũneenea ĩkũlyo yĩu. Ũmũnthĩ andũ ma Ngai maendeee kũkwata ũmanyi mwingĩ mũno ĩũlũ wa ũla wʼo, na ũndũ ũsu wĩonanyʼa nesa kana Ũsumbĩ wa Ngai nĩ silikalĩ ya wʼo ĩsumbĩkĩte ũmũnthĩ. Kwa ĩvinda ya myaka 100, Mũsumbĩ Yesũ Klĩsto ethĩĩtwe ayĩĩkĩĩthya kana andũ ma Ngai nĩmamanyĩwʼa ũla wʼo.