Wathani wa 1. Ithingitho Sya Nthĩ

“Kũkeethĩwa ithingitho nene sya nthĩ.”—LUKA 21:11.

● Ve kana kaĩ na vakuvĩ mwaka ũmwe na nusu ketawa Winnie, koovoiw’e katumbĩĩwe nĩ ngũta sya nyũmba nthĩ ya Haiti. Atangaasi ma televiseni ala maendeee kũnengane ũvoo ĩũlũ wa kĩthingitho kĩu nĩmo meewie wasya wa kana kau kaiĩa. Kana kau nĩkoovoiw’e, ĩndĩ asyai mako nĩmakwie.

MAŨNDŨ ALA MEKĨKĨTE MEONANY’A ATA? Andũ mbee wa 300,000 nĩmakwie yĩla kĩthingitho kĩnene kya nthĩ (7.0 magnitude) kyakũnie nthĩ ya Haiti Mwei wa 1, 2010. Na ĩndĩ ĩveny’a na ĩsalukya, andũ angĩ milioni 1.3 nĩmatiiwe mate na kũndũ kwa kwĩkala. O na kũtw’ĩka kĩthingitho kĩu kyaĩ nthĩ ya Haiti kyaĩ kĩnene mũno, ve ithingitho ingĩ nene sya nthĩ syeethĩiwe isionĩ syĩ kĩvathũkany’o. Kwa ngelekany’o, ithingitho nene sya nthĩ ta 18 ũu nĩsyeethĩiwe kũndũ kwĩ kĩvathũkany’o ĩũlũ wa nthĩ katĩkatĩ wa Mwei wa 4, 2009 na Mwei wa 4, 2010.

ALA MAVĨNGAA MAKOTHAA KWASYA ATA? Ti atĩ ithingitho sya nthĩ nĩsyongelekete. Twonaa ta syongelekeele nũndũ tekinolongyia nĩtumaa tũkwata livoti mbingĩ ĩũlũ wasyo kwĩ tene.

WONI ŨSU NĨ WA W’O? Kwasũanĩa ũndũ ũũ: Mbivilia ndĩneeneaa mũno ũtalo wa ithingitho ila syaĩ syĩthĩwe kw’o ĩvindanĩ ya mũminũkĩlyo. Vandũ va ũu, ĩwetete kana “ithingitho nene sya nthĩ” ikeethĩwa “kũũ na kũũ.” Ithingitho isu nĩ ũmwe katĩ wa maũndũ ala maĩ methĩwe me wonany’o wa kana twĩkalĩte mĩthenyanĩ ya mũminũkĩlyo.—Maliko 13:8; Luka 21:11.

WE WĨONA ATA? Ũmũnthĩ kwĩ ithingitho nene sya nthĩ o tondũ Mbivilia yathanĩte?

Ĩndĩ ithingitho sya nthĩ syĩ syoka ti syo siũtũĩkĩĩthya kana twĩkalĩte mĩthenyanĩ ya mũminũkĩlyo. Vandũ va ũu, syo no wathani ũmwe katĩ wa mawathani maingĩ ala maendeee kwĩanĩa. Kwatũneenee wathani wa kelĩ.

[Maelesyo Makuvĩ]

“O na kau ithyĩ [andũ ma saenzi] tũsyĩtaa ithingitho nene sya nthĩ, kĩla andũ ala angĩ methĩawa mesĩ nĩ kana ĩsu nĩ mĩisyo mĩthũku.”​—KENHUDNUT, U.S. GEOLOGICAL SURVEY.

[Picture Credit Line]

© William Daniels/Panos Pictures