MŨTHENGEEE NGAI
“Voyai na Mũkanengwa”
Mũmanyĩw’a ũmwe wa Yesũ amwĩie atĩĩ: “Mwĩaĩi, tũmanyĩsye kũvoya.” (Luka 11:1) Yesũ nĩwamũsũngĩie kwa kũmũnenga ngelekany’o ilĩ ila itonya kũtũmanyĩsya ũndũ tũtonya kũvoya nĩ kana twĩw’ĩke nĩ Ngai. Ngelekany’o isu nitonya kũũtetheesya ethĩwa wonaa Ngai ta ũtew’aa mboya syaku.—Soma Luka 11:5-13.
Ngelekany’o ya mbee ĩneneete ĩũlũ wa mũndũ ũnũũvoya. (Luka 11:5-8) Nthĩnĩ wa ngelekany’o ĩsu, Yesũ nĩwaeleisye ĩũlũ wa mũndũ wakwatie mũeni ũtukũ katĩ, ĩndĩ ndaĩ na lĩu ũtonya kũmũnenga. O na vailyĩ ũu, waĩ ũndũ wa vata mũeni ũsu amanthĩwe lĩu. O na kũtw’ĩka kwaĩ ũtukũ katĩ, mũndũ ũsu nĩwaendie kũvoya mũnyanyae lĩu. Mbeenĩ, mũnyanyae ndendaa kũamũka nũndũ nĩwakomete vamwe na mũsyĩ wake. Ĩndĩ nũndũ nĩwaendeeie kũmũvoya na kĩthing’ĩĩsyo, mũnyanyae nĩwesie kũkĩla na amũnenga lĩu. *
Tũtonya kwĩmanyĩsya kyaũ kumana na ngelekany’o ĩsu? Twĩĩmanyĩsya kana twaĩlĩte kũvoya tũte kũeka. (Luka 11:9, 10) Kũvoya tũte kũeka ti kwonany’a kana Ngai ndethĩawa ayenda kwĩthukĩĩsya mboya sitũ. Kĩvathũkany’o na ũla mũndũ weew’aa vinya kũamũka, Yeova nĩwendaa kwĩthukĩĩsya mboya sya ala maĩkĩĩaa kana nũtonya kũsũngĩa mboya syoo. Ĩla twavoya tũte kũeka, twĩthĩawa tũyonany’a kana nĩtũmũĩkĩĩaa Yeova. O na ĩngĩ, twĩthĩawa tũyonany’a kana twĩ na vata mũno na kĩla tũũvoya, na twĩ na mũĩkĩĩo kana Yeova nũtonya kũtũsũngĩa ethĩwa twĩvoya kwosana na kwenda kwake.—Maliko 11:24; 1 Yoana 5:14.
Ngelekany’o ya kelĩ ĩneenete ĩũlũ wa “ũla wĩw’aa mboya,” nake nĩ Yeova. (Savuli 65:2) Yesũ akũlilye atĩĩ: “Nĩ wĩva wenyu, ĩthe wa mwana, eetw’a kĩmũtũ nĩ mwana wake, nũmũnenga ĩvia? kana eetw’a ĩkũyũ, vandũ va ĩkũyũ nũmũnenga nzoka? Kana eetw’a ĩtumbĩ, nũmũnenga kĩng’auũ?” Ũsũngĩo wa makũlyo asu nĩ kana vaiĩ ĩthe wĩ wendo ũtonya kũnenga syana syake syĩndũ nthũku. Yesũ amina kũweta ngelekany’o ĩsu, aeleisye kana ethĩwa andũ mate eanĩu ‘nĩmanengae syana syoo mĩthĩnzĩo mĩseo, nĩ mbee mũno Ĩthe witũ ũla wĩ ĩtunĩ kũtũnenga veva mũtheu.’ Ũsu nĩw’o mũthĩnzĩo ũla mũseo vyũ Yeova ũnengae syana syake! *—Luka 11:11-13; Mathayo 7:11.
Yeova nĩwendaa kwĩthukĩĩsya mboya sya ala maĩkĩĩaa kana nũtonya kũsũngĩa mboya syoo
Ngelekany’o ĩsu yatũmanyĩsya kyaũ ĩũlũ wa “ũla wĩw’aa mboya”? Yesũ endaa tũmanye kana Yeova nĩ Ĩthe wĩ wendo na ethĩawa eyũmbanĩtye kũsũngĩa mboya sya athũkũmi make. Kwoou, athaithi ma Yeova mayaĩle kũkĩa kũmũelesya mavata moo. O na ĩngĩ, athaithi ma Yeova nĩmesĩ kana we amendeaa ũseo. Kwoou, nĩmetĩkĩlaa ũndũ ũsũngĩaa mboya syoo o na ethĩwa ndanamasũngĩa kwa nzĩa ĩla mekwendaa. *
Ĩvuku ya Mbivilia yĩla yĩvangĩĩwe kũsomwa
^ kal. 2 Ngelekany’o ĩla Yesũ wanenganie yĩonany’a maũndũ ala meekawa nĩ Ayuti. Ayuti moonaa kwonany’a ũlau ne ũndũ wa vata mũno. Mauaa mĩkate ĩtonya kũĩwa nĩ andũ ma mũsyĩ mũthenya o ũsu na kwoou yathela, mũndũ aĩ atonya kũvoya mũnyanyae. O na ĩngĩ ethĩwa mũndũ nĩ ngya, akomaa lumu ĩmwe vamwe na mũsyĩ wake.
^ kal. 4 Ĩla Yesũ waisye “ti mbee mũno,” oonanasya kana ethĩwa andũ no meke ũndũ mũna, Ngai nũtonya kwĩka ũu mbeange. Kwoou, ethĩwa andũ nĩmanengae syana syoo mĩthĩnzĩo mĩseo, Ngai ndesa kũemwa nĩ kũtũnenga veva mũtheu twamũvoya.
^ kal. 5 Nĩ kana wĩmanyĩsye maũndũ maingangĩ ĩũlũ wa ũndũ ũtonya kũvoya nĩ kenda wĩw’ĩke nĩ Ngai, sisya kĩlungu kya 17 kya ĩvuku Mbivilia Yo Ĩmanyĩasya Ata?, yĩla yĩkyavĩthĩtw’e nĩ Ngũsĩ sya Yeova.
