Wakyumwa ũmwe mũthenya, mũndũũme wĩtawa Kenneth na mũndũ mũka wĩtawa Filomena, ala mekalaa Curaçao, nĩmaendie kũkethya andũ matwaanĩte ala meemanyĩasya Mbivilia namo.

Kenneth aĩtye atĩĩ: “Twavika kwoo, tweethĩie nyũmba yĩ mbinge na ngalĩ ĩte vo. Ĩndĩ ve kĩndũ kyanzukumie nĩkũnĩe kĩveti kya mũndũũme ũsu simũ.”

Kĩveti kĩu nĩkyoosie simũ na kyasya kana mũũme e wĩanĩ. Ĩndĩ ĩla kyamanyie kana nĩ Kenneth na Filomena me mũomonĩ, nĩkyamathokisye malike nyũmba.

Saanĩ o isu, nĩmamanyie kana nũkũĩaa. Ĩla Kenneth wavoyie nĩ kana mambĩĩe kwĩmanyĩsya, mũndũ mũka ũsu nĩwambĩĩe kũĩa ĩngĩ. Ũndũ ũsu nĩwatumie Kenneth na Filomena menda kũmanya kĩla kĩũmũthĩny’a.

Mũndũ mũka ũsu ameie kana eĩvangĩte kwĩyũaa, na aekie kũandĩkĩa mũũme valũa ũeleetye kĩtumi kya kwĩyũaa ĩla Kenneth ũmũkũnĩie simũ. Ameie kana eĩw’a akw’ĩte ngoo vyũ, na kwoou mamũtavya maũndũ matonya kũmũkiakisya kuma Mbivilianĩ. Ndeto isu sya kwĩkĩa vinya nĩsyatangĩĩie thayũ wa mũndũ mũka ũsu.

Kenneth aĩtye atĩĩ: “Nĩtwamũtũngĩie Yeova mũvea nũndũ wa kũtũtũmĩa tũtetheesye mũndũ mũka ũsu wakw’ĩte ngoo vyũ, na mũno mũno nũndũ nokwĩthĩwa atũmĩie mũlaĩka wake kana veva wake mũtheu ũtũsukume kũkũnĩa mũndũ mũka ũsu simũ!” *

No twĩkũlye-ĩ, Kenneth na Filomena no methĩwe matavĩtĩtye kũĩkĩĩa kana Ngai nĩwalikĩlĩĩle atetheesye mũndũ mũka ũsu kwĩsĩla alaĩka kana veva mũtheu, ũla nĩ vinya wake wa kwĩka maũndũ? Kana Kenneth akũnie simũ no ũndũ nikũnawa tũ?

Tũyĩsĩ nesa, ĩndĩ kĩla twĩsĩ nĩ kana Ngai nũtũmĩaa alaĩka kũtetheesya andũ kĩ-veva. Kwa ngelekany’o, Mbivilia yonanasya kana Ngai nĩwatũmĩie mũlaĩka atongoesye mũtavany’a weetawa Vilivu akatetheesye mũndũũme Mũethiovia waĩ na ũkũmũ mũnene ũla wendaa kũtetheew’a kĩ-veva.—Meko ma Atũmwa 8:26-31.

Ndĩni syĩ kĩvathũkany’o imanyĩasya kana ve syũmbe syĩ vinya sya veva, imwe itw’ĩkĩkanaa nĩ nzeo na nĩsyo syĩkaa kwenda kwa Ngai kana isũvĩaa kĩla mũndũ. Andũ aingĩ maĩkĩĩaa kana kwĩ alaĩka na kana syũmbe isu sya veva nimatethasya. Ĩndĩ o na ũu wĩ o vo, ve andũ aingĩ mataĩkĩĩaa o na vanini kana kwĩ alaĩka.

Mo alaĩka me kw’o? Na ethĩwa me kw’o, maumie va? Mbivilia ĩmanyĩasya ata ĩũlũ wa alaĩka? No maũtetheesye? Ekai twone mosũngĩo ma makũlyo asu.