Ngai ombĩte mĩĩ yitũ yĩ na ũtonyi wa kwĩvosya. Yĩla mwĩĩ ũte na mathĩna watemwa, wakalwʼa, kana watinwa, “wambĩĩasya kwĩvosya nowʼo, wĩthĩwe wĩ na itau nene kana nini.” (Johns Hopkins Medicine) Ĩtina wa ĩvinda ĩnini mwĩĩ nũekaa kũua, kĩtau kĩkavoa na ũyĩthĩwa na vinya ĩngĩ.

KWASŨANĨA ŨNDŨ ŨŨ: Ethĩwa Mũmbi aseũvisye mĩĩ yitũ kwa nzĩa ĩtonya kwĩvosya itau, tũyaĩle kwĩthĩwa na mũĩkĩĩo kana akatũtetheeasya kũmĩĩsya maũndũ ala matũũmĩasya ngoonĩ? Mũandĩki wa Savuli aandĩkie ndeto ii ĩũlũ wa Ngai: “Nũvoasya ala matũlĩkile ngoo, na kwova mawũkite moo.” (Savuli 147:3) Ĩndĩ, yĩla weethĩwa ũũmĩĩte ngoonĩ nũndũ wa maũndũ maũkwatie, ũtonya ata kwĩthĩwa na mũĩkĩĩo kana Yeova nũkũendeea kũũtetheesya kũvoa?

Ngai atũtavĩtye atĩĩ: “Ndũkakĩe, nũndũ nĩ vamwe naku; ndũkateve, nũndũ nyie nĩ Ngai waku; ngakwĩkĩa vinya; ĩĩ, ngakũtethya.” (Isaia 41:10) Mũndũ ũla wĩthĩawa esĩ kana Yeova nũmũsũvĩaa ethĩawa na mũuo wa kĩlĩko na vinya wa kũmĩanĩsya ma matatwa me kĩvathũkanyʼo. Mũtũmwa Vaulo eetie mũuo ũsu wa kĩlĩko, “mũuo wa Ngai, ũla ũvĩtũkĩte ũmanyi wʼonthe.” Ongeleeile kwasya atĩĩ: “Nĩndonya maũndũ onthe nthĩnĩ wake ũla ũndonyethasya.”—Avilivi 4:4-7, 9, 13.

Maandĩko nĩmatũtetheeasya kwĩthĩwa na mũĩkĩĩo mũlũmu nthĩnĩ wa mawatho ma Yeova ma ĩvinda yũkĩte. Kwa ngelekanyʼo, ĩandĩko ya Ũvuanʼyo 21:4, 5 (yĩandĩkĩtwe ĩthangũnĩ yĩla yĩatĩĩe) yĩtũtavasya maũndũ ala ũkeka na nĩkĩ twaĩle kũĩkĩĩa kana akeeka maũndũ asu:

• “Akavyaĩa methoi onthe” methonĩ ma andũ. Yeova akamina mathĩna maitũ onthe na mawĩmakĩo, o na ala monekaa nĩ andũ angĩ me manini.

• ‘Ekalĩte kĩvĩlanĩ kya ũsumbĩ’ ĩtunĩ, Mũsumbĩ Mwene Vinya Wʼonthe akatũmĩa vinya wake na ũkũmũ kũsiĩĩa mathĩna na kũtũtetheesya.

• Yeova awetete kana mawatho make nĩ ma ‘kĩthito na nĩ ma wʼo.’ Ũu nĩ kwonanyʼa kana Yeova atũmĩaa kĩla kyonanawʼa nĩ ĩsyĩtwa yake tawʼo ũĩkĩĩthyo wa kana akeanĩsya ndeto syake.

Nthĩ, na Mbivilia nĩsyonanasya ndaĩa sya Ĩthe witũ wa ĩtunĩ. O na kau wũmbi nũtũtetheeasya kwĩthĩwa anyanya ma Ngai, Mbivilia ĩtũtavasya ĩmwe kwa ĩmwe kana nĩtwaĩle kwĩthĩwa anyanya ma Ngai. Yaasya atĩĩ: “Mũthengeei Ngai, nake akamũthengeea inywʼĩ.” (Yakovo 4:8) Ĩandĩko ya Meko ma Atũmwa 17:27 yaĩtye atĩĩ: “Nde kũasa na kĩla ũmwe waitũ.”

Woosa ĩvinda wĩmanyĩsye ĩũlũ wa Ngai, ũkeethĩwa na mũĩkĩĩo vyũ kana ‘nũkũsũvĩaa.’ (1 Vetelo 5:7) Ũkatetheka ata wamũĩkĩĩa Yeova?

Kwasũanĩa ngelekanyʼo ya Toru kuma Japan. Aeiwe nĩ inyia, ũla waĩ Mũklĩsto, ĩndĩ alika kĩkundinĩ kya ingʼendilĩ kĩtawa yakuza, kĩla kĩ nthĩ ya Japan. Aeleetye atĩĩ: “Naĩkĩĩaa kana Ngai nũmenete, na kwoou yĩla andũ ala neesĩ, na mũno mũno ala twaĩ ndũũ mũno makwʼa, noonaa ta Ngai weethĩawa ainzilĩla.” Toru eelesya kana ĩvinda yĩu weeyoneaa maũndũ asu mathũkĩte ũu, atwʼĩkie “mũndũ ũte tei na ũtamakaa.” Aielesya ĩũlũ wa wendi wake easya, “Nĩnendaa kũkwʼa nĩ wa mũika ĩtina wa kũaa mũndũ ũmwe waĩ nguma mũno kwĩ nyie nĩ kana ũndũ ũsu ũtume nĩmanyĩka mũno.”

Ĩndĩ, yĩla Toru na kĩveti kyake Hannah meemanyĩisye Mbivilia, Toru nĩweekie moalyũku manene  thayũnĩ wake. Hannah aĩtye: “Nĩneeyoneie na metho makwa mũemewa aivĩndũka.” Ũmũnthĩ Toru aneenaa ndeto ii ate na nzika: “Kwĩ Ngai na kwa wʼo nũsũvĩaa kĩla ũmwe witũ. Ndendaa mũndũ o na wĩva akwʼe, na kwoou nĩwĩyũmbanĩtye kũekea ala meelila kuma ngoonĩ kwondũ wa naĩ syoo. Nĩwĩthukĩĩasya maũndũ ala tũmũtavasya na tũtatonya kũtavya mũndũ ũngĩ, na maũndũ andũ angĩ mataelewa. O mĩtũkĩ Yeova akavetanga maũndũ onthe ala matũthĩnasya. O na ũmũnthĩ, nũtũtetheeasya kwa nzĩa tũteũsũanĩaa o na vanini. Nũtwendete na nũtũtetheeasya yĩla tũtũlĩkĩte ngoo.”—Savuli 136:23.

O tondũ twoona ngewanĩ ya Toru, kũmanya kana o mĩtũkĩ Ngai akamina maũndũ mathũku mũno ala matũkwataa na aitũvangũũla methoi nĩkũtumaa twĩthĩwa na wĩkwatyo mũlũmu, na kũitũtetheesya twĩkale tũte kwĩmakĩa. Kwoou, o na twĩkalĩte nthĩ yusĩe mathĩna, no tũtetheke twamanya kana Ngai nũtwendete na nũtũsũvĩaa.